EBIKORWA 9

1Omu biro ebi, Saulo obu akaba naakyakangisiriza kandi naahaya kwita abeegesebwa ba MUKAMA, yagenda hali omukuru w'abanyakatagara, 2yamusaba ahandiikire amasorrokaniro ga Damasiko ebbaruha ezirukumwikiriza kukwata n'okutwara Yerusaalemu abasaija rundi abakazi abarukuhondera Omuhanda gwa MUKAMA kakuba abasangayo. 3Obu akaba naakyagenda, ali haihi kuhika Damasiko, ahonaaho ekyererezi kyaruga omwiguru, kyamwehinguliriza. 4Yagwa hansi, yahurra iraka nirimugamba liti: “Saulo, Saulo, nompiiganiriza ki?” 5Nawe yakaguza ati; “Niiwe oha, Waitu?” Iraka lyamugarukamu liti: “Ninyowe Yesu ou orukuhiiganiza. 6Hati imuka, otaahe omu rubuga, oraamanyisibwa eki oraakora.” 7Abasaija abakaba nibagenda nawe baayemerra babuzirwe eky'okugamba. Bakahurra iraka, baitu batarole muntu. 8Saulo yaimuka hansi; obu yaburwire amaiso, tiyahweza kantu. Baamunanata, baamutaahya Damasiko. 9Akamara ebiro bisatu atarukurora kandi atarukulya noobwakuba kunywa kantu. 10Damasiko hakaba haliyo omwegesebwa, ibara lye Ananiya. MUKAMA akamubonekera yamweta ati: “Ananiya.” Uwe yayetebuka ati: “Ndi hanu, Taata.” 11Nandiki MUKAMA ati: “Imuka, ogende omu ruguudo orurukwetwa Oruterekeriire, okaguliirize omunju ya Yuda, omuntu arukwetwa Saulo owa Taruso. Mu kasumi kanu naasaba, 12kandi abonekiirwe naarora omusaija arukwetwa Ananiya naija kumutaho emikono nukwo ahweze.” 13Ananiya yamugarukamu ati: “MUKAMA wange, baingi bakambalizaaho omusaija ogu, na ha bubi obu abaire naakora abantu baawe omu Yerusaalemu. 14Na hanu aizire aina obusobozi abanyakatagara bakuru obu baamuhaire obw'okuboha boona abarukwamirra ibara lyawe.” 15Baitu MUKAMA yamugarukamu ati: “Genda, habwokuba omusaija ogu nikyo kikwato kyange eki nakomere kumanyisa ibara lyange omu Banyamahanga, n'omu bakama baabo, n'omu bantu boona aba Isirairi. 16Ndimwoleka nkooku asemeriire kubonabonesibwa muno habwange.” 17Nubwo Ananiya yagenzire, yataaha omunju egi. Yataho Saulo emikono naagamba ati: “Mugenzi wange Saulo, ntumirwe MUKAMA Yesu ayakubonekiire omu muhanda, nukwo oiguke amaiso kandi oijule Mwoyo Ahikiriire.” 18Ahonaaho ebintu ebirukusisa ebigaragamba by'encu byamuruga ha maiso, yarora. Saulo yayemerra, yabatizibwa. 19Obu yamazire kulya ebyokulya, yagarukwamu amaani. Damasiko akamarayo ebiro bike, ali hamu n'abeegesebwa. 20Ahonaaho yatandika kurangirra Yesu omu masorrokaniro gaayo naagamba ati: “Nuwe Mwana wa Ruhanga.” 21Boona abaamuhuliire bakahunirra nibakaguza bati: “Omusaija onu, tinuwe ayahiiganizaaga aba Yerusaalemu abaayaturaga ibara eri? Kandi tinikyo aiziriire hanu, abatwale omu maiso g'abanyakatagara abakuru baboherwe?” 22Baitu Saulo yayeyongera muno kwegesa n'amaani yakwasa ensoni Abayudaaya abaikaraga Damasiko, naagumiza kimu Yesu nkooku ali Kristo. 23Ebiro nkooku byagenzire nibihinguraho, Abayudaaya baayekoba hamu kumwita; 24baitu ensita zaabu Saulo yazimanya. Baikaraga nibalinda amalembo g'orubuga nyamusana n'ekiro nibaserra kumwita. 25Baitu abaikiriza baamucwisa ekiro, baamusirimura ekisiika ali omu kisombera ekiteekerwe kiteeko. 26Obu yahikire Yerusaalemu, yalengaho kwehikya abaikiriza; baitu boona bakamutiina, habw'okutaikiriza nkooku akaba ali kwo mwegesebwa. 27Baranaba nuwe ayamutwaire, yamuhikya abakwenda, yabasoborra Saulo nkooku yarozire MUKAMA omu muhanda, yabaza nawe, kandi nkooku yarangiriire n'obumanzi ibara lya Yesu omu Damasiko 28Saulo yatandika kugenda nabo, naabungira ab'omu Yerusaalemu, 29naarangirra n'obumanzi omwibara lya MUKAMA. Kandi obu yamazire kugamba n'Abayudaaya abaabazaaga Orugiriiki n'okuhakaniza nabo, baamalirra kumwita. 30Ab'oruganda obu baakimanyire, baamutwara Kaisaariya, nukwo baamwohereza agende Taruso. 31Nahabweki ekitebe ky'abaikiriza boona ab'omu Buyudaaya, Galiraaya, na Samaliya baasigara baina obusinge kandi baayeyongera kukanya nibatiina Ruhanga kandi nibagumibwa Mwoyo Ahikiriire. 32Petero obu akaba naagenda hanu na hali okubungira abaikiriza boona, yahika n'omu baikiriza abaikaraga Liida. 33Oku nuho yasangire omusaija, ibara lye Aineya, ayamazire emyaka munaana atarukuruga ha kitabu, azingamire. 34Petero yamugambira ati: “Aineya, Yesu Kristo hati yakukiza; imuka oyale ekitabu kyawe.” Ahonaaho yaimuka. 35Boona abaikaraga Liida na Sarooni obu baamurozire akizibwe, baahindukira MUKAMA. 36Omu rubuga Yoppa hakaba harumu omwegesebwa, ibara lye Tabita, amakuru gaalyo: Dorokasi rundi Enjaza. Omukazi ogu yakoraga ebirungi bingi naagabira n'abanaku. 37Omu biro ebi akarwara, yafa. Obu baamazire kwogya omutumbi gwe, baagubyamya omu kisiika ekiri omu kainaabiri. 38Kandi Liida teri hara na Yoppa. Nahabweki abeegesebwa obu baahuliire Petero nkooku ali oku, baamutumaho abasaija babiri nibamwesengereza bati; “Waitu oije oturole, otabandaara.” 39Petero yaimuka, yagenda nabo. Obu yahikireyo, baamutembya omu kainaabiri. Abafaakati boona baija bamwemerra haihi nibarra, nibamwoleka ebitetei n'ebijwaro ebindi Dorokasi ebi yabaziire obu akaba akyali nabo. 40Nubwo Petero yabaturukize aheeru, yateza amaju, yasaba. Obu yamazire kusaba, yahindukira omukazi ogu ayafiire, yamugambira ati: “Tabita, imuka.” Omukazi yaziburra amaiso, yarolerra Petero, yaimuka, yaikarra. 41Petero yamukwata ha mukono, yamwemereza. Nubwo yayesire abaikiriza n'abafakaati, yamubakwasa ali mwomeezi. 42Ekyabaireho kyamanywa omu Yoppa hoona; baingi baikiriza MUKAMA. 43Petero yayongera yamara ebiro Yoppa, naaraara omwa Simooni, omuhazi w'empu.

will be added

X\