EBIKORWA 8

1Ha kiro eki, abaikiriza aba Yerusaalemu bakatandika kuhiiganizibwa muno; kandi boona baararangira omu byaro bya Buyudaaya na Samaliya, kwihaho abakwenda bonka. 2Abasaija abamu abaatiinaga Ruhanga bakaziika Sitefano, baamulirirra muno. 3Baitu Saulo yaikara naahiiganiza abaikiriza Ruhanga naataaha omu buli nju, naakwata abasaija n'abakazi, naabata omu nkomo. 4Abo abaararangire, bakagenda hoona nibeegesa ekigambo kya Ruhanga. 5Filipo akagenda omu rubuga rwa Samaliya yabarangirra Kristo. 6Ebitebe bingi by'abantu, obu baahuliire Filipo ebi arukwegesa, baarora ebihuniriza ebi arukukora, baabiikiriza n'omutima gumu. 7Kandi baingi abakaba bakwasirwe emyoyo emibi, ekabarugamu neeyamuza. Baingi abakaba bazingamire n'abaramaire baakizibwa. 8Haabaho okusemererwa kwingi omu rubuga oru. 9Baitu omu rubuga oru hakaba haroho omusaija arukwetwa Simooni, ayakoraga eby'amasano, naahuniriza Abasamaliya, naayeyeta muntu mukuru. 10Abantu boona ab'orulengo orwa hansi n'orwa haiguru baamutiinaga nibagamba bati: “Omusaija onu nuwe maani ga Ruhanga arukwetwa Rutakirwa.” 11Kandi baamutiinaga, habwokuba akaba amazire omwanya mukooto naabahuniriza n'amasano ge. 12Baitu obu baikiriize Amakuru Amarungi, Filipo aga yabarangiriire ha bukama bwa Ruhanga na ha ibara lya Yesu Kristo, baabatizibwa, abasaija n'abakazi. 13Simooni nawe yaikiriza, kandi obu yamazire kubatizibwa, yaikaraga naagenda na Filipo. Obu yarozire ebihuniriza n'ebyamahano bikuru Filipo ebi yakozire, yahunirra muno. 14Abakwenda abakaba bali Yerusaalemu obu baahuliire Abasamaliya nabo nkooku baikiriize ekigambo kya Ruhanga, baabatumaho Petero na Yohaana. 15Obu baahikireyo baabasabira nukwo batunge Mwoyo Ahikiriire; 16habwokuba busaho n'omu omuli bo ow'akaba atungire Mwoyo ogu, kwihaho kubatizibwa kwonka omu ibara lya MUKAMA Yesu. 17Aho Petero na Yohaana baabataho emikono, baaheebwa Mwoyo Ahikiriire. 18Simooni obu yarozire baatunga Mwoyo Ahikiriire habw'abakwenda kubataho emikono, yabaha sente, 19naagamba ati: “Obusobozi obu na nyowe mubumpe, weena ou ndaatahoga emikono, atungege Mwoyo Ahikiriire.” 20Baitu Petero yamugarukamu ati: “Kabule nazo sente zaawe, iwe anyakutekeriize kugura ekisembo kya Ruhanga na sente! 21Ekintu kinu leka kukyetabamu, toinaho mugabo, habwokuba omutima gwawe tigusemiire omu maiso ga Ruhanga. 22Nahabweki zira ekibi kyawe, osabe MUKAMA akuganyire ekiteekerezo eki. 23Nyowe mmazire kwetegereza nkooku oijwire ihali kandi oboherwe ekibi.” 24Nandiki Simooni ati: “Munsabire hali MUKAMA, byona ebi mwagamba haleke kubaho na kimu ekyampikaho.” 25Abakwenda obu baamazire kuha obwakaiso n'okwegesa ekigambo kya Ruhanga, baagaruka Yerusaalemu nibarangirra Amakuru Amarungi omu byaro bingi eby'Abasamaliya. 26Malaika wa MUKAMA akagambira Filipo ati: “Imuka ogende, okwate omuhanda ogw'obukiizi bw'obulyo, ogw'irungu, ogurukuruga Yerusaalemu nigugenda Gaaza.” 27Yaimuka, yagenda. Omusaija wa Esiyopiya omukonwa, omuheereza wa Kandaake Omukamakati wa Esiyopiya, ow'akaba ali mukeeto w'ebintu bye byona, akaba aizire Yerusaalemu kuramya. 28Omu kasumi ako akaba naagaruka owaabu, aikaliire omu kigaali kye, kandi naasoma Ekitabu kya Isaaya omurangi. 29Mwoyo wa Ruhanga yagambira Filipo ati: “Irirra ekigaali eki, ogende nakyo.” 30Filipo yairuka, yamuhikaho, yamuhurra naasoma Ekitabu kya Isaaya omurangi, nukwo kumukaguza ati: “Ebi orukusoma ebi, noobyetegereza?” 31Oli yamugarukamu ati: “Ndabyetegereza nta, hataroho ansoboroliire?” Yasaba Filipo atembe omu kigaali kye, aikarre nawe. 32Ekicweka eky'omu Byahandiikirwe eki akaba naasoma nkinu: “Akaba nk'entaama erukutwarwa omu ibaagiro; rundi nk'akataama akali omumaiso g'omusazi w'ebyoya. Nawe nukwo atarayesamize kanwa ke. 33Akeebundaaza kandi tiyacwerwa omu mazima. Busaho n'omu alibaza ha baijukuru be, habwokuba omunsi obwomeezi bwe bukacwibwaho!” 34Nubwo omukonwa yakagwize Filipo ati: “Ninkusaba onsoborre: omurangi ogu, akabazaaho oha? Akeebazaaho wenka rundi akabazaaho omuntu ondi?” 35Filipo yabandiza ha kyahandiikirwe eki, yamusoborra Amakuru Amarungi aga Yesu. 36Obu bakaba nibakyagenda, baahika ha maizi agarukugera, omukonwa yagamba ati: “Dora amaizi nganu! Hati ekirukuntanga kubatizibwa kiraha?” [ 37Filipo yamugarukamu ati: “Obu oraaba noikiriza n'omutima gwawe gwona, nikisoboka.” Nandiki omukonwa ati: “Ninyikiriza Yesu Kristo nkooku ali Mwana wa Ruhanga.”] 38Yaragira kwemereza ekigaali, bombi baaragara omu maizi, Filipo yamubatiza. 39Obu baarugire omu maizi, Mwoyo wa MUKAMA yahwangura Filipo naamutwara handi, omukonwa tiyagaruka kumurora; yakwata omuhanda gwe yagenda n'omuhimbo. 40Filipo akaija kurora, yayesanga ali Azooto, yayongera orugendo rwe naaraba omu mbuga zoona naarangirra Amakuru Amarungi okuhika obu yataahire Kaisaariya.

will be added

X\