EBIKORWA 22

1“Bagenzi bange kandi bataata, muhurre ekigambo eki ndukwetonganirra omu maiso ganyu.” 2Obu baahuliire naabagambira omu Ruhebburaayo, baaculerra kimu cii. Paulo yagamba ati: 3“Nyowe ndi Muyudaaya, nzaarwa ya Taruso orwa Kilikiya, baitu nkakurra omu rubuga runu, naatendekwa omwegesa Gamalyeli okukuraatira engeso z'Ebiragiro by'abaisenkuru itwe, nayekambiraga ebya Ruhanga inywena nkooku murukukora hati. 4Nahiiganizaaga abantu abaahonderaga Omuhanda gunu, ntaireho n'okubaita, nimboha abasaija n'abakazi, nimbakwasa omu nkomo. 5Omukuru wa banyakatagara n'abakurasi boona ab'orukurato nubo bakaiso bange, habwokuba bakampa ebbaruha ez'okutwarra bagenzi baabo ab'omu rubuga Damasiko. Nkagendayo nkwate na bali abakaba baliyo, mbaleete Yerusaalemu baboherwe, nukwo bafubirwe. 6“Obu nkaba ninkyagenda, ndi haihi kuhika Damasiko, nk'omu ihangwe, ahonaaho ekyererezi eky'amaani kyaruga omwiguru, kyanyehinguliriza. 7Naagwa hansi, naahurra iraka niringambira liti: ‘Saulo, Saulo nompiiganiriza ki?’ 8Na nyowe naagarukamu nti: ‘Niiwe oha, Waitu?’ Lyangarukamu liti: ‘Ninyowe Yesu owa Nazareeti ou orukuhiiganiza.’ 9Abantu abakaba bali na nyowe bakarora ekyererezi eki, baitu batahurre iraka ly'ogu ow'arukubaza na nyowe. 10Naayongera naakaguza nti: ‘Nkole ki MUKAMA wange?’ Nawe yangarukamu ati: ‘Imuka, otaahe orubuga Damasiko. Nuho oraamanyisibwa eki oraakora.’ 11Obu naalemerwe kurora habw'okwangasana kw'ekyererezi eki, bagenzi bange nubwo baannanasire, bampikya Damasiko. 12“Omusaija arukwetwa Ananiya, omuntu ayayekambiraga ebya Ruhanga, naahikiriza Ebiragiro bya Musa kandi naasiimwa Abayudaaya boona abaikaraga Damasiko, 13yaija kundora. Yanyemerra ha rubaju, yangambira ati: ‘Mugenzi wange Saulo, iguka amaiso.’ Omu kasumi ako konyini amaiso gange gaiguka, naamurora. 14Yayongera yagamba ati: ‘Ruhanga ow'abaisenkuruitwe akukomere omanye ebi arukugonza, orole Omuhikiriire ogu Yesu, kandi ohurre iraka lye; 15habwokuba oliba kaiso we ha bantu boona, ow'okugumya ebi warozire n'ebi wahuliire. 16Hati otegeriize ki? Imuka, obatizibwe, oyogebweho ebibi byawe, oyamirre ibara lye.’ ” 17“Kiro kimu, obu namazire kugaruka Yerusaalemu, nkaba ninsaba omunju ya Ruhanga, ahonaaho nasisa nk'arukuroota. 18Narora MUKAMA nangambira ati: ‘Rahuka, oruge bwango Yerusaalemu, habwokuba abantu banu tibarukwija kwikiriza ebi orukumbazaaho.’ 19Na nyowe nagarukamu nti: ‘MUKAMA wange, bbo bonka bamanyire nkooku nagendaga omu buli isorrokaniro ninta omu nkomo abarukukwikiriza kandi nimbateera. 20Obu baaseesire esagama ya Sitefano, kaiso waawe, nkaba nyemeriireho nimpikirraniza n'abarukumwita, ndinzire ebijwaro byabo.’ 21Baitu MUKAMA yangambira ati: ‘Irooko ogende, ninyija kukutuma hara omu Banyamahanga.’ ” 22Abantu bakaikara bamutegiire amatu okuhika obu yagambire ebigambo ebi; nubwo baatokiire haiguru nibagamba bati: “Omuntu ogu mumwite aruge omu nsi! Tasemeriire kwikaraho!” 23Obu, bakaba nibatoka muno, nibanaga n'ebijwaro byabo, kandi nibamiisa ecuucu haiguru. 24Nukwo mukuru w'amahe kuragira bamutaahye omu kigo, bamukagulirize nibamuteera n'enkoba, nukwo amanye ebi barukumujunaana. 25Obu baamazire kumuboha ha nyomyo, Paulo yakaguza omukuru w'ekihanda ky'abaserikale ow'akaba ayemeriire haihi ati: “Omu Biragiro byanyu nimwikirizibwa kuteera enkoba omuntu anyakuli Omurooma kandi atakasingirwe musango?” 26Mukuru w'ekihanda ky'abaserikale obu yahuliire eki, yagenda hali mukuru w'amahe yamukaguza ati: “Omanyire eki orukukora? Omusaija onu Murooma.” 27Aho mukuru w'amahe yaija, yamukaguza ati: “Ngambira amazima, oli Murooma kwo?” Paulo yamugarukamu ati: “Ego.” 28Mukuru w'amahe yamugambira ati: “Nyowe Oburooma nkabugura omuhendo mukooto.” Nandiki Paulo ati: “Baitu nyowe nkazaarwakwo.” 29Ahonaaho abo abakaba nibagonza kumukaguliriza baamurugaho, kandi mukuru w'amahe obu yayetegeriize nkooku yabohere Omurooma, yatiina muno. 30Nyenkya obu bwakiire, habw'okwenda kumanya Abayudaaya ebi barukumujunaana, omukuru w'amahe yabohorra Paulo kandi yaragira abanyakatagara abakuru n'orukurato rwona kwesorooza. Yaleeta Paulo yamwemereza omumaiso gaabo.

will be added

X\