EBIKORWA 20

1Akajagarro obu kahoire, Paulo yayeta abaikiriza yabagambira eby'okubagumya, yabaraga, yarugayo yagenda Makedoni. 2Obu yamazire kuraba omu bicweka ebi, n'okubagambira bingi eby'okubagumya, yahika Bugiriiki. 3Oku yamarayo ameezi asatu, kandi obu akaba naayeteekaniza okugwerra omu meeri kugenda Siriya, Abayudaaya baayekoba omu nsita okumwita. Baitu uwe yacwamu kugaruka enyuma arabe Makedoni ha bwerre. 4Abaamusendekeriize kumuhikya Asiya nubo banu: Soopateri owa Beroya, mutabani wa Piiro; Arisitariko na Sekundo Abateesalonika; Gaayo owa Derube na Timoteho, hamu na Tikiko na Turofimo abantu ba Asiya. 5Abo boona bakatwebembera, baatulindirirra Turoyi. 6Ebiro bikuru eby'Emigaati Etatumbisiibwe obu byamazire kuhwaho, na itwe twaruga Filipi tuli omu meeri. Emeeri egi twagimaramu ebiro bitaano, kandi bbo twabasanga Turoyi nambere twamazire ebiro musanju. 7Ha kiro eky'okubanza omu wiiki, obu twayesoroize kulya hamu omugaati; Paulo, ow'akaba ali w'okurugayo nyenkya, yatandika kubaza nabo. Yaikaraho muno nayegesa okuhika omu itumbi. 8Omu kisiika ekya haiguru nambere tukaba twesorooliize, hakaba nihaakiramu etaara nyingi. 9Paulo obu yaikaire naabaza muno, omusigazi arukwetwa Eyutiko, ow'akaba aikaliire omu idirisa, yakwatwa oturo twingi, twamulemesa, yahanuuka omu kainaasatu, yagwa hansi. Baamwihaho afiire. 10Paulo yasirimuka, yamwinamaho, yamubumbaatira naagamba ati: “Muleke kutiina, akyayomiire.” 11Nukwo Paulo kugaruka omu kainaasatu, kandi obu yamazire kucwamu omugaati n'okulya, yayongera kubaza nabo omwanya mukooto okuhikya omu rukyakya nambere yabarugireho. 12Omusigazi ogu bamutwara omuka ayomiire, emitima yabagwa omunda. 13Itwe tukagwerra omu meeri, twayeyongera omumaiso, twahika Aso nambere twanihiire kugwerereza Paulo ow'akaba ategekere kuraba ha bwerre. 14Obu yatuhikireho tuli Aso, twamuta omu meeri, twairrayo twahika Mitileene. 15Obwire obu bwakiire, twarugayo tuli omu meeri, twarabaho ekizinga Kiiyo. Ha kiro kya kasatu ky'orugendo twahika Saamo, kandi ha kiro kya kana twahika Mileeto. 16Paulo wenka akaba acwiremu kutaraba Efeeso, nukwo aleke kukerererwa Asiya; habwokuba akaba naarahukiriza, obu kiraaba nikisoboka, ekiro kikuru kya Pentikooti kimusange Yerusaalemu. 17Obu akaba ali Mileeto, Paulo yatuma Efeeso kumweterayo abakuru ab'ekitebe ky'abaikiriza. 18Obu baamuhikireho, yabagambira ati: “Nimumanya omulingo nabaikaramuga obutoosa, okuruga ha kiro eki naahikiireho omu Asiya. 19Nimumanya nkooku nkaba nimpeereza MUKAMA n'okwebundaaza kwona, kandi nimumanya emihito n'obusaasi ebyangweriire habw'obucwangya bw'Abayudaaya. 20Baitu tinkalekiire kubarangirra n'okubeegesa ekigambo kyona ekiraabagasira, ninkigamba omu rwanjale rw'abantu rundi omu maka ganyu, 21ninteererra Abayudaaya n'Abagiriiki kuhindukira Ruhanga n'okwikiriza MUKAMA waitu Yesu Kristo. 22Hati nimurora nkooku ndukuhambirizibwa Mwoyo Ahikiriire kugenda Yerusaalemu ntarukumanya ebirangwera obu ndaahikayo; 23kyonka omu buli rubuga oru ndabiremu, Mwoyo Ahikiriire nuwe ammanyisa nkooku ndi w'okukwatwa omu nkomo n'okubonabonesibwa. 24Baitu obwomeezi bwange tindukubweta bw'omugaso rundi bw'omuhendo hali nyowe. Eki ndukugonza nukwo kumaliiriza orugendo rwange n'okuhikiriza obuheereza obu nahairwe MUKAMA Yesu, nukwo okurangirra Amakuru Amarungi ag'embabazi za Ruhanga. 25“Hati nimmanya nkooku hataroho n'omu omuli inywe aba nahikireho nindangirra obukama bwa Ruhanga ow'aligaruka kundora. 26Nahabweki hati nimbamanyisa nkooku ntarukujunaanwa obwomeezi bw'omuntu weena omuli inywe ow'aligwa, 27habwokuba nkabooleka entegeka yoona eya Ruhanga ntarukutiina. 28Hati nu mwerinde inywenka, kandi mulinde n'igana lyona Mwoyo Ahikiriire eri yabakwasize kurolerra, muliise ekitebe kya MUKAMA. Ekitebe eki yacungwize esagama ye. 29Nimmanya ngu, obu ndaamara kubarugaho, emyaaga emikatuzi niija kubataahirra, kandi igana eri terukwija kuligirra mbabazi. 30Nangwa n'omuli inywe halirugamu abantu abarukwegesa eby'okuhabisa abaikiriza, nukwo beetungire bati ab'okubahondera. 31Nahabweki mwikale nimurora kandi mwijuke nkooku namazire na inywe emyaka esatu ntarukwosa kiro na nyamusana kuteererra buli omu, nindira. 32Hati nu, nimbakwasa Ruhanga n'enyegesa ey'embabazi ze. Enyegesa enyakusobora kubagumya n'okubatungisa obugwetwa omuli abo abeeziibwe. 33Tinkasabaga muntu n'omu kumpa feeza rundi ezaabbu, noobu kyakuba ekyokujwara. 34Inywena nimumanya emikono yange nkooku niyo yantungisaaga byona ebi naayetagaaga, hamu n'abo aba nkaba nyinabo. 35Ebi byona nkabikora kubooleka nkooku musemeriire kwehayo nukwo mukonyere enceke, nimwijuka ebigambo MUKAMA Yesu ebi yagambire ati: ‘Okugaba kwina omugisa okukira okuheebwa!’” 36Obu yamazire kugamba ebi, Paulo yateeza amaju hamu nabo boona, baasaba. 37Obu, boona bakaba nibarra, Paulo bamugwa omu kifuba nibamunywegera. 38Ekyakizire muno kubasaaliza nikyo ekigambo eki yabaragisize ngu, tibaligaruka kumurora. Baamusendekereza, baamuhikya ha meeri.

will be added

X\