EBIKORWA 19

1Apolo obu akaba akyali Korinto, Paulo akakwata omuhanda ogw' obwerre, yahika Efeeso nambere yasangire abaikiriza abamu. 2Yabakaguza ati; “Mukaheebwa Mwoyo Ahikiriire obu mwaikiriize?” Baamugarukamu bati: “Nangwa, n'okuhurra titukahurrahoga nkooku haroho Mwoyo Ahikiriire.” 3Yayongera yabakaguza ati: “Mukabatizibwa muta?” Baamugarukamu bati: “Tukabatizibwa omu kubatiza okwa Yohaana.” 4Nandiki Paulo ati: “Yohaana akabatiza n'okubatiza kw'okwegarukamu, naateererra abantu kwikiriza ogu ow'akaba ali ow'okumwija enyuma, nuwe Yesu.” 5Obu baahuliire eki, baabatizibwa omu ibara lya MUKAMA Yesu, 6kandi Paulo obu yamazire kubataho emikono, Mwoyo Ahikiriire yabaijaho, baatandika kubaza endimi n'okuranga ebya Ruhanga. 7Abo boona bakaba bali nka ikumi na babiri. 8Paulo akataaha omu isorrokaniro ly'Abayudaaya, yabalizamu n'obumanzi kandi yahakaniramu n'amagezi okubaikirizisa eby'obukama bwa Ruhanga. Yamara ameezi asatu naakora ati, 9okuhika abamu obu bakadadaire, bayanga kwikiriza, nibajuma Omuhanda gwa MUKAMA omumaiso ga boona. Nubwo Paulo yabarugireho, yatwara abaikiriize, kandi buli kiro baikaraga nibahanurra omu kisiika ky'okubalizaamu eky'omusaija arukwetwa Tiraano. 10Paulo yaikara naakora ati kumara emyaka ebiri. Ekyarugiremu nukwo abantu boona abaikaraga Asiya: Abayudaaya n'Abagiriiki, kuhurra ekigambo kya Mukama. 11Emikono ya Paulo, Ruhanga akagikozesa ebyamahano ebitakabonwaga. 12Abantu bakaba nibatwara ebitambara n'engoye ebi yakwasireho babikwasaho abarwaire, bakira endwara zaabo, n'emyoyo emibi yabarugaho. 13Abayudaaya abamu, enjeezijeezi, abaagendaga nibabinga emyoyo emibi, nubwo baalengereho kugibinga hali abo abakaba bainayo, nibaatura ibara lya MUKAMA Yesu, nibagamba bati: “Ninkuragirra omuli Yesu, Paulo ou arangirra.” 14Omuli abo abaakikozire hakaba harumu abasigazi musanju, batabani b'Omuyudaaya Sikewa, nyakatagara mukuru. 15Baitu omwoyo omubi gwabagarukamu guti: “Yesu mmumanyire, na Paulo mmumanyire; baitu inywe, niinywe baha?” 16Omusaija ow'akaba aroho omwoyo omubi yabagurukira, yabakiza amaani, yabasingura. Baaruga omunju egi bali busa kandi bahutaire muno. 17Abantu boona abaikaraga Efeeso, Abayudaaya n'Abagiriiki, obu baakihuliire baatiina muno kandi baanyumiza MUKAMA Yesu. 18Baingi omuli abo abaikiriize, bakaija baayegarukamu nibaatura ebibi ebi baakozire. 19Kandi baingi omuli abo abakaba nibakora eby'obufumu, bakasorooza hamu ebitabu byabo, baabyokeza omumaiso g'abantu. Obu babaliriire omuhendo gw'ebitabu ebi, baasanga niguhika ebicweka by'efeeza emitwaro etaano. 20Ekigambo kya MUKAMA kyayeyongera kuraranga muno kandi kyasingurra kimu. 21Ebi byona obu byahoire, Paulo yacwamu kugaruka Yerusaalemu, naaraba Makedoni na Akaaya naagira ati: “Obu ndikamara kuhikayo, ninyija kugenda na Rooma.” 22Nukwo yatuma ati babiri ha bakonyezi be, Timoteho na Erasito, bamwebembere kuhika Makedoni, uwe akyasigaire Asiya kumara ebiro bike. 23Omu kasumi ako, hakaba haroho okwimukirra kwingi habw'Omuhanda gwa MUKAMA. 24Habwokuba omusaija arukwetwa Demetiriyo, omuheesi w'eby'efeeza, ayaheesaga ebisisani by'ekirorro ky'embandwa enkazi Atemisi, yahaga abaheesi baingi omulimo. 25Abo boona akabasorooza, hamu n'abandi abaakoraga omulimo ogu, yabagambira ati: “Basaija inywe, mumanyire omulimo gunu nkooku nugwo gubaire nigututungisa. 26Hati mumazire kurora n'okuhurra, tihali Efeeso honka, baitu kutagirwa n'omu Asiya yoona, omusaija ogu Paulo nkooku asoonasoonere abantu baingi yabahindura, naagamba ngu, baruhanga abakozirwe engaro tibali baruhanga naakake. 27Hati nu akabi kaija, tiharukwija kugaywa mulimo gwaitu gwonka, baitu n'ekirorro ky'embandwa enkuru Atemisi nikiija kudiba; kandi omucwezikati ogu arukuramibwa ab'omu Asiya n'ahandi hoona omunsi, naija kwihwaho ekitiinisa kye.” 28Obu baahuliire eki, baakwatwa ekiniga kingi, baatandika kutoka muno nibagamba bati: “Atemisi ow'Abeefeso nuwe ruranganwa!” 29Orubuga rwona rwaijwamu akambayaya, abantu bajumbutukira hamu, baagenda omu kizaaniro ky'orubuga nibacunda Abamakedoni babiri Gaayo na Arisitariko, abasaija abaagendaga na Paulo omu ngendo ze. 30Paulo nawe yagonza kugenda omu kitebe eki eky'abantu babataisule, baitu abaikiriza baamutanga; 31kandi abamu ha banyoro abakuru aba Asiya, abakaba bali banywani be, baamutumaho, nibamwesengereza aleke kugenda omu kizaaniro eki akeenaga omu kabi. 32Omu kasumi ako buli omu akaba naatoka okwe; habwokuba bakaba batabatabukire, kandi abarukukira obwingi omuli bo batamanye eki bayesorooliize. 33Abayudaaya baacumiriza Alekizanda omumaiso ga boona. Abamu ab'omu kitebe nukwo kuteekereza ngu, nuwe arukujunaanwa. Alekizanda yabaculeeza n'omukono gwe, nukwo ayetonganirre. 34Baitu obu baayetegeriize nkooku ali Muyudaaya, boona baatokera hamu nibagamba bati: “Atemisi ow'Abeefeso nuwe ruranganwa!” Baakora bati okumara esaaha ibiri. 35Omukuru w'orubuga obu yamazire kuculeeza abantu yabagambira ati: “Inywe abasaija ba Efeeso, nooha atamanyire orubuga rwa Efeeso nkooku nurwo rulinda iramizo lya Atemisi ruranganwa, rulinda n'ekisisani kye ekyarugire omu iguru? 36Hati nu, nkooku hataroho muntu asobora kubihakaniza, nimusemerra kuculeera, mutakora kantu na kamu nimurahukiriza. 37Habwokuba abasaija banu aba muleesire hanu, tibasiisire eby'omu birorro byanyu kandi tibajumire mucwezikati waitu. 38Demetiriyo n'abaheesi bagenzi be obu baraaba baina eki barukunyegererra omuntu weena, ekooti ez'okucweramu emisango iroho, n'abalemi baroho; nuho bagende banyegerrangane. 39Baitu obu muraaba mwina ekindi eki murukwenda, kiraacwerwa omu rukurato rwaitu orwa butoosa. 40Habwokuba na itwe tuli omu kabi k'okunyegererwa habw'okuleeta akajagarro ak'ekiro kinu, kandi tiharoho bulyo bwona obu tusobora kutongana obw'okunanura ekireesire akajagarro kanu.” 41Obu yamazire kugamba eki, yaraga ekitebe.

will be added

X\