EBIKORWA 17

1Paulo na Siraasi obu baamazire kuraba Anfiipoli na Apolooniya, baahika Teesalonika nambere Abayudaaya bakaba baina isorrokaniro. 2Paulo yataahamu, yatandika kubaza nabo, engeso ye nkooku ekaba eri. Yamara wiiki isatu naabahakaniza naajurra Ebihandiiko ebirukwera, 3naasoborra kandi naagumya Kristo nkooku akaba ali w'okubonabonesibwa n'okuhumbuuka omu bafu, naagamba ati: “Yesu onu ou ndukubarangirra, nuwe Kristo.” 4Abamu omuli bo baasikirizibwa ebi baahuliire, baayeteeraniza na Paulo na Siraasi. Kandi n'Abagiriiki baingi abaatiinaga Ruhanga bakeeteraniza nabo, hamu n'abakazi ab'ekitiinisa baingi. 5Baitu Abayudaaya baakwatwa ihali, nukwo kusorooza abasaija ababi abaikaraga nibenjeera, baimukiiriza ekitebe kikooto ky'abantu, baacwa epuumpu omu rubuga. Baataaha enju ya Yasooni, nibanihira kuturukya Paulo na Siraasi babahikye nambere abantu baayesoroliize. 6Obu baababuzire, baacunda Yasooni n'abamu ha bagenzi baitu, baabahikya omumaiso g'abalemi b'orubuga nibatoka bati: “Abasaija bali abaajumikire ensi, baizire na hanu. 7Yasooni nuwe abaraize; kandi banu boona nibakora ebintu ebirukuhakaniza ebiragiro bya Kaisaali, nibagira ngu, haroho omukama ondi arukwetwa Yesu.” 8Abanyarubuga n'abalemi barwo obu baabihuliire, baatandika kutuntura. 9Yasooni na bagenzi be bakabanza kubaihaho omusimbo batakabalekiire. 10Ekiro eki kyonyini ab'oruganda baacwisa Paulo na Siraasi, baakwata ogwa Beroya. Obu baahikireyo, baataaha omu isorrokaniro ly'Abayudaaya. 11Abayudaaya baayo bakaba batali bantu abagumangana nk'aba Teesalonika. Bbo bakarahuka kwikiriza ekigambo kya Ruhanga n'omutima gumu, nibasoma buli kiro Ebihandiiko Ebirukwera, barole ebigambo binu obu biraaba biri by'amazima. 12Nahabweki Abayudaaya baingi omuli bo bakaikiriza, hamu n'abakazi Abagiriiki baingi, abantu b'ekitiinisa, oteho n'abasaija. 13Baitu Abayudaaya ba Teesalonika obu baahuliire Paulo nkooku arangiriire ekigambo kya Ruhanga omu Beroya, nukwo kwijayo, baatamu abantu epuumpu, baabaimukiriza. 14Ahonaaho ab'oruganda baacwisa Paulo, atwarwe ogw'enyanja; baitu Siraasi na Timoteho baasigarayo. 15Abo abaasendekeriize Paulo, bakamuhikya Ateena. Obu yamazire kubaha obukwenda obw'okugambira Siraasi na Timoteho barahuke bamusangeyo, bbo baakwata omuhanda, baagarukayo. 16Paulo obu akaba akyabategeriize Ateena, omutima gwamusarra muno habw'okurora orubuga oru rwijwire ebisisani by'abacwezi barwo. 17Buli kiro omu isorrokaniro yahakanizaaga Abayudaaya n'abanyamahanga abaatiinaga Ruhanga hamu na'bantu abandi aba yasangaga omu katale. 18Kandi abanyamagezi abamu ab'ekitebe ky'Omugiriiki Epikuliyo n'ab'ekitebe ekindi ky'entabiganya nabo baamuhakaniza. Abamu baakaguza bati: “Hati enjaaliimi egi neegamba ki?” Abandi baagarukamu bati: “Nasisana arukwegesa baruhanga aba tutamanyire” habwokuba akaba naayegesa hali Yesu na ha kuhumbuuka. 19Nukwo kumweta agende nabo, baamuhikya omu rukurato orurukwetwa Arehopago, baatandika kumukaguza bati: “Enyegesa enu empyaka, torukwija kutusoborra amakuru gaayo? 20Habwokuba ebimu ebi otugambiire bituhuniriize. Nahabweki nitwenda kumanya amakuru gaabyo.” 21Abantu boona b'Ateena n'abanyamahanga abakaba baliyo, bakaba bataina kindi eki baakoraga kwihaho kubaza n'okuhurra ebintu byona ebihyaka. 22Paulo yayemerra omumaiso g'orukurato orwa Arehopago yatandika okubasoborra ati: “Inywe abasaija ba Ateena, mmazire kwetegereza nkooku muli bantu abarukutaho muno omutima ha diini mu buli kintu. 23Habwokuba nambere nkarabire hoona, nsangire ebintu ebi murukuramya, kandi naasanga itambiro erimu erihandiikirweho liti: ‘Itambiro lya ruhanga atarukumanywa.’ Ningira ogu ou murukuramya mutamanyire, nuwe Ruhanga, nyowe ou ndukubarangirra. 24“Ruhanga ayahangire ensi na byona ebirumu nkooku ali MUKAMA w'iguru n'ensi, taikara mu maramizo agombekerwe abantu, 25kandi takonyerwa bantu nk'anyakwina eki abuzirwe, habwokuba nuwe wenka aha boona obwomeezi, n'okwikya orwoya, na buli kintu kyona. 26Akahanga enganda zoona eza bantu, nabaiha omu muntu omu, yabaha ensi yoona bagiikalemu, amazire kutaho obusumi bw'emyaka baraamara, yataho n'emitaano nambere enganda ziraagarukiraga, 27nukwo abantu baserre Ruhanga nibamanya nkooku basobora kumuzorra mu kuhamanga. Mazimakwo buli omu omuli itwe tamuli hara, 28habwokuba kikahandiikwa kiti: ‘Omuli Uwe nuho tutunga obwomeezi, nuwe tugenderamu kandi nuwe atuha kubaho.’ Kandi abaisenkuru inywe abaabacweriire enfumo bakagamba bati: ‘Na itwe tuli baana be mali.’ 29Itwe nkooku tuli baana ba Ruhanga, tuleke kugira ngu, Ruhanga nasisana ekisisani ekyakozirwe amagezi g'abantu ekyaihirwe omu zaabbu, rundi efeeza, rundi amabaale agaasarwirwe. 30Ebiro ebi mwamazire omu butamanya, Ruhanga atabiteho mutima; baitu hati naaragira abantu boona, hoona nambere bali, beegarukemu, 31habwokuba akataho ekiro nambere ensi yoona ericwerwaho omusango omu mazima, nigucwibwa omuntu ou yataireho, kandi eki akakyoleka abantu boona obu yamuhumbwire omu bafu.” 32Obu baahuliire ha by'okuhumbuuka kw'abafu, abamu baayesekera; baitu abandi baagamba bati: “Ekigambo eki nitwenda kukihurra kiro kindi.” 33Nubwo Paulo yabarugiremu. 34Baitu habaho abasaija abamu abaamugumiireho baafooka abaikiriza. Omuli bo hakaba harumu Diyonisiyo, omukurasi ow'orukurato orwa Arehopago n'omukazi arukwetwa Damali, hamu n'abantu abandi.

will be added

X\