EBIKORWA 16

1Paulo obu yarugire Kilikiya, yahika Derube na Lisitura. Oku hakaba haliyo omwegesebwa omu, ibara lye Timoteo, mutabani w'omukazi Omuyudaaya ow'akaba aikiriize ira; baitu ise akaba ali Mugiriiki. 2Ab'oruganda ba Lisitura na Ikoniyo baasiimaga muno Timoteho. 3Paulo akagonza Timoteho kugenda nawe; nahabweki yamusara. Eki akakikora habwokuba Abayudaaya abakaba bali omu biikaro ebi, baamanyaga ise Timoteho nkooku ali Mugiriiki. 4Obu bakaba nibaraba omu mbuga ezi, baasoborraga abantu ebiragiro ebyatairweho abakwenda n'abakuru abakaba bali Yerusaalemu, baabateererra kwikara nibabihikiriza. 5Eki kyaleetera ebitebe by'abaikiriza kwongera kugumira omu kwikiriza, kandi abantu abaikiriize kyabaleetera kukanya buli kiro. 6Bakaraba omu nsi ya Firigiya na Galatiya, Mwoyo Ahikiriire amazire kubatanga kurangirra ekigambo omu Asiya. 7Obu baahikire ha mutaano gwa Misiya, baayenda kweyongera kuhika Bitiniya, baitu Mwoyo wa Yesu tiyabaikiriza; 8nukwo kuraba Misiya, baahika Troa. 9Ekiro eki Paulo yabonekerwa, yarora omusaija owa Makedoni ayemeriire aho naamwesengereza ati: “Yambuka enyanja, oije Makedoni, otukonyere.” 10Obu yarugire kubonekerwa, ahonaaho twayeteekaniza kwambuka kugenda Makedoni, nitugumiza kimu Ruhanga nkooku atwesire okubarangirra Amakuru Amarungi. 11Okuruga Troa twagwerra omu meeri, twayambuka, twahika Samoterake; kandi ha kiro ekyakurasireho twahika Neapoli. 12Obu twarugayo, twahika Filipi, orubuga orukuru rwa Makedoni, orukaba rutembwirwe Abarooma. Omu rubuga oru tukamaramu ebiro bike; 13ha kiro kya Sabbato twaruga omu rubuga nituraba omu irembo lyarwo, twahika ha rubaju rw'ekisaaru nambere twanihiire kusanga abarukusaba. Twaikarra hansi, twabaliza abakazi abakaba beesoroizeho. 14Omuli abo abaatuhuliire hakaba harumu omu arukwetwa Lidiya, omukazi ayarugire omu rubuga rwa Tyatiiro, omusuubuzi w'engoye eza kahuukya, kandi omuntu ayayekambaga kuramya Ruhanga. Obu yahuliire Paulo ebi yayegeseze, MUKAMA yakingura omutima gwe, abiikirize. 15Uwe n'ab'omu ka ye boona obu baamazire kubatizibwa, nubwo yatwesengeriize naagamba ati: “Obu muraaba munanukire nkooku ndukwikiriza kwo MUKAMA, mwije muraale owange.” Yatuhambiriza. 16Ekiro kimu obu tukaba nitugenda omu kiikaro ky'okusabiramu, twatangaana omuzaana ow'akaba atemberwe omwoyo ogw'okuragura, kandi ayatungisaaga muno bakama be omu kuragura. 17Omuzaana ogu yatandika kuhondera Paulo hamu na itwe, naayamuza ati: “Abasaija banu, baheereza ba Ruhanga anyakuli haiguru muno, baizire kubarangirra nkooku muraajunwa.” 18Akaikara naakora ati buli kiro okuhika Paulo obu yabiihiirwe, yahinduka yacoomera omwoyo ogu ati: “Ninkuragira omu ibara lya Yesu Kristo, murugeho.” Gwamurugaho omu kasumi ako konyini. 19Bakama be obu baarozire nkooku hatakyaroho okunihira kwona okw'okumutungamu amagoba, baakwata Paulo na Siraasi, baabacunda, baabatwara booma omumaiso g'abalemi. 20Obu baabahikize hali abacwi b'emisango, baagamba bati: “Abasaija banu Bayudaaya, nibatalibaniza muno orubuga rwaitu, 21nibeegesa engeso ezitarukwikirizibwa ebiragiro byaitu, itwe Abarooma.” 22Ekitebe ky'abantu nakyo kyayetaba n'abakama b'omwisiki omu kubaimukirra, nukwo abacwi b'emisango kuragira babajuule n'amaani kandi babateere emiigo. 23Obu baamazire kubateera emiigo nyingi, baabata omu nkomo, baaragira mukuru waayo kubalinda obutengyambone. 24Obu yamazire kuragirwa ati, yabata omu kisiika ekya ha kaifo, kandi amaguru gaabo yagata mu nkomo z'ebiti. 25Ekiro eki omu itumbi, Paulo na Siraasi bakaba nibasaba kandi nibazina eby'okukugiza Ruhanga, n'abanyankomo abandi bakaba nibabahuliriza. 26Omu kasumi ako haabaho omusisa gw'amaani, emisingi y'enkomo yatengesebwa, enyigi zoona zaakinguka, kandi empingo ezikaba zibabohere zaasumurruka. 27Omukuru w'enkomo obu yajumbutukire omu turo, yasanga enyigi zikingukire, nukwo kusomora empirima ye naayeteekaniza okweyita, naagira ngu, abanyankomo bacwire. 28Baitu Paulo yamweta n'iraka likooto ati: “Oteekora akabi, habwokuba itwena turoho.” 29Omukuru w'enkomo yatuma bamuleetere etaara, yataaha omu nkomo, yagwa omumaiso ga Paulo na Siraasi naatukumira. 30Yabaturukya aheeru, naagamba ati: “Bakama bange, nyowe nkole ki okujunwa?” 31Baamugarukamu bati: “Ikiriza MUKAMA Yesu, nubwo oraajunwa, iwe n'eka yaawe.” 32Uwe hamu na boona abakaba bali omuka ye, Paulo na Siraasi baatandika kubeegesa ekigambo kya MUKAMA. 33Ha saha egi yonyini yabatwara kuboogya ebihuta byabo; nubwo yabatiziibwe hamu n'ab'omuka ye boona. 34Kandi obu yabahikize owe, yabaha ebyokulya. Omukuru w'enkomo n'ab'omu ka ye boona baasemererwa muno habw'okwikiriza Ruhanga. 35Obwire obu bwakiire, abacwi b'emisango baaragira abakuru b'abalinzi nibagamba bati: “Abasaija abo balekere, bagende.” 36Omukuru w'enkomo nukwo kubigambira Paulo ati: “Abacwi b'emisango bantumireho, nibandagira kubalekera; hati muturuke, mugende n'obusinge.” 37Baitu Paulo yamugarukamu ati: “Mara itwe enzaarwa za Rooma batutiire abantu boona nibarora, kandi kunu tutacweriirwe musango gwona, baatuta n'omu nkomo. Obu si nibenda kutwihamu omu nsereko? Nangwa! Bbo bonka leka baije batwihemu.” 38Abalinzi b'enkomo, ebigambo ebi baabigambira abacwi b'emisango. Nabo obu baahuliire banu nkooku bali nzaarwa za Rooma, baatandika kutiina; 39baija babetondera. Babaiha omu nkomo kandi babeesengereza baruge omu rubuga rwabo. 40Paulo na Siraasi nukwo kuruga omu nkomo, baagenda mba Lidiya nambere baasangire ab'oruganda. Obu baamazire kubahuumuza, baarugayo, baagenda.

will be added

X\