EBIKORWA 15

1Omu kasumi ako hakaijaho abantu abamu abaarugire Buyudaaya, baayegesa abaikiriza bati: “Kakuba mutasarwa, Ekiragiro kya Musa nkooku kirukuragira, timusobora kujunwa.” 2Paulo na Baranaba bakabanza kuteera muno empaka n'abantu abo, okuhika bbo hamu n'abandi obu baakomerwe kugenda Yerusaalemu kuhanuura ekigambo eki hamu n'abakwenda n'abakuru abandi. 3Ekitebe kyona ky'abaikiriza kyabaraga. Kandi obu bakaba nibaraba Foinike na Samaliya, baagambira abaikiriza baayo Abanyamahanga nkooku baahindukire. Amakuru ago gakakyanganura muno ab'oruganda boona. 4Obu baahikire Yerusaalemu, baatangirirwa ab'ekitebe ky'abaikiriza, hamu n'abakwenda n'abakuru abandi, baabamanyisa byona Ruhanga ebi yabakoleze. 5Baitu abamu ab'omu kitebe ky'Abafalisaayo abakaba baikiriize, baatandika kuhakana nibagamba bati: “Abanyamahanga basemeriire kusarwa n'okwegesibwa kukuratira Ebiragiro bya Musa.” 6Abakwenda n'abakuru bakeesorooza hamu kwetegereza ekigambo eki. 7Obu baamazire omwanya mukooto nibahanuura, Petero yaimuka, yabagambira ati: “Bagenzi bange, nimumanya kurungi nkooku omu biro bya ira, nyowe kalimi kagamba, Ruhanga yankomere omuli inywe nukwo ndangirre Abanyamahanga enyegesa y'Amakuru Amarungi, bagihurre kandi baikirize. 8Ruhanga, arukumanya emitima y'abantu, akabagumya, yabaha Mwoyo Ahikiriire nkooku yamutuhaire ira; 9kandi atatwahukanizeemu nabo, baitu akeeza emitima yabu habw'okwikiriza oku bainakwo. 10Hati Ruhanga nimumwoheza ki nimuta ekikoligo omu bikya by'abeegesebwa, ekikoligo baisenkuru itwe eki batarasoboire kuhimba noobwakuba itwe? 11Baitu hati nitwesiga nkooku tulijunwa habw'embabazi za MUKAMA Yesu nk'abo oku balijunwa embabazi ze.” 12Orukurato rwona rwaikara niruculeera, baahuliriza Baranaba na Paulo nibabasoborra ebihuniriza n'ebyamahano Ruhanga ebi yabakoleze omu Banyamahanga. 13Bbo obu baamazire kusoborra ebyabo, Yakobbo yatandika kubaza ati: “Bagenzi bange, mumpulirize. 14Simyoni arugire kutusoborra Ruhanga nkooku yabandize kuta omutima ha Banyamahanga n'okukoma abamu omuli bo abafoole bantu be. 15Kandi eki nikiikirraniza n'ekyahandiikirwe abarangi kiti: 16‘Ebiro ebi obu birihwa, ndigaruka nyombeke buhyaka enju ya Daudi eyagwire; nyombeke buhyaka ebikambuuro byayo, ngyemereze, 17nubwo abantu abandi, hamu n'Abanyamahanga boona abarukwetwa habw'ibara lyange baligaruka kuserra MUKAMA. 18MUKAMA ayatumanyisize ebintu ebi kuruga ira lyona, nukwo arukugamba ati.’ 19Nahabweki eki ncwiremu nikyo kinu: Itwe titusemeriire kutalibaniza abarukuruga omu Banyamahanga nibahindukira Ruhanga, 20baitu kitusemeriire kubahandiikira nitubahabura beetantale ekintu kyona ekihongirwe abacwezi, beetantale obusiihani n'okulya ebisoro ebimyoirwe rundi enyama enyakurumu esagama. 21Okuruga ira na ira omu buli rubuga habaho abantu abarukwegesa Ebyahandiikirwe Musa, habwokuba bisomwa buli Sabbato mu masorrokaniro gaabu.” 22Nubwo abakwenda hamu n'abantu bakuru baacwiremu kukoma abamu omuli bo ab'okutuma Antyokiya bagende na Paulo na Baranaba. Ekitebe kyona ky'abaikiriza kyakisiima. Baakoma Yuda arukwetwa Barsaba na Siraasi. Nubo bantu abali beebembezi omu bagenzi baabo. 23Baabakwasa ebbaruha erukugamba eti: “Bagenzi baitu, itwe abakwenda hamu n'abantu abakuru, tubahandiikire inywe ab'oruganda, Abanyamahanga abali Antyokiya na Siriya na Kilikiya, nitubaramukya. 24Obu twahuliire nkooku haroho abamu abaarugire omuli itwe hanu abaabatalibaniize n'ebigambo byabo, baatabangura emitima yanyu, kandi kunu tutabaragiire, 25tukeesorooza, twacwamu kukoma abasaija n'okubabatumira, hamu n'abagonzibwa Baranaba na Paulo, 26abasaija abaayefubiire habwa MUKAMA waitu Yesu Kristo. 27Nahabweki twabatumira Yuda na Siraasi. Bbo bonka baraabasoborra nibagumya ebi tuhandiikire omu bbaruha egi. 28Kwali kucwamu kwa Mwoyo Ahikiriire na itwe kutabatweka omutumba mukooto kukira binu byonka ebirukwetaagwa: 29musemeriire kwetantara ebihongiirwe abacwezi, n'enyama enyakurumu esagama rundi enyama y'ebisoro ebimyoirwe, hamu n'obusiihani. Obu muraayerindaga ebi, muliba mukozire kurungi. Mugoroobe.” 30Abaatumirwe obu baamazire kuraga abantu ba Yerusaalemu, baimukya orugendo baagenda Antyokiya. Obu baahikireyo, baatandika kweta ab'ekitebe, baabakwasa ebbaruha. 31Kandi bbo, obu baagisomere, baasemererwa muno habw'ebigambo ebirukuhuumuza ebi baagisangiremu. 32Yuda na Siraasi abakaba bali barangi, bakeekambisa ab'oruganda boona babagambira ebigambo bingi eby'okubagumya. 33Obu bakaba baamazireyo ebiro, ab'oruganda baabaraga n'obusinge, baagarukayo Yerusaalemu hali abo abaabatumire. [ 34Baitu Siraasi akagonza asigaleyo.] 35Paulo na Baranaba bakaikara Antyokiya hamu n'abaikiriza abandi baingi, nibeegesa kandi nibarangirra abantu ekigambo kya MUKAMA. 36Obu haahingwireho ebiro, Paulo akagambira Baranaba ati: “Ija tugarukeyo, tusuule bagenzi baitu ab'omu mbuga zoona nambere twarangiriire ekigambo kya MUKAMA, turole nkooku bali.” 37Baranaba akaba naayenda kutwara Yohaana arukwetwa Mariko; 38baitu Paulo tiyagonza kugenda n'omuntu ayabaahukaineho Panfiliya, atarasoboire kumaliriza nabo omulimo. 39Hakabaho empaka nyingi. Ekyarugiremu bayaahukana: Baranaba yatwara Mariko, baagwerra omu meeri, baagenda Kipuro, 40baitu Paulo yakoma Siraasi, yagenda nawe. Ab'oruganda boona bamugondeza emigisa ya MUKAMA. 41Paulo yaraba Siriya na Kilikiya naagumya ebitebe by'abaikiriza.

will be added

X\