EBIKORWA 11

1Abakwenda n'ab'oruganda abakaba bali Buyudaaya bakahurra nkooku Abanyamahanga nabo baikiriize ekigambo kya Ruhanga. 2Kandi Petero obu yagarukire Yerusaalemu, ab'omu kitebe ky'abasazirwe baamujunaana, 3nibamukaguza bati: “Kiki ekyakutwaire omu bantu abatasazirwe kandi walya nabo?” 4Petero yatandika kubasoborra byona nkooku byagenzire naagamba ati: 5“Kiro kimu obu nkaba ndi omu rubuga Yoppa ninsaba, nubwo nabonekiirwe, narora ekintu ekirukusisa esuuka enkooto nikisirimuka hansi kikwasirwe ha nsonda ina, kyampikaho. 6Obu nakyetegeriize, narora harumu ebisoro by'emiringo yoona, n'enyamaiswa, n'ebirukwekurra, hamu n'enyonyi z'omu mwanya. 7Kandi nahurra iraka niringambira liti: ‘Petero imuka; obiite olye.’ 8Nyowe nagarukamu nti: ‘Nangwa, MUKAMA wange; habwokuba tinkalyaga kintu kyona ekirukuzirwa rundi ekitasemiire.’ 9Baitu iraka lyaruga omu iguru omurundi gwa kabiri, nirigamba liti: ‘Ruhanga eki yayeriize, otalikyeta ky'omuziro.’ 10Eki kikabaho emirundi esatu, hanyuma byona byagarurwa omu iguru. 11“Omu kasumi ako konyini haija abasaija basatu, baahika ha nju ei tukaba turumu, batumirwe kuntabarra nibaruga Kaisaariya. 12Mwoyo Ahikiriire yandagira kugenda nabo ntarukugurukyagurukya. N'ab'oruganda abo mukaaga nabo baagenda na nyowe, twataaha mb'omusaija ogu Koroneeri. 13Kandi uwe yatusoborra nkooku yarozire malaika ayemeriire omu kisiika kye naagamba ati; ‘Tuma abantu Yoppa, beeteyo Simooni arukwetwa Petero; 14ogu alikwegesa ebigambo ebirukwija kukujuna hamu n'eka yaawe yoona.’ 15Kandi nyowe obu natandikire kwegesa, Mwoyo Ahikiriire yabaijaho boona, nkooku yatwizireho itwe omu kubanza. 16Na nyowe naijuka MUKAMA eki yagambire ati: ‘Yohaana akabatiza n'amaizi, baitu inywe mulibatizibwa na Mwoyo Ahikiriire.’ 17Hati Ruhanga obu araaba yabahaire ekisembo ekirukusisana n'eki yatuhaire obu twabandiize kwikiriza MUKAMA Yesu Kristo, nyowe ninyowe oha ayaakusoboire kutanga Ruhanga?” 18Abakwenda obu baahuliire eki, baabireka. Baatandika kukugiza Ruhanga nibagamba bati: “Hati Abanyamahanga nabo Ruhanga abahaire okwegarukamu okurukutungisa obwomeezi obutahwaho.” 19Abararangiibwe hanu na hali habw'okuhiiganizibwa okwabaireho habw'ebya Sitefano, bakagenda baahika Foinike na Kipuro na Antyokiya batarukutebeza muntu ondi weena Amakuru Amarungi kwihaho Abayudaaya bonka. 20Omulibo hakaba harumu abasaija abamu, enzaarwa za Kipuro na Kirene. Obu baahikire Antyokiya baatandika kwegesa Abagiriiki, nibabarangirra Amakuru Amarungi ga MUKAMA Yesu. 21Obusobozi bwa MUKAMA bwabaiziramu, kandi abantu baingi baikiriza, baahindukira Mukama. 22Ekitebe ky'abaikiriza ab'omu Yerusaalemu obu baahuliire eki, nubwo baatumire Baranaba agenda Antyokiya. 23Obuyahikireyo, yarora embabazi Ruhanga ezi yabagiriire, yasemererwa. Boona yabateererra kugumira hali MUKAMA n'omutima gumu. 24Baranaba ogu akaba ali musaija murungi, anyakwijwire Mwoyo Ahikiriire n'okwikiriza. Kandi Antyokiya oku, abantu baingi baahindukira MUKAMA. 25Aho Baranaba yarugayo yagenda Taruso kuserra Saulo. 26Obu yamuboine, yamuleeta Antyokiya. Bombi baamarayo omwaka gwona bali mu baikiriza baayo, nibeegesa abantu baingi. Kandi Antyokiya, nuho abeegesebwa baabandiize kwetwa Abakristo. 27Obu bakaba bakyali oku, abarangi abamu bakaruga Yerusaalemu baahika Antyokiya. 28Omu hali bo, omuntu anyakwetwa Agabo, yayemerra yarangisibwa Mwoyo nkooku harukwija kubaho kiihe omu nsi yoona. Niyo kiihe eyabaireho omu businge bwa Klahudiyo. 29Abaikiriza bakacwamu buli muntu aheyo obukoonyezi nkooku arukusobora, ebintu babitwekere bagenzi baabo abaikara Buyudaaya. 30Kandi nukwo baakozire. Ebintu baabitwekera abakuru ba Yerusaalemu, byatwarwa Baranaba na Saulo.

will be added

X\