EBIKORWA 10

1Omu rubuga Kaisaariya hakaba harumu omusaija, ibara lye Koroneeri, omukuru w'ab'amahe ab'omu kihanda ekyayetwaga ky'Abaitale. 2Uwe n'ab'eka ye boona bakaba bali bantu abaayekambiraga ediini kandi abarukutiina Ruhanga. Yagabaga n'obwenda kukoonyera abanaku b'Abayudaaya, kandi yasabaga Ruhanga atarukulekerra. 3Kiro kimu ha saaha nka mwenda ez'orwebagyo, akabonekerwa, yarora butunu malaika wa Ruhanga nataaha omunju nambere ali, naamweta ati: “Koroneeri.” 4Kandi Koroneeri, anyakwijwire obutiini, yamuhanga amaiso nayetebuka ati: “Kiki Taata?” Malaika yamugambira ati: “Okusaba kwawe n'okugaba kwawe bitembere nk'ekiijukyo omumaiso ga Ruhanga. 5Hati nu, tuma abantu Yoppa, beeteyo omuntu Simooni, arukwetwa Petero, 6anyakuraara omwa Simooni omuhazi w'empu, enju ye eri ha musa gw'enyanja.” 7Malaika ayabalize nawe obu yamazire kugenda, Koroneeri yayeta babiri ha baheereza be hamu n'omu ha baserikale abaamulindaga, omuntu ayayekambiraga muno ediini. 8Obu yamazire kubasoborra byona ebibaireho, yabatuma Yoppa. 9Ha kiro ekyakuraasireho, abaatumirwe obu bakaba nibakyagenda, bali haihi kuhika orubuga ha saaha nka mukaaga, nubwo Petero yatembere ha nju eruguru kusaba. 10Omu kasumi ako enjara yamuruma kandi yagonza kulya akantu; baitu ab'omunju obu bakaba nibakyateekaniza ebyokulya, yabonekerwa. 11Yarora iguru likingwirwe, kandi ekintu ekirukusisa esuuka nkooto nikisirimuka hansi, kikwasirwe ha nsonda ina. 12Kikaba kirumu emiringo yoona ey'ebisoro n'ebirukwekurra n'enyonyi z'omu mwanya. 13Yahurra iraka nirimugamba liti: “Petero imuka; obiite olye.” 14Petero yagarukamu ati: “Nangwa, MUKAMA wange! Nyowe tinkalyaga kintu kyona ekirukuzira rundi ekitasemiire.” 15Iraka lyagaruka nirimugambira liti: “Ruhanga eki yayeriize, otalikyeta ky'omuziro.” 16Eki kikabaho emirundi esatu, hanyuma ekintu kyagarurwa omwiguru. 17Petero obu akaba akyasobiirwe naagurukyagurukya amakuru g'okubonekerwa oku, nubwo haizire abasaija abatumirwe Koroneeri, bayemerra omu irembo ly'enju ya Simooni, 18baayeranga nibakaguza Simooni arukwetwa Petero obu araaba naaraara aho. 19Petero obu akaba naakyacumiitiriza amakuru g'okubonekerwa oku, Mwoyo Ahikiriire yamugambire ati: “Haizire abasaija basatu nibakuserra. 20Rahuka osirimuke, ogende nabo otarukugurukyagurukya, habwokuba ninyowe mbatumire kwija hanu.” 21Petero yasirimuka, yahikaho abasaija abo, yabakaguza ati: “Ou murukuserra ninyowe, muleesirwe ki?” 22Bbo baamugarukamu bati: “Koroneeri, mukuru w'ab'amahe, omuntu ahikiriire, arukutiina Ruhanga kandi arukusiimwa Abayudaaya boona, ahabwirwe malaika wa Ruhanga kukweta oije owe, nukwo ahurre ebi oraagamba.” 23Aho Petero yabataahya omunju, baaba bagenyi be. Obwire obu bwakiire, Petero yaimuka, yagenda nabo asendekeriziibwe abaikiriza abamu ba Yoppa. 24Orubuga rwa Kaisaariya bakarutaaha ha kiro ekyakuraasireho. Baasanga Koroneeri abategeriize, amazire kweta ab'oruganda rwe n'abanywani be abandi babeho. 25Petero obu yahikire ha nju, Koroneeri yaturuka aheeru, yagenda kumutangirra, yajuumara ha bigere bya Petero, yamuramya, 26Baitu Petero yamwimukya naagamba ati: “Yemerra; na nyowe ndi muntu nka iwe.” 27Baagenda nibabaza, baataaha omunju, baasangamu abantu baingi abaayesoroize. 28Petero yatandika kubeegesa ati: “Inywena mumanyire Ebiragiro nkooku bitanga Abayudaaya okuteerana rundi okubungira abantu b'ihanga erindi; baitu nyowe, Ruhanga akaanyoleka nkooku ntasemerire kugaya omuntu weena rundi kumunuga. 29Nahabweki obu baanyesire, tinyangire kwija. Kandi nikyo ndukukaguliza nti: Munyetiire ki?” 30Koroneeri yamugarukamu ati: “Ebiro bbina ebihingwire, obu nkaba ninsaba omu kisiika kyange, ha saaha nk'enu ey'omwenda, nkarora omusaija anyemeriire omumaiso, ajwaire ebijwaro ebirukwangasana, 31yangambira ati: ‘Koroneeri, Ruhanga ahuliire okusaba kwawe, kandi aijukire n'okugaba kwawe. 32Hati nu, tuma abantu Yoppa, beeteyo omuntu Simooni arukwetwa Petero, anyakuraara omwa Simooni omuhazi w'empu, enju ye eri ha musa gw'enyanja.’ 33Nikyo nakutumiireho ahonaaho, kandi na iwe okozire kurungi kwija. Hati nu, itwena twesoroize hanu omumaiso ga Ruhanga, nukwo tuhurre byona MUKAMA ebi akuragiire kutugambira.” 34Petero yatandika kwegesa naagamba ati: “Mazima mmanyire Ruhanga nkooku atasoroora mu bantu; 35baitu omu buli ihanga, weena arukumutiina akakora ebihikire, Ruhanga amusiima. 36Ruhanga akahikya ekigambo kye hali Abaisirairi barangirirwe Amakuru Amarungi ag'obusinge, nakirabya omu Yesu Kristo (MUKAMA w'abantu boona). 37Na inywe mumanyire ebyabaireho omu Buyudaaya yoona, okubandiza Galiraaya nambere Yohaana yayegeseze ebyokubatiza. 38Mumanyire Yesu owa Nazareeti nkooku Ruhanga yamuseesereho Mwoyo Ahikiriire, yamuha n'obusobozi. Kandi habw'okukonyerwa Ruhanga, Yesu yagendagendaga naakora ebirungi, kandi naakiza boona abakaba nibagadisibwa Sitaani. 39Na itwe tuli bakaiso b'ebi byona ebi yakoliire omu Buyudaaya n'omu Yerusaalemu. Yesu ogu, abantu bakamwita nibamuhanika ha muti; 40baitu Ruhanga akamuhumbuura obu haahingwireho ebiro bisatu, yamutwoleka. 41Atamwoleke bantu boona, baitu akamwoleka itwe abakaiso Ruhanga aba yakomere kara, abaaliire na Yesu kandi baanywa nawe amazire kuhumbuuka omu bafu. 42Akaturagira kwegesa n'okunanura abantu nkooku nuwe ogu Ruhanga ou yakomere kuba mucwi w'emisango y'abomiire n'abafiire. 43Kandi nuwe abarangi boona baajuliire nibagumya ngu, weena arukumwikiriza naaganyirwa ebibi habw'ibara lye.” 44Petero obu akaba naakyabaza ebi, Mwoyo Ahikiriire yasirimuka hali boona abakaba nibamuhuliriza. 45Abaikiriza abasazirwe abaizire na Petero, bakahunirra habw'okurora abanyamahanga nabo nibaseeswaho ekisembo kya Mwoyo Ahikiriire. 46Baitu nabo bakabahurra nibabaza endimi kandi nibahaisaniza Ruhanga. Nubwo Petero yakagwize ati: 47“Abantu banu abatungire Mwoyo Ahikiriire nka itwe, haroho asobora kubaima amaizi ngu batabatizibwa?” 48Yaragira babatizibwe omu ibara lya Yesu Kristo. Hanyuma baamusaba amale nabo ebiro bike.

will be added

X\