2 TIMOTEHO 4

1Ninkuteererra omumaiso ga Ruhanga n'aga Kristo Yesu ow'alicwera omusango aboomiire n'abafiire, ninkurahiza okugaruka kwe n'obukama bwe: 2Rangirra ekigambo, kyekambire omu busumi obusemeriire n'obutasemeriire. Hwitura, hana kandi teererra; otaterebuka omu kugumiisiriza n'omu kwegesa. 3Halibaho akasumi abantu obu balyanga kuhurra enyegesa ey'amazima, habw'okugira amatu agarukubanulirra, balyesorooleza abeegesa abarukubeegesa ebi barukwenda. 4Balyanga kuhurra amazima, baburanganire omu nganikyo z'okwehangahanga. 5Baitu iwe otalitengeeta, gumiisiriza emihito, kora omulimo ogw'omugambizi ow'Amakuru Amarungi, ohikirize kurungi obuheereza bwawe. 6Habwokuba nyowe ndi haihi n'okutambwa; obwire bwange obw'okuruga omunsi buhikire. 7Nyowe nkarwana masaija, empaka z'okwiruka nzimazire, okwikiriza nkugumize. 8Okuruga hati nsigaize okutunga ekondo ey'obuhikiriire eyanteekaniriziibwe--MUKAMA, omucwi w'emisango omwinganiza, ei alimpa ha Kiro kiri. Taligiha nyowe nyenka, baitu na boona abaataire omutima ha kugaruka kwe. 9Kora kyona eki orukusobora ompikeho bwango. 10Habwokuba Deema anyakugonza ensi enu enyakuroho, akandugaho yagenda Teesalonika. Kereseke akagenda Galatiya, Tito yagenda Dalamatiya. 11Luka wenka nuwe nsigaire nawe. Yeta Maliko, oije nawe; habwokuba nangasira muno omu gw'obuheereza. 12Tikiko nkamutuma Efeeso. 13Obu oliba noija, oleete omwegereko ogu nasigire Turoha mba Karipo. Ondeetere n'ebitabu, baitu okukira muno eby'emizingo y'empu. 14Alekizanda, omuheesi w'emiringa, akankora kubi muno; MUKAMA alimusasura habw'ebi yakozire. 15Na iwe omwerinde, habwokuba enyegesa yaitu akagihakaniriza kimu. 16Omu kwetonganirra kwange okw'okubanza, busaho n'omu ayansagikire; boona bakandugaho. Hati ninsaba baleke kukijunaanwa! 17Baitu MUKAMA akanyemerraho, yampa amaani ag'okurangirirra kimu ekigambo kye, nukwo Abanyamahanga boona basobole kukihurra. Na nyowe nukwo natabukire nti akanwa k'entale. 18MUKAMA alintabura akabi koona kandi alinjuna, antwale omu bukama bwe obw'omwiguru. Ekitiinisa kibe hali Uwe, ebiro n'ebiro. Amiina. 19Ondamukize Pirisika n'Akwila n'ab'omuka ya Onesiifooro. 20Erasito akasigara Korinto, Turofimo nkamusiga Mileeto arwaire. 21Lengaho oku orukusobora kwija obusumi bw'obutiti butakahikire. Yubulo, Pudensi, Liino, Klaudiya n'ab'oruganda boona bakuramukize. 22MUKAMA aikale n'omwoyo gwawe. Embabazi za Ruhanga ziikale na inywe.

will be added

X\