2 TIMOTEHO 2

1Hati iwe, mwana wange, ba w'amaani habw'obukoonyezi bwa Kristo Yesu. 2Ebi nakugambiire omumaiso g'abakaiso baingi, obikwase abantu abeesigwa, abalisobora kwegesa n'abandi. 3Na iwe nk'omuserikale omurungi owa Kristo Yesu, gumira okubonabona kwawe. 4Tiharoho muserikale anyakuli ha mulimo gwe anyakwetaba omu bigambo by'abatali barwani, habwokuba naagenderra kusiimwa ayamukomere. 5Omuzaani w'empaka taheebwa kondo, rundi buli naahondera ebiragiro by'okuzaana. 6Omulimi omwekambi nuwe asemerra kubanza kuganura ebyokulya ebi ayereze. 7Weetegereze ebi ndukugamba, habwokuba MUKAMA naija kukukoonyera kukenga byona. 8Ijuka Yesu Kristo ayahumbuukire omu bafu kandi mwijukuru wa Daudi, nkooku kyarangirwe omu Makuru Amarungi aga nabatebiize. 9Amakuru Amarungi ago nugo ndukubonabonera, mboherwe omu njegere nk'omuntu enkozi y'ebibi. Baitu ekigambo kya Ruhanga tikibohwa. 10Habweki ngumiisiriza byona habw'abakomerwemu, nukwo nabo batunge okujunwa n'ekitiinisa eky'ebiro n'ebiro omu Kristo Yesu. 11Ekigambo kinu ky'amazima ekirukugamba kiti: Obu turaaba twafiire hamu nawe, buli tulyomeera hamu nawe; 12obu turaaba nitugumiisiriza hamu nawe, buli tulirema hamu nawe; obu turaaba nitumwehooga, nawe alitwehooga. 13Noobu turaaba tutali beesigwa, baitu Uwe aikara ali mwesigwa, habwokuba tasobora kwehakaniza. 14Ebi oikalege noobibaijukya, kandi obateererre omumaiso ga MUKAMA: beerinde empaka ezitaleeta karungi, baitu zihwerekereza abazihurra. 15Wekambe okweyoleka oli muntu kwo arukusiimwa Ruhanga, omukozi atarukukwatwa nsoni, arukwegesa kurungi ekigambo ky'amazima. 16Werinde embazo ezitarumu kutiina Ruhanga, habwokuba nizongera kuhabisa abantu, 17kandi ebigambo byabo bigenda nibirya nk'ekookoro. Omuli abo nuho hali Himenaayo na Fileeto, 18abaahabire amazima nibagamba ngu, okuhuumbuka kukahingura ira. Nukwo bajuumika okwikiriza okw'abantu abamu. 19Baitu omusingi gwa Ruhanga ogugumire gwikaraho, guroho emanyikirizo erukugamba eti: “MUKAMA, abe naabamanya”, kandi eti: “Weena anyakwatura ibara lya MUKAMA, aruge omu bubi.” 20Omunju enkooto tihabamu bikwato ebya zaabbu n'efeeza byonka, baitu habamu ebibaizirwe n'ebibumbirwe. Ebimu biba by'emirimo ey'ekitiinisa, ebindi by'emirimo etali y'ekitiinisa. 21Omuntu kakuba ayeihaho byona ebitali birungi; obu, alifooka kikwato ky'omulimo gw'ekitiinisa, kintu ekyeziibwe kandi ekirukugasira nyineeka, kiteekaniziibwe okukora omulimo gwona omurungi. 22Habweki oyetantale okwegomba kubi okw'obusigazi, oyemarre ha buhikiriire, ha kwikiriza, ha kugonza, na ha businge, nookwataniza n'abo abeeta ibara lya MUKAMA, baina omutima ogurukwera. 23Wecwereho kimu empaka ez'obudoma ezitaina makuru; na iwe omanyire nkooku izaara enkungani. 24Omuheereza wa MUKAMA tasemerra kuba muntu w'enkungani, baitu aba munyambabazi ha buli muntu weena, mwegesa murungi kandi anyakugumiisiriza, 25omuntu arukuhana mpora abarukumuteeza empaka. Rundi Ruhanga asobora kubaha kwegarukamu kandi bakamanya amazima, 26nukwo basobole kutabuka emitego Sitaani ei yabakwatiiremu, bakole ebi Ruhanga yagondeze.

will be added

X\