2 TIMOTEHO 1

1Nyowe Paulo, Ruhanga ou yakomere kuba mukwenda wa Kristo Yesu, okurangirra obwomeezi obwaraganiziibwe obu tutungira omu Kristo Yesu, 2ninkuhandiikira, iwe Timoteho omwana wange omugonzibwa: Ninkugondeza emigisa, embabazi, n'obusinge ebiruga hali Ruhanga Isiitwe na Kristo Yesu MUKAMA waitu. 3Ninsiima Ruhanga ou mpeereza n'omutima gumu, nka baisenkurunyowe oku baakozire, obu nkwijuka bwona omu kusaba kwange. 4Obu nyijuka okurra kwawe, nyegomba kukurora ekiro na nyamusana, nukwo nsemerererwe kimu. 5Ninyijuka okwikiriza kwawe okw'amananu, okwikiriza okwatandikiire omu nyokwenkuru Loyisi na nyoko Ehuniike, kandi hati ningumya na iwe oinakwo. 6Nikyo ndukukwijukiza kwimukya buhyaka ekisembo kya Ruhanga ekiri omuli iwe, eki waatungire obu nakutaireho emikono. 7Ningira Ruhanga atatuhe mutima ogw'obutiini, baitu akatuha ogw'amaani, ogw'engonzi, kandi ogw'okwetanga. 8Nukwo nu, otakwatwa ensoni okujurra MUKAMA waitu, noobwakuba nyowe omunyankomo we. Kandi na iwe ikiriza okubonesibwa habw'Amakuru Amarungi, nookonyerwa amaani ga Ruhanga. 9Nuwe ayatujunire kandi yatweta kuba bantu be, atarukusigikira ha bikorwa byaitu, baitu naasigikira ha ntegeka ye na ha mbabazi ezi yatugiriire ira omu Kristo Yesu. 10Kandi na hati azoolekiire omu kwija kw'Omujuni waitu Kristo Yesu, ayahwerekeriize, yayolekera obwomeezi obutahwaho omu Makuru Amarungi. 11Amakuru Amarungi ago, nugo nakomiirwe kuranga, ndi mukwenda kandi mwegesa, 12kandi hati nikyo ndukubonera nti enaku. Baitu tindukukwatwa nsoni, habwokuba nimmanya ou naikiriize, kandi ningumya nkooku asobora kulinda ekisembo eki yankwasize okuhika ha Kiro kiri. 13Na iwe ikara ohondere ekyokurorraho ky'ebigambo ebirungi ebi nakugambiire, ogumire omu kwikiriza n'omu kugonza ebinyakuli omu Kristo Yesu. 14Ekirungi eki wahairwe, kirinde nookonyerwa Mwoyo Ahikiriire anyakwikara omuli itwe. 15Omanyire boona abali omu Asiya, nkooku bandugireho. Omuli abo nuho hali Fiijelo na Herumojene. 16MUKAMA agirre embabazi eka ya Onesiiforo habwokuba akampuumuza emirundi nyingi, atankwatirwe nsoni ndi hanu omu njegere, 17n'obu yahikire Rooma akanserra aina ekihika, yanzoora. 18MUKAMA amuhe kugirirwa embabazi ha Kiro eki! Na iwe omanyire kurungi byona ebi yankoliire ndi Efeeso.

will be added

X\