2 ABATEESALONIKA 2

1Bagenzi bange, ha kigambo eky'okugaruka kwa MUKAMA waitu Yesu Kristo n'okusorrokana kwaitu kumutangirra, nitubeesengereza 2muleke kucwekwa enkizi rundi kukangwa ebintu byona ebirukumanyisa ngu, ekiro kya MUKAMA kihikire; noobu byakuleetwa abarangi b'ebisuba, rundi orugambo rw'abantu, rundi ebbaruha erukusisana nk'erugire hali itwe. 3Mutaliikiriza muntu n'omu kubabiihabiiha omu mulingo gwona. Ekiro eki tikirukwija kuhika obwemi butakacwekere, kandi Omwemi atakoolekerwe. Nuwe ogu ow'okuhwerekerra, 4anyakuhakaniza kyona ekyetwa ruhanga rundi ekiramibwa. Naayenyumiriza kukira byona, nukwo aikarre omunju ya Ruhanga naayeyeta Ruhanga. 5Timurukwijuka eki nkooku nakibagambiire obu nkaba nkyali na inywe? 6Ekimutangire kuzooka hati, mukimanyire; nukwo asobole kwolekwa akasumi ke obu kalihika. 7Habwokuba obwemi bukatandika ira, nibukora omu nsita; baitu Kristo anyakubutanga, araikaraga naabutanga okuhika obu alikaihwaho. 8Obu nubwo Omwemi alizooka, kandi MUKAMA Yesu alimwisa orwoya orw'akanwa ke, amuhwerekereze n'okumuliikana okw'okwija kwe. 9Omwemi ogu aliija omu busobozi bwa Sitaani, aina amaani ag'okukora ebihuniriza ebirukuhabisa, n'ebyamasano, 10hamu n'ebindi byona ebirisobora kuhabisa abo abali b'okuhwerekerra, habwokuba bakanga kugonza amazima agaakubajunire. 11Nikyo Ruhanga abalekera bahabisibwa, baikirize ebisuba ebi. 12Nukwo boona abataraikiriize amazima, baitu baasiima obubi, bacwerwe omusango, gubasinge. 13Bagenzi bange abagonzibwa MUKAMA, kituhikiriire kusiima Ruhanga butoosa habwanyu, habwokuba okuruga kara na kara Ruhanga akabakomera okujunwa, mwezibwe Mwoyo Ahikiriire kandi mwikirize amazima. 14Eki nikyo yabeetiire naayekoonyeza okurangirra kwaitu okw'Amakuru Amarungi, nukwo musobole kubagana ha kitiinisa kya MUKAMA waitu Yesu Kristo. 15Nahabweki bagenzi bange mugume, mukwatire kimu byona ebi twabeegeseze na kanwa kaitu rundi ebi twabahandiikiire. 16MUKAMA waitu Yesu Kristo wonyini, na Ruhanga Isiitwe ayatugondeze, yatuha ekihuumuro eky'ebiro n'ebiro n'okunihira okugumire habw'embabazi ze, 17ahuumuze emitima yanyu kandi abagumye omu birungi byona ebi mukora n'ebi mugamba.

will be added

X\