2 ABATEESALONIKA 1

1Nyowe Paulo, hamu na Silivaano na Timoteho, nituhandiikira ab'ekitebe ky'abaikiriza aba Teesalonika abali omu Ruhanga Isiitwe na MUKAMA Yesu Kristo: 2Nitubagondeza omugisa n'obusinge ebiruga hali Ruhanga Isiitwe na MUKAMA Yesu Kristo. 3Bagenzi bange, kituhikiriire okusiima Ruhanga habwanyu nkooku kisemeriire, habwokuba okwikiriza kwanyu nikweyongera muno kandi n'okugonzangana kw'omuntu n'omugenzi we nakwo nikweyongera. 4Nahabweki itwe nitubenyumirizaaho omu bitebe by'abaikiriza Ruhanga habw'okuguma kwanyu n'okwikiriza kwanyu omu kuhiiganizibwa oku kwona n'omu mihito ei murukugumiisiriza. 5Eki nikyo kirukwoleka encwa ya Ruhanga ey'obulyo, nukwo inywe musobole kusangwa musemeriire obukama bwa Ruhanga obu murukubonera enaku hati. 6Habwokuba Ruhanga naarora nkooku kiri ky'obwinganiza okubonesa abo abarukubabonesa; 7kandi na inywe abanyakubonesibwa, okubahuumuza hamu na itwe. Ebi biribaho MUKAMA Yesu obu alizooka naaruga omwiguru, aina baamalaika be ab'obusobozi nibaizira omu murro 8ogurukufubira abo abatarukumanya Ruhanga, hamu n'abo abatoorobera Amakuru Amarungi aga MUKAMA waitu Yesu. 9Baliheebwa ekifubiro eky'okuhwerekerra okw'ebiro n'ebiro, n'okubingwa omu maiso ga MUKAMA n'omu kitiinisa eky'obusobozi bwe, 10obu aliija ha kiro kiri okuheebwa ekitiinisa omu bahikiriire be n'okuhuniriza boona abaikiriize, habwokuba amakuru twabatebiize, mukagaikiriza. 11Eki nikyo tubasabira obutoosa, nukwo Ruhanga waitu ababarre omu basemeriire eki yabeetiire, kandi ahikirize n'obusobozi bwe ebirungi byona ebi mwayecweriire kukora n'ebi murukukora habw'okwikiriza. 12Nukwo MUKAMA waitu Yesu anyumirizibwe omuli inywe, na inywe munyumirizibwe omuli uwe, nk'embabazi za Ruhanga waitu n'eza MUKAMA Yesu Kristo okuziri.

will be added

X\