2 PETERO 3

1Abagonzibwa, enu niyo bbaruha eya kabiri ei mbahandiikiire, kandi omu bbaruha ezi zombi nindengaho kubaijukya n'okusisiimura emitima yanyu ey'amananu. 2Ninyenda mwijuke ebyarangirwe abarangi abahikiriire, hamu n'ebiragiro bya MUKAMA kandi Omujuni ebi mwagambiirwe abakwenda. 3Eky'okubanza, kinu mukyetegereze: omu biro ebya ha mpero, abasekerezi baliija nibasekereza, kandi nibatwalirizibwa okwegomba kw'emibiri yabu, 4nibagamba bati: “Akaraganiza kwija, hati araha? Okuruga baisenkuru itwe obu baafiire, ebintu byona biikaire nkooku bikaba biri ensi neehangwa.” 5Kandi bakangira kimu Ekyahandiikirwe ekirukugamba ngu: Ira muno iguru likabaho habw'ekigambo kya Ruhanga; kandi ngu: N'ensi ekahangwa yaihwa omu maizi kandi yatebwaho kugabaganiza. 6Ekyarugiremu, amaizi ago nugo gaasandaire gahwerekereza ensi ei ekaba eroho omu kasumi ako. 7Kandi habw'ekigambo kya Ruhanga eki kyonyini, iguru n'ensi ebiroho hati byahuliirwe omurro, byahwiirwe okuhika ha kiro eky'okucwa omusango n'okuhwerekereza abantu abatatiina Ruhanga. 8Abagonzibwa, muteebwa ekigambo kinu ekirukugamba ngu: Hali MUKAMA ekiro kimu kiri nk'emyaka rukumi, kandi emyaka rukumi eri nk'ekiro kimu. 9MUKAMA takerererwa okuhikiriza ebi yaraganiize, abantu abamu nkooku bateekereza; baitu inywe nabagumiisiriza, tarukugonza muntu n'omu ahwerekerre, baitu boona beegarukemu. 10Kandi ekiro kya MUKAMA kiriija nk'omusuma. Obu nubwo iguru lirihwaho n'okuhinda kwingi, n'ebyalihangirwemu biryagibwa omurro, kandi ensi na byona ebigirumu birisiirira. 11Ebintu ebi byona obu biraaba biri by'okuhwaho biti, inywe musemeriire kuba bantu ba mulingo ki? Musemeriire kuba bantu abarukwera kandi abarukutiina Ruhanga omu bwomeezi bwanyu, 12mutegeriize kandi nimwegomba ekiro eky'okwija kwa Ruhanga; habwokuba ha kiro eki, iguru liricumikwa omurro lihwerekereziibwe, n'ebyalihangirwemu byagibwe omurro. 13Baitu itwe nitutegereza iguru erihyaka n'ensi empyaka nambere abahikiriire baikara, nkooku yaraganiize. 14Habweki abagonzibwa, ebi nkooku mubyetegeriize, mwekambe nukwo MUKAMA abasange mutaina kabara rundi kamogo, baitu mwina obusinge. 15Kandi mumanye nkooku tulijunwa okugumiisiriza kwa MUKAMA waitu. Na Paulo, mugenzi waitu omugonzibwa, nukwo yabahandiikiire, naahondera amagezi aga yahairwe. 16Eki nukwo yakisoboroire ati, nkooku akora omu bbaruha ze zoona. Omuli zo harumu ebintu ebimu ebitarukwetegerezibwa bwango, abasema kandi abaceke ebi bahingisa nkooku bahingisa Ebyahandiikirwe ebindi, bikabarugiramu okuhwerekerra. 17Habweki inywe abagonzibwa, binu nkooku mwabimanya kara, mwerinde, mutaikara kuhabisibwa ensobi ez'abeemi abo, mukaruga nambere mugumiire. 18Baitu mweyongere omu mbabazi n'omu kumanya MUKAMA waitu kandi Omujuni Yesu Kristo. Ekitiinisa kibe hali uwe, hati n'ebiro byona. Amiina.

will be added

X\