2 PETERO 2

1Abarangi b'ebisuba nkooku baimukire omwihanga lya Isirairi, n'abeegesa b'ebisuba nukwo baliimuka bati omuli inywe, babataahyemu mpora mpora obuhakani oburukuhwerekereza, nangwa n'okwehakana MUKAMA wabu ayabacungwire. Baayereetera bonka okuhwerekerra okwa bwango. 2Baingi balihondera engeso zaabo z'orwanju kandi bagayise abantu omuhanda gw'amazima. 3Habw'omukoijo gwabo balibaihaho sente nibabeegesa ebigambo eby'obugobya. Omusango gukabasinga ira kandi tigukarugahoga. Ekifubiro kyabu kiikara nikibategereza. 4Ruhanga ataganyire bamalaika obu baasiisire, baitu yabanaga omu kiinongoro ky'omurro, yababohera okuzimu omu mwirima kasira, baikaleyo okuhika obu balicwerwa omusango. 5Kandi ataganyire abantu aba ira n'ensi yabo obu yaleesire okusandaara kw'amaizi omunsi y'abo abatatiina Ruhanga, baitu akajuna Noha ayateereriire abantu bahikirre. 6Kandi Ruhanga akookya embuga za Sodomu na Gomora yazifoora iju, yaisingisa omusango ogw'okuhwerekerra, zibe kyokurorraho ky'abo abaliba batarukutiina Ruhanga. 7Baitu yajuna Looti, omuntu omurungi ow'akaba atuntuziibwe muno orwanju rw'abantu ababi. 8(Ningira omuntu omurungi ogu, ebi yarozire n'ebi yahuliire obu yabaikaramuga nibakora ebitahikire, byasaalizaga omutima gwe omurungi buli kiro.) 9Ebi byona bitwoleka Ruhanga nkooku amanyire kujuna abamutiina, akabaiha omu mitalibano; amanyire n'okwikaza ababi ha kifubiro okuhika ha kiro eky'okucwerwa omusango; 10kandi okukira muno abo abeemarra ha kwegomba okubi okw'emibiri yabo, kandi abarukugaya obusobozi bwa Kristo. Abeegesa b'ebisuba abo, bantu bahoole kandi ntahurra, tibatiina n'okujuma bamalaika ab'ekitiinisa, 11kandi kunu bamalaika noobu baraaba nibabakiraho amaani n'obusobzi, tibabahyemera kandi tibabajunaana musango omumaiso ga MUKAMA. 12Baitu abasiisi abo basisana ebisoro ebitaina magezi, ebisoro ebirukulemwa obuhangwa bwabyo, ebyazaalirwe kutegwa n'okwitwa. Bajuma ebintu ebi batarukumanya, bali b'okuhwerekerezibwa nk'ebisoro ebi, 13basaalizibwa kubi habw'ebibi ebi baakozire. Eki barukweta kusemererwa, nugo amagenyi ga nyamusana. Abantu abo bitonyezi ebibi kandi bumogo omu kitebe kyanyu, nibeegondeza omu obubi bwabo, babagobeza noobu muba nimulya nabo. 14Amaiso gaabo gaijwire obusiihani, tibaniha kibi. Batwaliriza abantu abaina emitima etagumire, kandi emitima yabo ekamanyirra omukoijo. Baana bakyenwa! 15Bakaruga omu muhanda oguterekeriire, baahaba, baatoma omuhanda ogwa Balaamu, mutabani wa Behori, ayagondeze kwetungira ebisembo ebyarugire omu kukora ebitahikire, 16baitu yacoomerwa habw'ekibi kye. Endogoyi etagamba, ekabaza n'iraka nk'ery'omuntu, yamaraho iraro ly'omurangi ogu. 17Abantu abo tubeeta maziba agoomere kandi kiho ekirukutwarwa ekiyaga; baahuliirwe omwirima ogukwasire. 18Obu baba nibabaza ebigambo eby'okwehaahire, batwaliriza omu kwegomba kw'omubiri abantu abakaruga kwecwaho abasiisi. 19Babanihiza obusinge, kandi kunu bbo, bairu b'engeso mbi; ningira kyona ekisingura omuntu, aba mwiru wakyo. 20Baitu obu bamara kutabuka obubi bw'ensi, habw'okumanya MUKAMA waitu kandi Omujuni Yesu Kristo, bakagaruka kubwetabamu kandi bukabasingura. Enyikara yabo eya hanyuma efooka mbi okukira ey'okubanza. 21Kyakubaire kirungi kakuba abantu abo bataramanyire omuhanda ogw'obuhikiriire, okukira kumara kugumanya, bakagurugaho kandi baaleka ebiragiro ebirukwera ebi baahairwe. 22Kibahikireho nk'orufumo rw'amazima orugamba ruti: “Embwa egarukira ebitanaki byayo”; kandi: “Empunu obu emara kwogebwa, egaruka kwekulingura omu saabu.”

will be added

X\