2 ABAKORINTO 7

1Abagonzibwa, nkooku twina ebyaraganiziibwe ebi, katwoge oburofu bwona obw'omubiri n'obw'omwoyo, tube bahikiriire mali, tutiine Ruhanga. 2Mutatiina kutwanjururra emitima yanyu. tiharoho muntu n'omu ou twakozire kubi, tiharoho n'omu ou twasiisire, tiharoho n'omu ou twagobiize. 3Kinu tindukukigamba kubacwera omusango, habwokuba mbagambiire ira nkooku mutuli ha mutima; tuliba tuli hamu omu kufa rundi omu kwomeera. 4Nimbeesiga muno; nimunyehuliza muno; mumpumwize muno. Noobu turaaba twina enaku ezirukwingana ki, baitu nyina omuhimbo ogutagambwa. 5Nangwa noobu twahikire Makedoni, emibiri yaitu etahuumule naakake, baitu twabonaga enaku embaju zoona-aheeru bwabaga bulemu, omu nda butiini. 6Baitu Ruhanga anyakuhuumuza abasobirwe, akatuhuumuza habw'okwija kwa Tito. 7Tikuli kwija kwe kwonka, baitu n'okuhuumuzibwa oku mwamuhuumwizemu. Akatutebeza ekihika kyanyu, okuganya kwanyu, n'obwekambi mwayolekere habwange. Bikanyongera kusemererwa. 8Noobu ndaaba nababihiize habw'ebbaruha ei nabahandiikiire, tindukukyeijukya. Nkabanza kukyeijukya, habwokuba nindora ebbaruha egi ekabasaaliza okumara akasumi kake. 9Baitu hati ninsemererwa, tihali habw'okusaalizibwa kwanyu, baitu okusaalizibwa oku mwatungire kukabaleetera okwegarukamu. Inywe mukasaalizibwa nka Ruhanga oku yagondeze; itwe titwina eki twabaferiize. 10Okusaalirwa Ruhanga nkooku agonza kuleeta okwegarukamu okurukuhikya ha kujunwa, kandi okusaalirwa oku timukweijukya; baitu okusaalirwa kw'ensi enu kurugwamu okufa. 11Hati nu murole okusaalirwa oku Ruhanga yabagondiize nkooku kwabeekambisiize: nkooku mwataireho muno omutima okwetonganirra, nkooku mwasaalirwe, oku mwatiinire, oku mwagizire ekihika, oku mwayekambiire, oku mwafubire abaasobeze! Omuli ebi byona mukeeyoleka nkooku mutaina musango omu bigambo ebi nabahandiikiire. 12Nahabweki obu ndaaba nabahandiikiire, ntabahandiikire habw'ogu ayasobeze, rundi habw'ogu ou baasobezeho; baitu nkabahandiikira nukwo mbooleke obwekambi obu mwatugiriire nkooku Ruhanga abwetegeriize. 13Eki nikyo kyatuhuumwize. Tikuli okuhuumuzibwa kwaitu oku kwonka, baitu tukeeyongera kusemererwa muno habw'okurora omuhimbo gwa Tito, habwokuba inywena mukamugarra omutima omu nda. 14Obu ndiba nnamwolekere nkooku ndukwesiima habwanyu, eki kitankwase nsoni. Ningira buli kintu kyona eki twabahaisizeho kyali ky'amazima, n'okwehaisa kwaitu omu maiso ga Tito nikweyoleka nkooku kuli kw'amazima. 15Omutima gwe gwona guhweriire hali inywe obu arukwijuka obuhulizi bwanyu, n'oku mwamutangiriire nimutiina kandi numutukumira. 16Na nyowe ninsemererwa habwokuba nimbeesigira kimu.

will be added

X\