2 ABAKORINTO 6

1Itwe abarukukora hamu nawe, nitubeesengereza muleke kutungira busa embabazi za Ruhanga. 2Ningira nuwe arukugamba ati: “Nkakuhuliiriza omu kasumi akasemeriire, kandi naakukoonyera hakiro ky'okujunirwaho.” Nkako akasumi akasemeriire; kandi kinu nikyo kiro ky'okujunirwaho. 3Titurukwenda kutalibaniza omuntu weena, omulimo gwaitu guleke kusangwamu ensobi yoona; 4baitu omu byona nitweyoleka nk'abaheereza ba Ruhanga. Nitugumiisiriza muno: omu kubonabonesibwa, omu bulemeezi, omu mihito, 5omu kuteerwa enkoba, omu nkomo, omu kwimukirirwa, omu kutalibana, omu kuraara ha muro, n'omu kurumwa enjara. 6Tuli baheereza ba Ruhanga omu kwerinda, omu kumanya, omu kugumiisiriza, omu mbabazi, omu Mwoyo Ahikiriire, omu kugonzangana okutarumu bugobya, 7omu kubaza amazima, n'omu maani ga Ruhanga; tukwasire eby'okurwanisa eby'obuhikiriire omu mukono gw'obulyo n'ogw'emoso. 8Tuli baheereza be omu kuheebwa ekitiinisa n'omu kugaywa, omu kugambwaho kubi n'omu kugambwaho kurungi. Nitubarwa nk'abagobya, kunu tuli b'amazima; 9nk'abatamanyirwe, kunu nitumanywa kurungi; nk'abarukufa, kunu tuli boomeezi; nk'abafubiirwe, kunu titwisirwe; 10nk'abali omu bujune, kunu nitusemererwa; nk'abanaku, kunu nituguudahaza baingi; nk'abataina kantu, kandi kunu twina byona. 11Bakorinto inywe, tubabaliize bbwa; tubanjuruliire emitima yaitu. 12Itwe tutabatangire kutwehikya, baitu ebiteekerezo byanyu nibyo bibatangire kutwehikya. 13Nimbahana nk'abaana bange, na inywe emitima yanyu mugyanjurre nkooku tubanjuruliire ogwaitu. 14Muleke kuteerana n'abatarukwikiriza. obuhikiriire bwina bukwatane ki n'obubi? Rundi ekyererezi n'omwirima biina bukwatane ki? 15Kristo aina bukwatane ki embandwa Beliyaali? Rundi arukwikiriza ateerana ata n'atarukwikiriza? 16Enju ya Ruhanga ikirraniza eta n'ibandiro? Itwe tuli Nju ya Ruhanga omwomeezi; nkooku Ruhanga yagambire ati: “Ndabaikaramuga nimbagenderamu. Ndiba Ruhanga wabu, kandi bbo baliba bantu bange. 17Nikyo Ruhanga arukugambira ati: Mubarugemu, mubeecwaho, kandi mutalikwataho kintu kyona ekitasemeziibwe. Nubwo na nyowe ndibatangirra. 18Ndiba isiinywe, na inywe muliba batabani bange n'abahara bange; MUKAMA w'obusobozi bwona nukwo arukugamba ati.”

will be added

X\