2 ABAKORINTO 2

1Nikyo nacweriiremu kutagaruka kubabungira ndeke kubatuntuza. 2obu ndabatuntuza, mara nibaha abarandeetera omuhimbo? Ogu ou ntuntwize? 3Kandi nikyo nabahandiikiriire, nukwo obu ndiija, ndeke kubiihizibwa abo abaakubaire nibandeetera omuhimbo. Habwokuba nkagumya nti: okusemererwa kwange kuliba kusemererwa kwanyu inywena. 4Nkabahandiikira nyina obujune bwingi n'obusaasi omu mutima, kandi n'amaizi maingi omu maiso, ntarukugenderra kubatuntuza, baitu okubooleka nkooku mbagonza muno. 5Obu haraaba haroho ayakozire ekirukusaaliza, atasaalize nyowe nyenka, baitu akabasaaliza inywena. 6Omuntu nk'ogu, ekifubiro eki yahairwe abaingi, nikimumara. 7Haakire mwakumuganyiire mumuhuumuza, nukwo aleke kutereburwa obujune obuhinguraine. 8Nikyo ndukubeesengerereza nti: Mugaruke mumwoleka engonzi. 9Nikyo nahandiikiire ningenderra okubalenga, mmanye obu muraaba nimuhurra omu byona. 10Weena ou muganyira, na nyowe mmuganyira. Kandi obu haraaba haroho eki naaganyiire, nkakiganyira habwanyu, omumaiso ga Kristo, 11nukwo tutange Sitaani kutusingura; habwokuba emitego ye tugimanyire. 12Obu nahikire Turoha kurangirrayo Amakuru Amarungi ga Kristo, oku nkasanga orwigi runkinguliirwe kukora omulimo gwa MUKAMA. 13Baitu omutima gwange gutahuumule habw'okutasangayo mugenzi wange Tito. Nukwo kubaraga, nayongera nagenda Makedoni. 14Baitu Ruhanga asiimwe, anyakutusinguza butoosa omu Kristo, kandi naakorra omuli itwe kurarangya hoona amakuru ag'okumumanya, amakuru agarukuboya nk'omugaju. 15Habwokuba hali abantu abarukujunwa n'abandi abarukuhwerekerra, itwe tuli mugaju gwa Kristo ogurukuboyera Ruhanga. 16Hali abo abarukuhwerekerra, tuli kijunde ky'orufu ekirukwita; baitu hali abo abarukujunwa, tuli kiboya ky'obwomeezi ekirukwomeeza. Nooha asemeriire omulimo ogu? 17Itwe titurukusisana nk'abaingi, ababungya ekigambo kya Ruhanga kukiihamu amagoba; baitu tuli bantu beesigwa, abaatumirwe Ruhanga, kandi twegeseza omumaiso ge nk'abaheereza ba Kristo.

will be added

X\