2 ABAKORINTO 13

1Gunu guraaba murundi gwa kasatu nyowe okwija owaanyu. Haroho nambere kyahandiikirwe kiti: “Buli musango gusemeriire kugumibwa abakaiso babiri rundi basatu.” 2Abo abaakozire kara ebibi nkabahabura, hamu n'abandi boona. Hati noobu ndaaba ntaliyo, nimbahabura nkooku naakozire omu kubunga kwange okwa kabiri nti: Obu ndigaruka obundi, tindukwija kubaganyira 3habwokuba mwikara nimwenda ekihuniriza ekiraagumya Kristo nkooku arukubaliza omuli nyowe. Uwe takwata mpora, baitu abakwasa amaani. 4Akabambwa ali muceke, baitu hati ayomiire habw'amaani ga Ruhanga. Na itwe tuli baceke omuli uwe, baitu omu kubaheereza, naija kutwomeeza habw'amaani ga Ruhanga. 5Mwekebere inywenka, murole obu muraaba mukyagumiire omu kwikiriza kwanyu. Mwerengese inywenka. timurukumanya Yesu Kristo nkooku ali omuli inywe? Rundi buli, ekirengeso kibasingire! 6Ninihira nimwija kwetegereza itwe nkooku tutasingirwe. 7Baitu nitusaba Ruhanga mutakora kibi na kimu. tikuli kugamba ngu, itwe tukasinga ekirengeso, baitu inywe mukole ebihikire, itwe noobu turaaba nitusisa abasingirwe. 8Titurukusobora kuhakaniza amazima, kwihaho nitugarwanirra. 9Itwe nitusemererwa obu tuba baceke, baitu inywe mukaba b'amaani. eki turukusaba, inywe mube bahikiriire. 10Binu mbibahandiikiire ntakabahikireho, nukwo obu ndiija ndeke kwolekera kimu obusobozi obu nahairwe MUKAMA obw'okubagumya n'okwombeka, baitu butali obw'okubahwerekereza. 11Nimmalirra nimbaraga bagenzi bange, mugoroobe. Mwegarukemu. Ebi mbagambiire mubiteho omutima, mwikirranize, mwikale n'obusinge. Obu nubwo Ruhanga ow'engonzi kandi ow'obusinge aliikara na inywe. 12Muramukyangane nimugwangana omu kifuba. Abantu ba Ruhanga boona nibabaramukya. 13Embabazi za MUKAMA Yesu Kristo, okugonza kwa Ruhanga, n'okuteerana hamu kwa Mwoyo Ahikiriire biikalege na inywe inywena.

will be added

X\