2 ABAKORINTO 12

1Nyowe kimpikiriire okwehaisa, noobu ndaaba ntarukukutungamu kantu. Leka nyongere kubagambira MUKAMA ebi yansuukuliire omu kubonekerwa. 2Nimmanya omuntu anyakwikiriza Kristo, ayatwairwe omu iguru lya kasatu, hati haahingwireho emyaka ikumi n'ena-rundi akaba aina omubiri rundi atainagwo, tindukumanya. Ruhanga nuwe arukumanya. 3Kandi nimmanya omuntu ogu nkooku yatwairwe omu Kiikaro ky'Okuhiirwa-rundi akaba aina omubiri rundi atainagwo, tindukumanya. Ruhanga nuwe arukumanya. 4Akahurrayo ebigambo omuntu ebi atasobora kwatura kandi omuntu ebi atasobora kusubirra. 5Leka nyehaise habw'omuntu ogu, baitu habwange tindukwija kwehaisa, kwihaho omu buceke bwange. 6Noobu ndatandika kwehaisa, baitu eki tikyanteere obudoma, habwokuba ninyija kubaza amazima. Nangwa kankireke, tihaikara kubaho omuntu arukunteekerezaho ebirukukira ebi arukundoramu, rundi ebi arukumpurraho. 7Baitu okuntanga kwehaisa muno habw'ebingi ebi naasuukuliirwe, nkacumitwa ihwa omu mubiri, liri nk'omukwenda wa Sitaani ow'okumbonesa, ntaliija kuhinguraniza omu kwehaisa. 8Nkeesengereza MUKAMA emirundi esatu, lindugeho; 9baitu uwe yangarukamu ati: “Obukonyezi bwange nibukumara, habwokuba amaani gange gahikirizibwa omu buceke bw'abantu.” Nikyo ndukwesiimira muno okwehaisaniza omu buceke bwange, nukwo amaani ga Kristo gasobole kwikara omuli nyowe. 10Habwa Kristo, nikyo ndukusemererwa omu buceke, omu kujumwa, omu kulemererwa, omu kuhiiganizibwa, n'omu mihito; habwokuba obu mba muceke, nubwo ngira amaani. 11Mazimakwo mbalize nk'omudoma! Niinywe mukimpambiriize, habwokuba niinywe mwakubaire nimumpaisa. Noobu ndaaba ntali kantu, baitu abakwenda abo rurangaanwa tibaina eki barukunkiza naakake. 12Ebikorwa by'omukwenda ow'amazima nkabikorra omuli inywe ninyehayo muno. Nkabakorramu ebirukuhuniriza, ebyamahano, hamu n'ebikorwa by'amaani. 13Ebitebe ebindi by'abaikiriza tukabakorra karungi ki aka tutarabakoliire inywe? Rundi nyowe habw'okutabasaba kantu? Ensobi egi muginganyire! 14Gunu nugwo omurundi gwa kasatu nyeteekaniize kwija owaanyu. Tindukwijayo kubaleetera obulemeezi, habwokuba tindukuserrayo ebyanyu, baitu ninserra inywe. Ningira abaana tibasemeriire kwahurra abazaire eby'okubakoonyera, baitu abazaire nubo baahurra abaana. 15Nyowe ndihayo ebyange n'okusemererwa kandi nyeheyo nyenka habw'emyoyo yanyu. Baitu nyowe habw'okubagonza muno, nikyo murasigikiraho kungonza kake? 16Mukaikiriza nkooku ntarabaleetiire bulemeezi, baitu nimugamba ngu, nkaba ndi ncwangya kandi nkabagobeza. 17Hali abo aba nabatumireho, haroho ou nayekonyiize okubagobeza? 18Nkeesengereza Tito kwija oku, namutuma kugenda na mugenzi waitu onu. Kandi Tito aina eki yabagobiize? Tutakoze omwoyo gumu? Tutakwate ekirale kimu? 19Na hati hoona nimukyateekereza ngu, tubaire nitwetonganirra omu maiso ganyu? Abagonzibwa, byona ebi turukubaza tubibaliza omu maiso ga Ruhanga, nkooku Kristo yakubibaliize habw'okubombeka. 20Eki ndukutiina nukwo kwija nkabasanga mwina engeso ezi ntarukwenda, kandi na inywe mukansanga nyina engeso ezi mutaakwenzire; tihaikara kubayo enkungani, ihali, ekiniga, okwegonza, okuhangiira, okugambisibwa, okwetumbura, n'okujagaraza abantu. 21Nintiina ngu, obu ndigaruka kwija, Ruhanga wange alimbundaaza omu maiso gaanyu, nukwo na nyowe ndirirre baingi omuli abo abaakozire kara ebibi, kandi abaayangire okwegarukamu obubi bwabu, obusiihani, n'orwanju ebi baakozire.

will be added

X\