2 ABAKORINTO 10

1Nyowe Paulo, ou murukuteekereza nyeculeeza obu mba na inywe, kandi mba manzi obu mba ndi hara, habw'obuculeezi n'embabazi za Kristo, 2nimbeesengereza nti: obu ndiija oku ndeke kwoleka amaani aga nakugondeze kwoleka abo abarukuteekereza ngu, nitukora nk'ab'ensi enu oku bakora. 3Noobu turaaba tuli omunsi, baitu titurukurwana nk'ab'ensi. 4Eby'okurwanisa by'obulemu bwaitu tibiri by'abantu, baitu by'amaani ga Ruhanga agahwerekereza ebigo ebigumire. 5Itwe tumaraho empaka zoona hamu n'ekintu ekindi kyona eky'okwekuliriza ekirukutanga abantu kumanya Ruhanga, kandi tugarra ebiteekerezo byona eby'abantu hali Kristo. 6Inywe obu mulikamara kumworobera, nubwo na nyowe ndyeteekaniza kufubira buli ntahurra yoona. 7Murole ebibali omu maiso. Omuntu weena obu araaba naagumya nkooku ali wa Kristo, aijuke na itwe tuli ba Kristo nkawe. 8Noobu ndaaba nimpinguranizaaho kwehaisa habw'obusobozi MUKAMA obu yatuhaire kubagumya n'okubombeka, butali bw'okubahwerekereza, eki tikyankwase nsoni. 9Nyowe tinaakugondeze kusisana nk'arukubatiinisiriza n'ebbaruha zange zinu. 10Habwokuba abamu nibagamba bati: “Ebbaruha ze zigumire kandi z'amaani, baitu omu nzooka ye muceke, n'emigambire ye busamu kantu.” 11Abarukugamba bati, leka bamanye ebi tuhandiika omu bbaruha tutaroho, nibyo tukora turoho. 12Itwe titurukwenda kwebara rundi kwerengesaniza n'abandi abarukwehaisa bonka. Bbo obu balengangana kandi bakeerengesaniza bonka, baba bataina eki barukwetegereza. 13Baitu itwe titurukwija kwehaisa kukira ha rulengo Ruhanga yatutaireho. Omu rulengo oru, na inywe nuho muli. 14Itwe titurukuhinguza ha rulengo oru, nk'abatarabahikireho. Ningira niitwe twabandize kubahikaho, twabaleetera Amakuru Amarungi ga Kristo. 15Titurukuhinguraniza kwehaisa habw'emirimo eyakozirwe abandi; baitu nitunihira ngu, okwikiriza kwanyu nkooku kurukweyongera, n'okurangaanwa kwaitu omuli inywe nakwo kulyeyongera muno. 16Nukwo tusobole kurangirra Amakuru Amarungi omunsi eza hara ohingwire owaanyu, tutarukwehaisa habw'emirimo eyakozirweyo omuntu ondi. 17Kikahandiikwa kiti: “Anyakuhaisa, leka ahaisanize MUKAMA.” 18Omuntu anyakwehaisa tali uwe asiimwa, baitu ogu anyakuhaisibwa MUKAMA.

will be added

X\