2 ABAKORINTO 1

1Nyowe Paulo, Ruhanga ou yasiimire mba mukwenda wa Kristo Yesu, na Timoteho mugenzi waitu, nituhandiikira ekitebe ky'abaikiriza Ruhanga abali Korinto, hamu n'abantu ba Ruhanga boona abali omu Akaaya yoona. 2Nitubagondeza emigisa n'obusinge obwa Ruhanga Isiitwe na MUKAMA Yesu Kristo. 3Akugizibwe Ruhanga, Ise MUKAMA waitu Yesu Kristo, Isiitwe ow'embabazi kandi Ruhanga omuhuumuza. 4Nuwe Ogu anyakutuhuumuza omu bujune bwaitu bwona, nukwo na itwe tusobole kuhuumuza abandi abali omu bujune bw'emiringo yoona, nitubahuumuza Ruhanga nkooku yatuhuumwize. 5Okubonabonesibwa kwa Kristo nkooku kwasaagire hali itwe, nukwo okuhuumuzibwa kwaitu omu Kristo kwasaagire kuti. 6Itwe obu tubona enaku, twibona nukwo inywe muhuumuzibwe kandi mujunwe. Kandi obu tuhuumuzibwa, tuhuumuzibwa habwanyu nukwo mutunge amaani agarukuleeta okugumiisiriza enaku, nk'ezaitu ezi tugumiisiriza. 7Nikyo tubeesigira muno, nitumanya inywe nkooku murukubonabonesibwa hamu na itwe, nukwo mulihuumuzibwa hamu na itwe. 8Ab'oruganda, nitugonza inywe mumanye emihito ei twaboine omu Asiya; habwokuba ekatukiza muno amaani, yatutereburra kimu, titwanihira kukira. 9Mazimakwo tukateekereza ngu, tusingirwe omusango gw'okufa. Ningira eki kikabaho tuleke kweyesiga itwenka, baitu twesige Ruhanga anyakuhuumbura abafu. 10Nuwe yatujunire akabi k'okufa, kandi nuwe alitujuna. Nuwe turukwesiga nkooku araikaraga naatujuna. 11Na inywe mutukoonyerege nimutusabira. Nukwo omugisa tuheebwa habw'okusaba kw'abaingi, abandi baingi baligusiimira Ruhanga habwaitu. 12Okwenyumiza kwaitu nkunu, kandi omutima gwange nigugumya ngu, omunsi munu, n'okukira muno omuli inywe, tukakora ebihikire nitubooleka engeso nungi kandi ez'amazima eziruga hali Ruhanga; tutarukwesiga magezi g'ensi, baitu embabazi za Ruhanga. 13Na hati titurukubahandiikira kindi, kwihaho ebi murukusobora kusoma mukeetegereza. Kandi ninihira nimwija kwetegerereza kimu, 14nkooku mwayetegeriizeho ekicweka. Nukwo na inywe mulisobora kwehaisa habwaitu, nka itwe oku tulyehaisa habwanyu ha kiro ky'okwija kwa MUKAMA Yesu. 15Obu namazire kwetegereza ebi byona, nkacwamu kubanza kubabungira nukwo mwongere kusemererwa obwa kabiri. 16Nkagonza kubabungira obu nkaba ningenda Makedoni kandi mbaleetweho nindugayo. Nukwo na inywe mumboherre ningenda Buyudaaya. 17Obu nagondeze kukora nti, nimugira nkaba nyina emitima ebiri? Rundi ebi nteegeka kukora, mbitegeka nk'omuntu kwonka, arukugamba ati: Ego, kandi omu kacu kake ati: Nangwa? 18Nindahira Ruhanga w'amazima, ekigambo eki tubagambira tikiri Ego na Nangwa. 19Habwokuba Omwana wa Ruhanga Yesu Kristo, nyowe, Silivano na Timoteho, ou twabatebiize, akaba atali Ego na Nangwa; baitu omuli uwe obutoosa ekigambo kya Ruhanga kiba Ego. 20Ningira omuli uwe, byona Ruhanga ebi yaraganiize biba Ego. Nikyo tugambira tuti: Amina, nituraba omuli uwe habw'okuhaisa Ruhanga ekitiinisa. 21Ruhanga nuwe atugumya itwena: itwe hamu na inywe, kandi nuwe yatutumire; 22akatutaho akarorwaho, kandi yatuha Mwoyo we mu mitima yaitu, abe mukwato gw'ebi atwahuliire. 23Baitu Ruhanga nuwe kaiso wange, ekyantangire kugaruka oku nukwo kubaganyira. 24Itwe tuleke kwefoora balemi b'okwikiriza kwanyu; baitu nitukora hamu na inywe nukwo musemererwe habwokuba omu kwikiriza kwanyu mwikara mugumire.

will be added

X\