1 TIMOTEHO 6

1Boona abali omu bwiru, bamanye bakama baabo nkooku basemeriire kuheebwa ekitiinisa, nukwo ibara lya Ruhanga n'enyegesa yaitu bireke kugaywa. 2Abairu abaina bakama baabo abaikiriza, baleke kubagaya ngu, boona b'oruganda rumu; baitu babaheereze kurungi okukiraho habwokuba abo abarukugasirwa omulimo gwabo nubo abaikiriza kandi abagonzibwa. Ebi nibyo obeegese kandi obateererre. 3Baitu kakuba habaho arukwegesa ebitali ebi rundi atarukwikirraniza n'ebigambo ebihikire ebya MUKAMA waitu Yesu Kristo n'enyegesa erukwikirraniza n'enyikiriza yaitu. 4aba ahinguraniize akwekuliriza, kandi taina eki amanyire. Aina n'omutima omubi ogw'okuhakaniza n'okuteera empaka ha bigambo ebizaara ihali, okwahukana, okuhangirra, okuteekerezaho kubi abantu, 5n'okuteeza empaka abantu abaina ebiteekerezo ebiramaire kandi abataina mazima, abarukuteekereza ngu, ediini nugwo muhanda ogw'okuguudahara. 6Nukwo, ediini erumu itungo lingi, baitu hali abo abaikara nibasiima ebi bainabyo. 7Omunsi tukaijamu tutaina kantu, kandi tuligirugamu tutarukutwara kantu; 8baitu obu tuba twina ebyokulya n'ebyokujwara, leka ebi bitumale. 9Abo abarurukira itungo bagwa omu kwohebwa n'omu mutego, batwalirizibwa okwegomba okutali kumu, okutarumu bwetegereza kandi okuleeta akabi, kukadikiza abantu omu kuhwerekerra, bakahwaho. 10Ningira omukoijo gw'omulingo ogu nugwo gwaihire abamu ha kwikiriza kwabu, emitima yabo baagireetera enaku nyingi. 11Baitu iwe, omuntu wa Ruhanga, ebi byona obiirukege; omutima gwawe gwona ogute ha buhikiriire, ha kutiina Ruhanga, okwikiriza, okugonza okugumiisiriza na ha kukwata mpora. 12Rwana masaija obulemu bw' okwikiriza; ogumire ha bwomeezi obutahwaho obu wayetiirwe kandi obu wayatwire kurungi noorahira omumaiso g'abakaiso baingi. 13Hati nu, ninkuteererra omu maiso ga Ruhanga anyakwomeeza ebintu byona, n'omumaiso ga Kristo Yesu ayayatuliire kimu omumaiso ga Ponsiyo Pilaato nkooku ali kaiso ow'amazima, 14ohonderege eki nakuragiire, otaina kamogo kandi otaina eky'orukujunaanwa, okuhika MUKAMA waitu Yesu Kristo obu alizooka. 15Okuzooka kunu, omu kasumi kakwo, Rutakirwa wenka nuwe alikumanyisa. Nuwe MUKAMA w'abakama kandi Omulemi w'abalemi. 16Ogu wenka nuwe atafa kandi aikara omu musana ogutahikwaho, atakarorwahoga kandi atasobora kurorwa muntu n'omu. Aheebwe ekitiinisa kandi ahangirize ebiro n'ebiro. Amiina. 17Abaguuda ab'omunsi munu, obahabule baleke kwehurra, n'okuta emitima yabo ha itungo eritaikaraho; baitu bagite hali Ruhanga anyakutuheera kimu byona ebitusemeza. 18Abantu abo basemeriire kukora kurungi; bakole ebikorwa ebirungi bingi, babe benda kandi bagabe n'omutima gumu. 19Oku nukwo kweyombekera omusingi ogugumire ogw'ebiro ebiriija, nukwo basobole kutunga obwomeezi, nubwo bwomeezi obuhikire kwo. 20Mwana wange Timoteho, linda eki wakwasiibwe. Wetentale orubazo orutarumu kutiina Ruhanga, n'empaka abantu abamu ezi beeta magezi, kandi kunu tikirikwo. 21Habwokuba abamu obu bahondera amagezi ago bahabira kimu, nibaruga omu muhanda ogw'okwikiriza. Embabazi za Ruhanga ziikale na iwe.

will be added

X\