1 TIMOTEHO 5

1Otalicoomera musaija mukuru, baitu omuhabulege nkooku waakuhabwire sso. Abasigazi obakole kurungi nka bagenzi baawe, 2abakazi bakuru obakorre ebirungi nk'ebi wakukoliire nyoko, kandi abaisiki nka banyanyoko, omu burukwera bwona. 3Abafaakati nyakabara, obatemuga ekitiinisa. 4Omufaakati obu araaba aina abaana rundi abaijukuru, abaana abo leka babanze beetegereze ediini ebi erukubaragira kukorra ab'oruganda rwabo, n'ebi basemeriire kugarurra bazaire baabo; habwokuba eki nikyo Ruhanga arukusiima. 5Omufaakati nyakabara, ataina kiroleererwa, okunihira kwe kwona akutaire hali Ruhanga, aikara naayesengereza kandi naasaba ekiro na nyamusana. 6Baitu omufaakati anyakwenagiriza, asisana nk'afiire, noobu araaba akyali mwomeezi. 7Eki okibasoborre nukwo baleme kuba n'ebi barukujunaanwa. 8Kakuba habaho omuntu ataina eki arukukorra ab'obuzaale bwe, okukira muno ab'oruganda rwe mali, aba anagiire kimu okwikiriza, kandi aba ali mubi okukira ogu atakaikirizaaga. 9Anyakuhandiikwa nk'omufakaati nuwe ogu anyakuhikize emyaka nkaaga y'obukuru, ayaswirweho omusaija omu, 10kandi amanyirwe habw'ebikorwa ebirungi ebi akora, nk'ayayoroire kurungi abaana, ayakuniire abagenyi, ayanaabisize abantu ba Ruhanga ebigere, ayahumwize abali omu mihito, kandi ayayeheerireyo kimu okukora kurungi omu byona. 11Baitu abafaakati abato otabaikiriza; habwokuba omubiri obu gubalemesa, gubaiha hali Kristo, bagonza kugaruka kuswerwa. 12Nukwo beeretera omusango habw'okutahikiriza ekiragaano kyabo eki baabandiize kuragaana na Kristo. 13Tikiri eki kyonka, baitu bataahirirwa n'obugara, batandika kwenjeera, nibaruga munu nibataaha muli. Tibuli bugara bwonka, nibabaza ebi bataakubaliize. 14Nahabweki naakugondeze abafaakati abato baswerwe, bazaale abaana, barolerre amaka gaabo, nukwo abanyanzigwa baleke kubona obwiho obw'okutubazaaho kubi. 15Ningira abamu omuli bo bakahaba ira, nibakuraatira Sitaani. 16Omuntu weena arukwikiriza, obu araaba aina abanyabuzale be abafaakati, abakoonyere; ekitebe ky'abaikiriza kireke kwetweka obulemeezi obu, nukwo kisobole kukoonyera abafaakati nyakabara. 17Abakuru abarukwebembera kurungi, leka baheebwe ekitiinisa okukira abandi, muno muno abo abarukukora omulimo ogw'okurangirra n'okwegesa. 18Ebihandiiko Ebirukwera bigamba biti: “Omuntu arukukugesira, aikirizibwa kutwara ha buro.” kandi biti: “Omukozi asemeriire empeera ye.” 19Otaliikiriza eki barukujunaana omukuru w'ekitebe, rundi buli nikigumibwa abakaiso babiri rundi basatu. 20Kandi abo abanyakulemera omu kibi, obahane omumaiso ga boona, nukwo abandi baikale nibatiina. 21Ninkuteererra omumaiso ga Ruhanga, n'aga Yesu Kristo, n'aga bamalaika abataraterebukire, ebiragiro binu obikwase boona atarukusoroora, nookora byona omu bwinganiza. 22Otalyanguhiriza okutaho abantu emikono, kandi oleke kwetaba omu bibi by'omuntu ondi; oikalege n'omutima ogurukwera. 23Otongera kunywa amaizi gonka, baitu onywehoga n'otwarwa tuke habw'enda yawe na habw'endwara yawe enyakwikara niimuka. 24Ebibi eby'abamu bizooka bwango, byeyoleka batakacweriiwe musango, baitu eby'abandi bizooka haahingwireho akasumi. 25Ebikorwa ebirungi nabyo nukwo bizooka bwango biti; noobu biba bitakazookere, baitu tibisobora kwikara biserekerwe.

will be added

X\