1 TIMOTEHO 4

1Mwoyo Ahikiire nagamba bbwa ngu, omu biro eby'omumaiso abamu balinaga okwikiriza, nibahabisibwa emyoyo ey'ebisuba n'enyegesa za Sitaani, 2nibahabisibwa obugobya bw'ababiihi b'ebisuba abaina emitima egumangaine kandi esiiriziibwe Sitaani. 3Nubo abo abatanga abantu okuswerangana, baziza ebyokulya Ruhanga ebi yahangire kuliibwa abo abamwikiriza. Nubo abo abamanyire amazima kandi ababirya n'okusiima. 4Kyona Ruhanga eki yahangire kiba kirungi kandi tihakubaireho ekirukuzirwa kakuba kiriibwa n'okusiima; 5habwokuba nikiba kyeziibwe ekigambo kya Ruhanga hamu n'okusaba. 6Timoteho, obu olihabura oti ab'oruganda boona, oliba muheereza murungi owa Kristo Yesu anyakuta omutima ha by'okwikiriza n'eby'enyegesa enungi ei wakuraatiire. 7Oyecwereho kimu enganikyo ezitali za Ruhanga kandi ez'obudoma. Wemanyiize kutiina Ruhanga. 8Okwemanyiiza omu by'omubiri, noobu kuraaba nikugasa; baitu okutiina Ruhanga nikukirra hara omugaso; habwokuba oina eki orukunihira kutanga omu bwomeezi bunu n'omu bwomeezi obuliija. 9Ekigambo eki kya mananu kandi kisemeriire kwikiririzibwa kimu. 10Habwokuba eki nikyo turukutalibanira kandi nikyo turukwekambira. Ningira okunihira kwaitu kwona tukutaire hali Ruhanga Omwomeezi, Omujuni w'abantu boona, okukira muno ow'abaikiriza. 11Ebigambo binu obyegese kandi obiteererre. 12Hatabaho n'omu arukukugaya habw'okuba musigazi, baitu obe kyokurorraho ha baikiriza omu kubaza, omu ngeso, omu kugonza, omu kwikiriza, n'omu burukwera bw'omutima. 13Taho omutima okusomera abantu Ebihandiiko Ebirukwera, okubarangirra Amakuru Amarungi n'okubeegesa okuhika obu ndiija. 14Otanagaija ekisembo kya Mwoyo eki wahairwe habw'ebigambo abarangi bakugambireho, abakuru obu baakutaireho emikono. 15Emirimo egi yoona ogyekambire, ogiteho muno omutima, nukwo boona barole nkooku orukugenda omu maiso. 16Engeso zaawe ozeegendereze kandi oyetegereze n'enyegesa yawe; ogigumireho. Obu olikora oti, nubwo olyejuna kandi ojune n'abarukukuhurra.

will be added

X\