1 TIMOTEHO 3

1Ekigambo kinu ky'amananu: Omuntu weena obu ayenda obukuru bw' oburoleerezi, aba ayegombere omulimo murungi muno. 2Habweki omuroleerezi asemeriire kuba muntu ataina kyona eki arukujunaanwa; musaija anyakuswire omukazi omu, omwerinzi, omwetegereza, ateekaine, w'amakune, kandi anyakusobora kwegesa. 3Atali mutamiizi, atarukujumbuutuka baitu mukwata mpora. Muntu atarukukungana kandi atarukwemarra ha sente. 4Asemeriire kulema kurungi eka ye naayegesa abaana be kumuhurra n'okumutamu ekitiinisa omu byona. 5Omuntu obu atamanya kulema kurungi eka ye, asobora ata kurolerra akitebe ky'abaikiriza Ruhanga? 6Asemeriire kuba muntu anyakumazire omwanya ahindukiire Kristo, taikara kwekuliriza muno akasingwa omusango ogwasingire Sitaani. 7Kandi asemeriire kuba muntu arukusiimwa n'abantu ab'aheeru, kuba kitaba kwo naija kujumwa kandi agwe omu mutego gw'Omwohi. 8Abaheereza nabo basemeriire kuba bantu b'omutima ogugumire, abatali b'enkuru ibiri, abatarukunywa muno marwa, n'abataina mukoijo gw'ebintu. 9Basemeriire kulinda ensita z'okwikiriza n'omutima gumu. 10Baitu nabwo, babanze balengesebwe. Kakuba bazooka nkooku bahikire, batandike obuheereza bwabu. 11Abaheerezakati nabo basemeriire kuba b'omutima ogugumire kandi abatarukugeya. Babe beerinzi kandi beesigwa omu byona. 12Abaheereza babe n'omukazi omu, baleme kurungi abaana babo hamu n'eka yabo; 13habwokuba abo abahikya kurungi obuheereza bwabo, beetungira ibara lirungi kandi abantu baabeesiga muno habw'okugumya okwikiriza oku baina omu Kristo Yesu. 14Ninihira kwija owaanyu bwango, baitu nkuhandiikire binu, 15kakuba nkererwa, nukwo osobole kumanya engeso abantu ezi basemeriire kuba nazo omu ka ya Ruhanga. Niryo iramizo lya Ruhanga omwomeezi, enyomyo kandi orugo orw'amazima. 16Na itwe leka twatule eby'ensita eby'enyikiriza yaitu nkooku biri bikuru mali. Nibyo ebirukugamba biti: Akafooka muntu, yagumibwa Mwoyo Ahikiire, yarorwa bamalaika, yarangirirwa omu mahanga, yaikirizibwa ab'omunsi yoona, yatwarwa omu iguru n'ekitiinisa.

will be added

X\