1 TIMOTEHO 2

1Eky'okubanza, nimbateererra nti; Musabire abantu boona, nimubeesengereza, nimubatonganirra, kandi nimubasiimira. 2Musabire abakama n'abalemi boona, nukwo twikale tuteekaine, twina obusinge, nitutiina Ruhanga kandi nitwoleka engeso nungi omu byona. 3Eki kirungi kandi nikisiimwa Ruhanga ayatujunire. 4Nuwe anyakugonza abantu boona bajunwe kandi bamanye amazima. 5Ningira haroho Ruhanga omu, kandi n'omuteeraniza omu, nuwe muntu Yesu Kristo anyakuteeraniza Ruhanga n'abantu, 6Ayayehaireyo kuba ndehwa ya boona, kandi eki akakikora akasumi kaakyo obu kahikire. 7Eki nikyo nakomiirwe mbe murangirizi kandi mukwenda okwegesa Abanyamahanga eby'okwikiriza n'eby'amazima (na hati nimbaza amananu, tindukubaza bisuba). 8Ekindi eki ndukwenda, abasaija beebemberege okusaba omu biikaro byona, baimukize kurungi emikono yabo, bataina kiniga rundi enkungani. 9Kandi ninyenda abakazi bajwale ebyokujwara ebisemeriire kandi ebibahikire, batasibire isoke, noobwakuba kujwara eby'ezaabbu, eruuru, rundi ebijwaro by'omuhendo mwingi; 10baitu bejweke ebikorwa ebirungi nkooku kisemeriire abakazi abarukutiina Ruhanga. 11Omu kasumi ak'okwegesibwa, omukazi aikale aculire kandi naayebundaaza. 12Tindukwikiriza mukazi kwegesa rundi kutegeka abasaija; baitu aikale aculiire. 13Ningira Adamu nuwe yabandize kubumbwa, nukwo haakurataho Eva. 14Kandi Adamu atabiihabiihwe, baitu omukazi nuwe yabiihabiihirwe, yagwa mu kibi. 15Kyonka omukazi alijunwa habw'okuzaara abaana, kakuba agumire omu kwikiriza, aina engonzi, oburukwera, hamu n'engeso nungi.

will be added

X\