1 TIMOTEHO 1

1Nyowe Paulo, omukwenda wa Kristo Yesu, ayakomerwe kandi natumwa Ruhanga ayatujunire na Kristo Yesu okunihira kwaitu, 2Ninkuhandiikira iwe Timoteho, omwana wange mali omu kwikiriza: Ninkugondeza emigisa, embabazi, n'obusinge ebiruga hali Ruhanga Isiitwe na Kristo Yesu MUKAMA waitu. 3Oikaleyo Efeeso nkooku nakuteereriire obu nkaba ningenda Makedoniya, nukwo otange abantu abamu, baleke kwegesa enyegesa endi. 4Baleker'aho n'okwemarra ha nganikyo ez'okwehangahanga, baleker'aho n'okurondooza eby'obwijukuru obutaina nambere bugarukira, ebirugwamu empaka, baitu bitarukumanyiza abantu engeso enungi ezirukuleetwa okwikiriza. 5Kandi kunu itwe eki turukugenderra omu nyegesa zaitu, nizo ngonzi eziruga omu mutima ogusemiire n'omu biteekerezo ebihikire, n'omu kwikiriza okutarumu obugobya. 6Abantu abamu abanyakuruga hali ebi, bahabira omu mpaka ezitaina makuru, 7bagonza kufooka beegesa b'ebiragiro, kunu tibarukwetegereza ebi barukwegesa rundi ebi barukugumya. 8Kyonka itwe tumanyire Ebiragiro nkooku biri birungi, kakuba omuntu abihondera omu mulingo oguhikire. 9Baitu kinu nikyo kisemeriire kwetegerezibwa: Ebiragiro tibiteebwaho habw'abarukukora kurungi, baitu biteebwaho habw'abeemi n'entahurra, habw'abatatiina Ruhanga n'abasiisi, habw'abatata mutima ha diini, n'abasiisa ebya Ruhanga, habw'abaita baisebo rundi banyinabo, na habw'abaisi b'abantu abandi, 10habw'abasiihani, abakuuhya, n'ababuza abantu, habw'ababiiha ebisuba n'abarahira ebisuba, n'ekindi kyona ekirukuhakaniza enyegesa enyakuhikire. 11Egi niyo nyegesa erukwikirraniza n'Amakuru ago Amarungi kwo aga Ruhanga anyakuhaisanizibwa, nyowe aga nakwasiibwe. 12Ninsiima Kristo Yesu MUKAMA waitu ayampaire amaani ag'okukora omulimo gunu, habwokuba akarora nkooku ndi mwesigwa nukwo kunkoma kumuheereza, 13kara noobu ndiba namujumire, namuhiiganiza, kandi naamubazaaho kubi; baitu akangirra embabazi habwokuba ebi nkabikozesibwa obutamanya, ntakaikiriize. 14MUKAMA waitu akangirra embabazi nyingi, yampa okwikiriza n'engonzi ebi tutunga omu Kristo Yesu. 15Ekigambo kinu ky'amananu kandi kisemeriire kwikiririzibwa kimu, ekirukugamba kiti: Kristo Yesu akaija omunsi okujuna abasiisi. Kandi omuli abo, ninyowe ow'okubanza. 16Baitu eki nagiririrwe embabazi nikyo kinu: omuli nyowe omusiisi ow'okubanza, Yesu Kristo ayolekeremu okugumiisiriza kwe okutaina h'okugarukira, kube kyokurorraho ha bandi abarukwija kumwikiriza, basobole kutunga obwomeezi obutahwaho. 17Ruhanga omu wenka, MUKAMA ow'ebiro n'ebiro, atafa kandi atarorwa, ahaisanizibwe kandi aheebwe ekitiinisa ebiro n'ebiro! Amiina. 18Binu nibyo ndukukuteererra mwana wange Timoteho. Bihikaana n'ebi abarangi baakugambireho kara. Leka na hati bikuhe amaani ag'okurwana kurungi, 19ogumye okwikiriza, omutima gwawe nkooku gukuhabura. Abantu abamu habw'okutafaaho omutima ebi gurukubahabura, bakafeerwa okwikiriza kwabo. 20Omuli abo nuho hali Himenaayo na Alekizanda, aba nalekiire Sitaani, nukwo beege kutajuma Ruhanga.

will be added

X\