1 ABATEESALONIKA 5

1Bagenzi bange, eby'obusumi n'emyaka timurukwetaaga kubihandiikirwa. 2Habwokuba inywe inywenka nimumanya kurungi ekiro eky'okugaruka kwa MUKAMA kiriija nk'omusuma oku aija omu bwire bw'ekiro. 3Abantu obu baba nibagamba bati: “Haroho obusinge n'okuteekaana”, nubwo bahikwaho okuhwerekerra okwa bwango nkooku ebisa bihikaho omukazi anyakwina enda, kandi tihalibaho ow'alitabuka. 4Inywe bagenzi bange, timuli omu mwirima, ekiro eki kubahikaho nk'omusuma. 5Habwokuba inywena muli baana b'omusana kandi muli baana b'ekyerezi; tituli b'ekiro rundi b'omwirima. 6Nukwo nu, tuleke kugwijagira abandi nkooku bakora; baitu twikale niturora kandi tuleke kutamiira. 7Ningira abo abagwijagira, bagwijagira ekiro, kandi n'abo abatamiira, batamiira ekiro. 8Baitu itwe nkooku tuli baana b'omusana, tuleke kutamiira, twekingire ha kifuba engabu y'okwikiriza n'okugonza, kandi ha mutwe tuteho enkofiira y'okunihira okujunwa. 9Ningira Ruhanga atatuteereho kufubirwa, baitu akatuteeraho kujunwa MUKAMA waitu Yesu Kristo, 10ayatufeeriire nukwo twomere hamu nawe, obu tuba niturora rundi tugwijagiire. 11Habweki muhuumuzangane kandi mugumyangane nkooku murukukora hati. 12Bagenzi bange nitubeesengereza, mutemu ekitiinisa abo abarukukora omuli inywe, abeebembezi kandi abahabuzi banyu omu MUKAMA, 13kandi mubahe ekitiinisa kingi nimubagonza habw'omulimo babakorra. Mwikarane n'obusinge. 14Bagenzi bange nitubateererra, muhabule abagara, mugumye abataina maani omu mutima, mukonyere abaceke. Kandi abo boona mubagumiisirize. 15Mwerinde, haleke kubaho n'omu omuli inywe arukuhoora enzigu habw'obubi obu akoliirwe; baitu obutoosa mulengeho okukorrangana oburungi n'okubukorra abandi boona. 16Musemererwege obutoosa, 17musabege obutalekerra, 18musiime Ruhanga omu byona ebinyakubaho; habwokuba eki nikyo Ruhanga abagondeza omu Kristo Yesu. 19Muleke kubundiika Mwoyo Ahikiriire, 20muleke kugaya eby'oburangi; 21baitu mwetegereze buli kintu, kandi mugumire ha birungi. 22Mwetantale ekibi ky'omulingo gwona. 23Ruhanga, MUKAMA ow'obusinge, abeereze kimu. Emitima yanyu, emyoyo yanyu, n'emibiri yanyu ikale kurungi etaina kamogo okuhika ha kiro eky'okugaruka kwa MUKAMA waitu Yesu Kristo. 24Ruhanga ayabeesire aba mwesigwa kandi alihikiriza ebi yaraganiize. 25Bagenzi bange, mutusabire! 26Muramukye ab'oruganda boona n'omwoyo omurungi nimubagwa omu kifuba. 27Nimbateererra omu ibara lya MUKAMA, ebbaruha enu esomerwe ab'oruganda boona. 28Embabazi za MUKAMA waitu Yesu Kristo ziikale na inywe.

will be added

X\