1 ABATEESALONIKA 2

1Bagenzi bange, inywe inywenka nimumanya okubunga kwaitu omuli inywe nkooku kutarafiire busa. 2Noobu turaaba twabonesiibwe kandi twaswaziibwe omu Filipi nkooku murukumanya; baitu Ruhanga waitu akatuha obumanzi obw'okubarangirra Amakuru Amarungi nituhakanizibwa muno. 3Kandi binu ebi turukubeegesa tibirugwamu nsobi, tibiri bibi, tibirumu bugobya. 4Baitu Ruhanga nkooku yakukomere, akatukwasa Amakuru Amarungi ganu, na itwe nukwo tugarangirra tutarukugenderra kusiimwa abantu, baitu kusiimwa Ruhanga anyakumanya emitima yaitu. 5Mukimanyire kurungi, kandi Ruhanga nuwe kaiso waitu, itwe titukabazaaga bigambo by'okunwekanweka, rundi eby'okuswekerra omururu gwaitu. 6Titwaserraga kitiinisa omu bantu: omuli inywe rundi omu bandi, kunu nk'abakwenda ba Kristo twakusoboire kukisaba. 7Baitu tukabakwatirwa embabazi, nk'omulezi arukulera abaana be. 8Nukwo habw'okubagonza muno, tukamalirra kubagana na inywe, tikuli kubagana Amakuru Amarungi ga Ruhanga gonka, baitu n'obwomeezi bwaitu bwonyini, habwokuba mukaba mumazire kufooka nganjani zaitu mali. 9Bagenzi bange, nimwijuka omulimo n'okutalibana kwaitu; twakoraga nyamusana n'ekiro nukwo tuleke kulemerra omuntu weena omuli inywe, obu tukaba nitukyabarangirra Amakuru Amarungi ga Ruhanga. 10Inywe muli bakaiso, kandi Ruhanga nawe kaiso, engeso zaitu nkooku ziikara ziri nungi, zihikiriire kandi itarukunyoomwa inywe abaikiriza. 11Nimumanya nkooku twateererraga buli omu omuli inywe, n'oku twayekambisaaga boona kandi twahanaga nka isebaana oku akora abaana be, 12nukwo mube n'engeso ezirukusiimwa Ruhanga, anyakubeeta kutaaha omu bukama bwe n'omu kitiinisa kye. 13Kandi na itwe nikyo tusiimira Ruhanga obutoosa, habwokuba obu mwahuliire ekigambo kya Ruhanga eki twabatebiize, mutakiikirize nk'ekigambo ky'abantu, baitu mukakiikiriza nk'ekigambo kya Ruhanga ekirukukora omuli inywe abaikiriza. Kandi mazimakwo nukwo kiri. 14Ab'oruganda, inywe mukasisana ebitebe by'abaikiriza Ruhanga omu Kristo Yesu ebiri Buyudaaya; habwokuba abantu ab'ihanga lyanyu bakababonesa enaku ezirukusisana nk'ez'abaikiriza ba Buyudaaya baabonesiibwe ab'ihanga lyabo. 15Nubo abaisire MUKAMA Yesu n'abarangi, nubo baatubingire, baabiihiza Ruhanga kandi baahakaniza abantu boona. 16Bakatutanga kwegesa Abanyamahanga ebigambo ebisobora kubaleetera okujunwa, nukwo Abayudaaya kuhikiriza bati ebikorwa byabo ebibi. Baitu ekifubiro kya Ruhanga kirinzirwe kyabahikaho. 17Bagenzi bange, obu tukaba twakabarugaho akacu kake twahukaniize emibiri etali myoyo, tukeekamba muno, twina ekihika kingi eky'okugaruka kubarora; 18habwokuba tukagonza kwija owaanyu. Nyowe Paulo nkalengaho emirundi nyingi, baitu Sitaani akantanga. 19Baitu nu, MUKAMA waitu Yesu obu aliija, okunihira kwaitu, okusemererwa kwaitu, n'ekondo yaitu ebirukutusiimisa omumaiso ge nibyo biha? Ti niinywe? 20Habwokuba niinywe kitiinisa kyaitu n'okusemererwa kwaitu.

will be added

X\