1 PETERO 5

1Nahabweki ninteererra abakuru omuli inywe, nyowe omukuru nyakyabu, kaiso w'okubonesibwa kwa Kristo kandi arukubagana ha kitiinisa ekirukwija kusuukurwa: 2Murolerre igana lya Ruhanga eri mwakwasiibwe, mulirolerre mutarukuhambirizibwa, baitu nimugonza; mutarukukorra empeera, baitu nimuheereza n'omuhimbo. 3Mutalemesa ireme abo aba murukurolerra, baitu mube kyokurorraho ekirungi hali igana. 4Kandi Omuliisa omukuru obu alizooka, muliheebwa ekondo ey'ekitiinisa etacucuka. 5Na inywe abasigazi mworobere abakuru. Inywena mwekambire kuheerezangana nimwebundaaza, buli omu omu rubu rwe; habwokuba: “Ruhanga ahakaniza abeekuliiriza; baitu abeebundaaza, abaha omugisa.” 6Nahabweki mwebundaaze mwikirize kulemwa obusobozi bwa Ruhanga, nukwo akasumi obu kalihika asobole kubanyumiza. 7Okutuntura kwanyu kwona mukumukwase, habwokuba abataho omutima. 8Mwerinde kandi mwikale nimurora. sitaani, omuzigu wanyu, naarabanganamu nk'entale erukubbukura, neeserra ou eraajunjubura. 9Mumwangirre, mugumiire omu kwikiriza kwanyu, nimumanya bagenzi banyu ab'omunsi yoona nkooku bahikwaho okubonesibwa nk'okwanyu. 10Kandi obu muliba mumazire kubonesibwa akacu kake, Ruhanga ow'embabazi nyingi, ayabeetiire ekitiinisa kye ekitahwaho omu Kristo, alibahuumuza, alibagumya, kandi alibongera amaani. 11Obulemi bwikale nawe ebiro byona. Amiina. 12Mbahandiikiire ebbaruha enu engufu, ninkoonyerwa Siraasi ou ndukumanya nkooku ali w'oruganda omwesigwa. Nimbateererra kandi nimbamanyisa enyegesa enu nkooku erumu embabazi za Ruhanga ez'amazima; mugigumiremu. 13Ekitebe ky'abaikiriza abali Bbabbulooni, akyakomerwe Ruhanga nka inywe, nikibaramukya. Omwana wange Mariko nawe naabaramukya. 14Muramukyangane nimugwangana omu kifuba n'engonzi. Obusinge bwikale na inywe inywena abali omu Kristo!

will be added

X\