1 PETERO 4

1Kristo nkooku yabonabonesiibwe omu mubiri, na inywe mwikale mwina omutima ogugumire nk'ogwe, habwokuba weena anyakubonabonesibwa omu mubiri, alekeraho kukora ebibi, 2nukwo amale ebiro ebimusigaire akyaina omubiri atarukulemwa okwegomba kubi okw'abantu, baitu naalemwa entegeka ya Ruhanga. 3Omu biro ebyahingwire mukamara akasumi kaingi nimukora ebi Abanyamahanga basiima. Mukaikara omu busiihani, omu kworobera okwegomba kubi okw'omubiri, omu tamiiro, omu magenyi amabi, omu bididi ebirumu ebitamiiza, n'omu kuramya abacwezi. 4Hati Abanyamahanga nibahunirra okurora mutarukuteerana nabo omu ngeso mbi nk'ezi kandi nikyo barukubajumira. 5Baitu bbo balyetonganira hali Ogu anyakweteekaniza kucwera omusango aboomiire n'abafiire. 6Eki nikyo Amakuru Amarungi gaarangiriirwe na hali abantu abaafiire. Noobu baraaba baamazire kucwerwa omusango omu mubiri nk'abantu boona, baitu balisobora kuhika ha bwomeezi bwa Ruhanga omu myoyo yabo. 7Empero ya byona eri haihi; nahabweki mwikale nimwerinda kandi muteekaine nukwo musobole kubaza na Ruhanga. 8Okukira byona mwikale nimugonzangana, habwokuba engonzi iswekerra ebibi bingi. 9Mugirranganege amakune mutaina kahyeme. 10Buli omu nkooku yahairwe ekisembo, mubikozese kukoonyera abandi nk'abakeeto ba Ruhanga abarungi abaahairwe ebisembo ebitarukusisana. 11Weena anyakubaza, abaze Ruhanga ebi amusuukuliire. Weena anyakuheereza, aheereze n'amaani Ruhanga aga amuhaire; nukwo omu byona Ruhanga akugizibwe omu Yesu Kristo, anyakwina ekitiinisa n'obulemi ebiro byona. Amiina. 12Abagonzibwa, muleke kuhunirizibwa ebirengeso eby'amaani ebirukubagwera, mukaba nk'abagweriirwe ihano. 13Baitu musemererwe muno habw'okubagana ha kubonesibwa kwa Kristo, nukwo ekitiinisa kye obu kirisuukurwa, mulikyanganuka kandi musemererwe. 14Kakuba babajuma habw'okwikiriza Kristo, muli b'omugisa, habwokuba Mwoyo ow'ekitiinisa, Mwoyo wa Ruhanga aikara hali inywe. 15Baitu hatabaho n'omu omuli inywe arukubonabonesibwa habw'obwisi, habw'obusuma, habw'okukora kubi, rundi habw'okwetaahya mu by'abandi. 16Kakuba omuntu abonabonesibwa habw'okuba Mukristo, aleke kukwatwa ensoni; baitu akugize Ruhanga habw'okwetwa ibara eri. 17Ningira akasumi ak'okucwa omusango kahikire. Okucwa omusango nikubandiza ha bantu ba Ruhanga, Obu kuraaba nikubandiza hali itwe, abo abataikiriza Amakuru Amarungi ga Ruhanga baliba bata? 18Kikahandiikwa kiti: “Omuntu ahikiriire obu araaba atarukwanguhirwa muno kujunwa, leero atarukutiina Ruhanga n'omusiisi baliba bata?” 19Nahabweki abo ababonabonesibwa nkooku Ruhanga agonza, baikale nibakora ebirungi, kandi obwomeezi bwabo babukwase Omuhangi omwesigwa.

will be added

X\