1 PETERO 3

1Na inywe banyinabwenge, muhurrege ba iba-inywe, nukwo abamu mulibo noobu baraaba batarukwikiriza kigambo kya Ruhanga, baitu bahindurwe engeso zanyu enungi, mutaina eki murukubagambira, 2obu barora engeso zanyu enungi ezirumu kutiina Ruhanga. 3Oburungi bwanyu buleke kuba ha bintu ebirukuzooka, nimusiba isoke, nimwekunisa na zaabbu, nimujwara ebirukwandaara; 4baitu oburungi bwanyu bube bw'omunda omu mitima yanyu, nk'ekintu eky'omuhendo ekiikaraho, nugwo omwoyo gw'embabazi kandi omuculeezi, omwoyo ogw'omuhendo mali omumaiso ga Ruhanga. 5Abakazi abahikiriire aba ira abaanihiraga omu Ruhanga, nabo nukwo baayecumaga bati, kandi baahurraga baibabo, 6nka Saara oku yahurraga Abburahamu, naamweta mukama we. Hati na inywe muli bahara be obu muraaba nimukora ebihikire, mutarukwikiriza kintu na kimu kubakanga. 7Na inywe banyinamaka, mwikale n'abakazi banyu nimubataho omutima kandi nimubatamu ekitiinisa, habwokuba bbo b'amaani make. Baitu bagweterwa hamu na inywe ekisembo kya Ruhanga eky'obwomeezi. Obu muraakora muti, tiharukwija kubaho kintu kyona ekirukutanga okusaba kwanyu. 8Eky'okumalirra, inywena mube n'omwoyo gumu, mugirrangane embabazi, mugonze ab'oruganda, mugire omutima ogurukworoba kandi ogurukwebundaaza. 9Muleke kugarurrana obubi rundi okujumangana; baitu musabirangane omugisa. Ningira eki nikyo Ruhanga yabeetiire, nukwo abahe omugisa. 10Kikahandiikwa kiti: “Ogu anyakugonza obwomeezi n'okutunga obusinge, atange orulimi rwe kubaza ebibi, n'akanwa ke akatange kubaza eby'obugobya; 11ayetantale ebibi, akole ebirungi; aserre obusinge kandi abwitanire. 12Habwokuba amaiso ga MUKAMA gaikara garoleriire abahikiriire, kandi amatu ge agatega okusaba kwabo. Baitu amaiso ga Ruhanga gakimba abo abakora kubi.” 13Nooha asobora kubakora kubi obu muraaba nimwekambira okukora ebirungi? 14Noobu muraaba nimubonesibwa habw'obuhikiriire, muliheebwa omugisa. Abantu abo mutabatiina kandi mutaharaza omutima, 15baitu muhe Kristo ekitiinisa mu mitima yanyu, abe MUKAMA wanyu. Mwikalege mweteekaniize okusoborra kurungi buli muntu anyakubakaguza ha kunihira oku mwinakwo; 16baitu nabwo mukikole muli baculeezi nimuha Ruhanga ekitiinisa. Kandi mwikale mwina omutima omurungi, nukwo abo abarukubaza kubi ha ngeso enungi ezi mwina habw' okuhondera Kristo, obu baraabajumaga bakwatwe ensoni. 17Haakire mubonabonesibwe habw'okukora ebirungi, Ruhanga obu araaba naakisiima, hatali okubonesibwa habw'okukora ebibi. 18Kristo akafa habw'ebibi omurundi gumu yamara. Ahikiriire akafeera abatahikiriire, nukwo asobole kutuhikya hali Ruhanga. Omubiri gwe bakagwita baitu omwoyo gwe Ruhanga akagwomeeza. 19Omwoyo ogu nugwo yagendiiremu kurangirra emyoyo y'abaafiire ei ekaba eri omu nkomo. 20Nubo abantu abatarahuliire kara, Ruhanga obu akaba abagumiisiriize omu biro bya Noha, eryato erikooto obu likaba nirikorwa, abantu abake, nka munaana bonka eri baajunirwemu okutaitwa amaizi. 21Ekyokurorraho eki nikisisana okubatizibwa okurukujuna inywe. Okubatizibwa oku tikiri kintu ekirukwogya iko ha mubiri, baitu nukwo okusaba kwaitu, Ruhanga atuhe omutima ogwezire habw'okuhumbuuka kwa Yesu Kristo. 22Nuwe ogu ayagenzire omwiguru, ali ha mukono ogw'obulyo ogwa Ruhanga, naalema ebitebe bya bamalaika, eby'ab'obusobozi, n'eby'amaani.

will be added

X\