1 PETERO 2

1Nahabweki, muleke itima lyona n'obugobya bwona, muleke obuteesigwa, ihali n'okuhangirra kwona. 2Abaana enkerembe abaakazarwa juba nkooku beetaaga amata ag'omubiri, na inywe mwetaaga amata amarungi ag'omwoyo, nukwo gabakuze, gabahikye ha kujunwa; 3habwokuba “Muroleze ha burungi bwa MUKAMA”, nkooku kyahandiikirwe. 4Mwije hali ogu. Nuwe ibaale eryomeezi, ibaale abantu eri baayangire; baitu eryakomerwemu Ruhanga kandi ery'omuhendo. 5Na inywe mube nk'amabaale agoomeezi, agombekerwemu enju ey'omwoyo, mube abanyakatagara abarukwera, nukwo mutambe ebyonzira eby'omwoyo, ebyonzira ebirukusiimwa Ruhanga omu Yesu Kristo. 6Ebihandiiko Ebirukwera nibigamba biti: “Dara, nimbyara omu Siyoni ibaale ery'obugumizo, ibaale eryakomerwe kandi ery'omuhendo. Weena anyakumwikiriza, talikwatwa nsoni.” 7Habweki, hali inywe abaikiriza, ibaale eri, ly'omuhendo; baitu habw'abo abataikiriza: “Ibaale lyonyini abombeki eri baayangire, niryo lyafookere bugumizo bw'enju.” 8Kyayongera kiti: “Lyaba ibaale eriritabaijura abantu, kandi mwandara ogulibanaga”; batabaijuka habwokuba tiboorobera kigambo, nkooku Ruhanga yakibategekiire. 9Baitu inywe muli ruganda orukomerwemu, orwina abanyakatagara b'oruganda rwa MUKAMA, ihanga erirukwera, bantu ba Ruhanga mali, nukwo mumanyise ebikorwa ebirukuhuniriza eby'Ogu ayabeesire, yabaiha omu mwirima yabataahya omu musana gwe ogw'amahano. 10Ira mukaba mutali bantu be, baitu hati muli bantu ba Ruhanga. ira mukaba mutagiriirwe mbabazi, baitu hati muzigiriirwe. 11Abagonzibwa, nimbeesengereza nk'abantu abali mu mahanga kandi abaazaahire, mwetantale okwegomba okw'omubiri okurukurwanisa emyoyo yanyu. 12Mugire engeso nungi omu Banyamahanga, noobu baraaba nibabeeta nkozi z'ebibi, baitu leka barole ebirungi ebi mukora, nukwo bakugize Ruhanga ha kiro eki aliiziramu. 13Habwa MUKAMA, mworobere ab'obusobozi boona abarukubalema, noobu araaba ali Kaisaali, habwokuba nuwe mukuru, 14rundi abalemi abakuru abatumirwe Kaisaali kufubira abo abanyakukora kubi, n'okusiima abo abanyakukora kurungi. 15Ningira Ruhanga kinu nikyo agonza, inywe okukora ebihikire, nukwo muculeeze obutamanya bw'abadoma. 16Mube bantu b'obugabe, baitu obugabe bwanyu mutabufoora byekwaso by'okusiisa; kyonka mwikale muli baheereza ba Ruhanga. 17Abantu boona mubatemuga ekitiinisa. Mugonzeege ab'oruganda. mutiinege Ruhanga. Kandi Kaisaali mumuhe ekitiinisa. 18Inywe abaheereza b'abantu, mworobere bakama banyu nimubatamu ekitiinisa kyona. Mutoorobera ab'embabazi rundi ab'amakune bonka, baitu n'abanyamwaga. 19W'omugisa ogu anyakugumiisiriza enaku ezi bamuboneseza busa habwa Ruhanga. 20Karungi ki aka mutunga obu mugumiisiriza kuteerwa habw'okukora kubi? Baitu obu mugumiisiriza kusaalizibwa habw'okukora kurungi, nimwija kusiimwa Ruhanga. 21Ningira eki nikyo mwayetiirwe, habwokuba Kristo nawe akabonesibwa habwanyu, yabasigira ekyokurorraho, nukwo na inywe muhondere ekirale kye. 22Uwe atakole kibi; akanwa ke katabemu bugobya. 23Obu yajumirwe, atajume; obu yabonesiibwe, atakange abaamuboneseze; baitu akeesiga Ruhanga anyakucwa emisango omu bwinganiza. 24Kristo wonyini, omu mubiri gwe akeetweka ebibi byaitu yabihikya ha musaraba, nukwo tuzirre kimu ekibi, kandi twemarre ha buhikiriire. Ebihuta bye nibyo byabakirize. 25Habwokuba mukaba muhabire nk'entaama, baitu hati muhabukire, mwagaruka hali Omuliisa kandi Omuroleerezi w'emyoyo yanyu.

will be added

X\