1 PETERO 1

1Nyowe Petero, omukwenda wa Yesu Kristo, nimpandiikira inywe abaazaahire mwararangira omu mahanga ga Ponto, Galatiya, Kapadokiya, Asiya na Bitiniya. 2Inywe abaakomerwe mwasororwa Ruhanga Isiitwe, mwayezibwa Mwoyo Ahikiriire nukwo mworobere Yesu Kristo kandi mumiisirwe esagama ye: Emigisa n'obusinge byeyongere omuli inywe. 3Ruhanga, Ise MUKAMA waitu Yesu Kristo, akugizibwe, Habw'embabazi ze enyingi tukazaarwa buhyaka, twatunga okunihira okugumire habw'okuhumbuuka omu bafu okwa Yesu Kristo; 4kandi twatunga obugwetwa obutahwaho, obutasiisikara, kandi obutacucuka Ruhanga obu atwahuliire omwiguru. 5Habw'okwikiriza, inywe nimulindwa amaani ga Ruhanga kandi alibajuna ha kiro kya ha mpero nambere alisuukurra entegeka ye. 6Eki kibaleetere okusemererwa, noobu muraaba muli b'okubona enaku hati okumara akaanya kake. 7Okubona enaku kuligumya amazima ag'okwikiriza kwanyu nkooku kuli kw'omuhendo okukira zaabbu enyakusobora kusiisikara, kunu neesemezibwa omurro. Okwikiriza kwanyu okw'amazima nikwija kubaleetera ekitiinisa, okusiimwa, n'okunyumizibwa Yesu Kristo obu aliboneka. 8Noobu muraaba mutakamubonaga, baitu nimumugonza. Noobu muraaba mutarukumurora hati, baitu nimumwikiriza kandi nimukyanganuka n'okusemererwa okutagambwa. 9Ekiruga omu kwikiriza kwanyu, nukwo kujuna emyoyo yanyu. 10Abarangi abaarangire eby' embabazi za Ruhanga ezi mukaba nimwija kugirirwa mu biro binu, bakaserra muno kandi baakaguliiriza ha kujunwa kunu. 11Bakakaguliiriza ha muntu rundi ha kasumi Mwoyo wa Kristo aka yagenderiire obu yaboolekere okubonesibwa kwa Kristo n'ekitiinisa ekirihonderaho. 12Bakasuukulirwa Ruhanga nkooku ebi bakaba batarukubiranga habwabu baitu habwanyu. Ebi nibyo ebigambo ebi mwegesebwa hati abo abarukubarangirra Amakuru Amarungi, nibakoonyerwa Mwoyo Ahikiriire ayatumirwe yaruga omwiguru. Kandi ebi nibyo bamalaika nabo beegomba kwetegereza. 13Habweki nu, mugumye emitima yanyu kandi mwerinde. Okunihira kwanyu kwona mukute ha mbabazi ezi muligirirwa ha kusuukurwa kwa Yesu Kristo. 14Nk'abaana abahulizi, muleke kusisana nkooku mukaba muli obu mwalemwaga okwegomba okubi okw'obutamanya bwanyu obwa ira. 15Baitu Ruhanga ayabeesire nkooku ahikiriire, na inywe mube bahikiriire omu ngeso zanyu zoona. 16Kikahandiikwa kiti: “Mube bahikiriire, habwokuba nyowe mpikiriire.” 17Omu kusaba kwanyu, obu muraaba nimweta Ruhanga Isiinywe, kandi nuwe anyakucwera buli omu omusango atarukusoroora, nasigikira ha bikorwa ebi yakozire, mwikale nimutiina kukora kubi ebiro byona by'okuzaahibwa kwanyu. 18Nimumanya nkooku mwacungwirwe, mwaruga omu ngeso ezitaina mugaso ezi mwaijukwire baisenkuru inywe, mutacungurwe n'ebintu ebihwaho, nk'efeeza na zaabbu, 19baitu mukacungurwa esagama ey'omuhendo eya Kristo, erukusisana ey'omwana gw'entaama ogutaina kamogo rundi kabara. 20Kristo ogu, Ruhanga akamukoma kara ensi etakahangirwe, yayolekwa habwanyu omu biro binu eby'okumalirra. 21Habwe, nimwikiriza Ruhanga ayamuhumbwire omu bafu, yamuha ekitiinisa. Nahabweki, okwikiriza n'okuhihira kwanyu bigumirege hali Ruhanga. 22Hati nkooku mumazire okweza emyoyo yanyu habw'okworobera amazima, kandi nimugonza ab'oruganda n'omutima gumu, mwekambire kugonzangana n'emitima yanyu yoona. 23Mukazaarwa buhyaka, mutarukuruga omu mbibo enyakucweka, baitu nimuruga omu mbibo etacweka habw'ekigambo kya Ruhanga ekyomeeza kandi ekiikaraho; 24habwokuba kikahandiikwa kiti: “Kyona ekyetwa omuntu kisisana obunyansi, n'ekitiinisa kyona eky'omuntu kisisana orwakyo orw'obunyansi. Obunyansi buhotoka, orwakyo rukunkumuka; 25baitu ekigambo kya MUKAMA kiikaraho ebiro byona.” kandi ekigambo eki, nugo Makuru Amarungi aga mwarangiriirwe.

will be added

X\