1 YOHAANA 4

1Abagonzibwa, muleke kwikiriza buli mwoyo, baitu emyoyo mugyetegereze, nukwo mumanye obu eraaba neeruga hali Ruhanga; habwokuba abarangi baingi ab'ebisuba bararangire omunsi. 2Aho nuho muraamanyira Mwoyo wa Ruhanga: Weena arukurangirra Yesu Kristo nkooku yazairwe omu mubiri, buli aina omwoyo oguruga hali Ruhanga. 3Baitu weena atarukurangirra Yesu, buli taina mwoyo oguruga hali Ruhanga. Ogu nugwo mwoyo gw'ogu arukurwanisa Kristo, ou mwahuliireho nkooku arukwija, kandi ahikire ira omunsi. 4Baana bange, inywe muli ba Ruhanga, kandi abarangi abo ab'ebisuba, mubasingwire; habwokuba Mwoyo anyakuli omuli inywe nuwe mukuru okukira oli ayaizire omunsi kurwanisa Kristo. 5Bbo b'ensi enu, habwokuba ebi barukugamba by'ensi, kandi ensi ebahuliriza. 6Itwe tuli ba Ruhanga. Weena arukumanya Ruhanga atuhuliriza, kandi atali wa Ruhanga tatuhuliriza. aho nuho tumanyira omwoyo ogw'amazima n'omwoyo ogurukuhabisa. 7Abagonzibwa, tugonzangane; habwokuba engonzi ziruga hali Ruhanga. Ogu anyakwina engonzi, aba azairwe Ruhanga kandi amanyire Ruhanga. 8Ogu ataina ngonzi tamanya Ruhanga, habwokuba Ruhanga nuwe ngonzi. 9Kinu nikyo kyayolekere engonzi za Ruhanga hali itwe: akatuma omunsi Omwana we omu wenka, nukwo atwomeeze. 10Kandi engonzi ezindukugamba nizo zinu: tukuli kugira ngu niitwe twagondeze Ruhanga, baitu nuwe yatugondeze, nukwo kutuma Omwana we abe ndehwa y'ebibi byaitu. 11Abagonzibwa, Ruhanga obu araaba yatugondeze ati, na itwe kituhikiriire kugonzangana. 12Tiharoho muntu araboine Ruhanga; baitu obu tuba nitugonzangana, Ruhanga aikara omuli itwe, kandi engonzi ze zihikirirra kimu omuli itwe. 13Aho nuho tumanyira nkooku twikara omu Ruhanga, nawe nkooku aikara omuli itwe habwokuba akatuha Mwoyo we wonyini. 14Tukarora kandi twagumya nkooku Isiitwe yatumire Omwana we kuba Mujuni w'ensi. 15Weena anyakwatura Yesu nkooku ali Mwana wa Ruhanga, Ruhanga aikara omuli uwe, nawe aikara omu Ruhanga. 16Nahabweki, nitumanya kandi nitwikiriza Ruhanga nkooku atugonza. Ruhanga nuwe ngonzi, kandi ogu anyakwikara omu ngonzi, aikara omu Ruhanga na Ruhanga aikara omuli uwe. 17Ekirukwoleka engonzi nkooku ihikirizibwa omuli itwe nukwo kwikara twina obwesige ha kiro ky'okucwerwa omusango, habwokuba enyikara yaitu omunsi munu, niyo emu n'eya Kristo. 18Engonzi tiigira butiini. Engonzi z'amazima ibinga obutiini bwona habwokuba anyakutiina, aba naatiina ekifubiro; nukwo kugamba, aba ataina ngonzi ezihikire. 19Itwe tugonza habwokuba Ruhanga nuwe yabandize kutugonza. 20Kakuba habaho arukugamba ati: “Ningonza Ruhanga”, kandi kunu naanoba mugenzi we, ogu mubiihi w'ebisuba; habwokuba atarukugonza mugenzi we ou arukurora, tasobora kugonza Ruhanga ou atakaroraga. 21Kandi kinu nikyo kiragiro Kristo eki yatuhaire ekigamba kiti: Ogu anyakugonza Ruhanga, agonzeege na mugenzi we.

will be added

X\