1 YOHAANA 2

1Baana bange, binu nimbibahandiikira nukwo muleke kukora ebibi; baitu omuntu weena obu araakora ekibi, amanye nkooku twina omutonganirizi anyakwikara na Isiitwe, nuwe Yesu Kristo omwinganiza. 2Nuwe ndehwa y'ebibi byaitu, kandi tibiri byaitu byonka, baitu n'eby'ensi yoona. 3Obu turaaba nitukwata ebiragiro bye, nikyo kirukugumya nkooku tumumanyire. 4Ogu anyakugamba ati: “Mmumanyire”, kunu tarukukwata biragiro bye, mubiihi w'ebisuba, kandi taina mazima. 5Baitu weena anyakuhondera ekigambo kye, ogu nuwe agonzakwo Ruhanga. aho nuho turukugumiza nkooku tuli omu Ruhanga: 6anyakugamba ngu, aikara omu Ruhanga, asemeriire kuraba omu muhanda Kristo ogu yarabiremu. 7Abagonzibwa, Ekiragiro ndukubahandiikira tikiri kihyaka, baitu kiragiro kikuru eki mukaba mwina kara. Ekiragiro eki ekikuru niyo nyegesa ei mwahuliire. 8Baitu nabwo nimbahandiikira ekiragiro ekihyaka, kandi amazima gaakyo nigazookera omu Kristo n'omuli inywe, habwokuba omwirima nigugenda kuhwaho, kandi omusana ogw'amazima gutandikire kujwa. 9Anyakugamba ngu, ali omu musana, kunu naanoba ow'oruganda, ogu aba akyali omu mwirima. 10Anyakugonza mugenzi we, aikara omu musana, kandi tiharoho ekiramwesiitaza. 11Baitu anyakunoba mugenzi we aba ali omu mwirima; kandi omwirima ogu nugwo agenderamu. Tamanya nambere arukugenda, habwokuba omwirima gumwisire amaiso. 12Baana bange, nimbahandiikira habwokuba ebibi byanyu bibaganyirwe habwa Yesu. 13Inywe baise-baana, nimbahandiikira habwokuba mumanyire Ogu ayabaireho okuruga kara. Inywe abasigazi, nimbahandiikira habwokuba musingwire Omubi ogu. Na inywe abaana, nimbahandiikira habwokuba Isiitwe nimumumanya. 14Inywe baise-baana, nimbahandiikira habwokuba mumanyire Ogu ayabaireho okuruga kara. Na inywe abasigazi, nimbahandiikira habwokuba muli b'amaani, ekigambo kya Ruhanga kiikara omuli inywe, kandi musingwire Omubi. 15Muleke kugonza ensi, noobu byakuba ebintu ebigirumu. Omuntu weena obu agonza ensi, buli aba atarukugonza Isiitwe. 16Habwokuba byona ebirukusangwa omunsi tibiri bya Isiitwe baitu by'ensi, kandi nibyo binu: okwegomba okubi okw'omubiri, okwegomba okubi okw'amaiso, n'okwenyumiza ha itungo. 17Ensi na byona ebyegombwamu bihwaho; baitu ogu anyakukora Ruhanga ebi agonza, aikaraho ebiro n'ebiro. 18Baana bange, akasumi ak'okumalirra kahikire. Mukahurra ngu, arukurwanisa Kristo naija. Na hati abarukurwanisa Kristo baizire baingi; eki nikyo kirukutumanyisa akasumi kandi nkooku kali k'okumalirra. 19Abantu abo bakaruga omuli itwe, kunu bakaba batali baitu, kakuba babaire baitu, bakwikaire na itwe; baitu bakaturugaho, nukwo kimanywe boona nkooku batali b'ekitebe kyaitu. 20Baitu inywe mukakomwa Ahikiriire Ogu, kandi inywena nimumanya amazima. 21Mu kubahandiikira, tindukugenderra kugamba ngu, timumanyire amazima, baitu nimugamanya, kandi nimumanya ebisuba nkooku bitasobora kuruga mu mazima. 22Nooha arukubiiha ebisuba? Tinuwe ogu arukuhakana Yesu nkooku ali Kristo? Arukurwanisa Kristo, nuwe ogu arukuhakana Ruhanga na Ise mwana. 23Busaho n'omu anyakwanga Mwana akaikiriza Ise. Ogu anyakwikiriza Mwana, buli aikiriza na Ise. 24Eki mwahuliire okuruga omu kubanza, nikyo mugumye. Eki mwahuliire okuruga kara kakuba mukigumya, obu nubwo muliikara omu Mwana n'omuli Ise. 25Kandi Kristo eki yaturaganiize nikyo kinu: obwomeezi obutahwaho. 26Binu nimbibahandiikira kubahabura hali abo abarukugonza kubahabisa. 27Baitu Mwoyo ogu, Kristo ou yabahaire, aikara omuli inywe, kandi timurukwetaaga muntu ondi weena ow'okubeegesa; habwokuba Mwoyo ou mwahairwe, abeegesa buli kintu. Okwegesa kwe kw'amazima, tikuli kw'ebisuba. Habweki mwikale omu Kristo, nkooku Mwoyo yabeegeseze. 28Hati nu, baana bange, mwikale omuli uwe, nukwo obu alizooka tusangwe tugumire, tuleke kumwehinyaho tukwasirwe ensoni obu aliija. 29Obu muraaba nimumanya Kristo nkooku ahikiriire, nimumanya weena anyakukora ebihikire nkooku azairwe Ruhanga.

will be added

X\