1 ABAKORINTO 9

1Tindi w'obugabe? Tindi mukwenda? Ntarole Yesu Mukama waitu? 2Tali nyowe ayabakulize omu MUKAMA? Ha bandi noobu ndaaba ntali mukwenda, baitu hali inywe ndi mukwenda; habwokuba muli kyokurorraho ky'obukwenda bwange omu MUKAMA. 3Okwetonganirra kwange hali abo abarukunkaguza nukwo kunu: 4Tituli b'okuheebwa ebyokulya n'ebyokunywa? 5Titurukwikirizibwa kugenda n'omukazi munyaanyaitwe omu Yesu nk'abakwenda abandi, n'abagenzi ba MUKAMA na Keefa oku bakora? 6Rundi nyowe na Baranaba niitwe itwenka abaragirwa kwekorra eby'okutukoonyera? 7Nooha akora obuserikale, akeegurra byona ebi arukwetaaga? Nooha abyara orugonjo, atalya ha biruga omu rugonjo oru? Nooha aliisa igana, atanywa ha mata gaalyo? 8Nimugira binu nimbigambisibwa obusobozi bwange? Ebiragiro nabyo tinukwo bigamba biti? 9Kikahandiikwa omu Biragiro bya Musa kiti: “Omuntu arukukugesera, aikirizibwa kutwara ha buro.” Aho nimugira Ruhanga naagamba ha bagesi bonka? 10Tarukukigamba hali itwe itwena? Eki kikahandiikwa habwaitu, habwokuba omulimi alima naanihira kutunga, kandi omugesi agesa naanihira kutwaraho ebi arukugesa. 11Itwe obu turaaba twabasigiremu eby'omwoyo, nikiremeera kubatungamu eby'okukoonyera omubiri? 12Abandi obu baraaba babainaho obusobozi obu, kandi itwe turaasura ki? Noobu turaaba twina obusobozi obu, tutabukozese; baitu tukagumiisiriza byona nukwo tuleke kutanga Amakuru Amarungi aga Kristo. 13Timurukumanya abo abakora omunju ya Ruhanga nkooku balya ha by'omu Nju ya Ruhanga? N'abo abaheereza ha Itambiro nkooku balya ha byonzira ebihongerwe? 14Na MUKAMA waitu nukwo yaragiire ati: Abo abarangirra Amakuru Amarungi, baliisibwege ha by'Amakuru Amarungi. 15Baitu nyowe tinkakozesaaga busobozi obu, kandi binu timbihandiikire nukwo mubinkorre. Haakire nfe, hatabaireho muntu anyihaho kinu eki ndukwenyumirizaamu. 16Obu ndaaba nindangirra Amakuru Amarungi, eki tikirukundeetera kwenyumiza. Habwokuba ogu nugwo mulimo gwange mali. Ninkanyagwe kakuba ntarangirra Amakuru Amarungi! 17Kakuba ngarangirra nkyegondiize nyenka, empeera yange nimba ngitungire; kakuba ngarangirra nk'ayatumirwe, buli mba ninkora omulimo ogu nakwasiibwe. 18Obu, empeera yange neeha? Niyo enu: Nukwo kurangirra Amakuru Amarungi ntarukuheebwa kantu kandi ntarukukozesa busobozi obu nahairwe Makuru Amarungi. 19Noobu ndaaba ntarukulemwa muntu weena, nkeefoora mwiru wa boona, nukwo mpindule baingi kukiraho. 20Omu Bayudaaya nkeefoora nk'Omuyudaaya nukwo mpindule Abayudaaya. Hali abarukulemwa Ebiragiro bya Musa nkeefoora nk'arukulemwa Ebiragiro-kandi kunu tibirukundema-nukwo mpindule abarukulemwa Ebiragiro. 21Hali abo abatarukulemwa Biragiro, nkaba ndi nk'atarukulemwa Biragiro-tikuli kugamba ngu, tindemwa Biragiro bya Ruhanga, baitu ndemwa ebiragiro bya Kristo nukwo mpindule abatarukulemwa Biragiro. 22Omu baceke nkeefoora muceke, nukwo mpindule abaceke. Nkeesisaniza abantu boona omu bintu byona, nukwo nsobole kujuna abamu omuli bo. 23Ebi byona mbikora habw'Amakuru Amarungi, nukwo na nyowe mbaganeho emigisa yago. 24Timurukumanya omu mpaka z'okwiruka kaliitango, abairuki boona nkooku bairuka kwo; baitu anyakutunga ekisembo aba omu? Nahabweki mwiruke, nukwo mukitunge. 25Buli muzaani ayemanyiiza kwetanga omu bintu byona. Eki, bakikora habw'okutunga ekondo erukuhwaho, baitu itwe tutunga ekondo etarukuhwaho. 26Na nyowe tinyiruka ntaina eki ndukugenderra, kandi tinteera ntomi nk'arukuteera amasa; 27baitu nsaalize omubiri gwange, kandi ngulema, nukwo obu ndimara kurangirra abandi, ntaliija kubarwa nk'atahikire.

will be added

X\