1 ABAKORINTO 7

1Okugarukamu ebi mwampandikiire: kirungi omusaija kutakwatakwata mukazi. 2Baitu habw'okwerinda ekyohyo ky'obusiihani buli musaija abe na mukazi we, kandi na buli mukazi abe namusaija we. 3Omusaija asemeriire kuteerana na mukazi we, n'omukazi nukwo akole ati iba. 4Habwokuba omukazi talema mubiri gwe wenka, baitu gulemwa iba. Omusaija nawe talema mubiri gwe wenka, baitu gulemwa mukazi we. 5Muleke kwimangana, rundi buli mwikirraniize habw'akasumi, nukwo mwemarre ha kubaza na Ruhanga; baitu hanyuma mugaruke muteerane, Sitaani taikara kuboohya habw'obuceke bwanyu. 6Kinu nkigambire nimbahabura, tikiri kiragiro. 7Naakugondeze boona baikale nkooku ndi; baitu buli omu aina ekisembo Ruhanga eki yamuhaire, omu ky'omulingo gumu n'ondi ky'omulingo gundi. 8Abataswire n'abataswirwe, hamu n'abafaakati nimbagambira nti: Kyakubaire kirungi baikale nka nyowe oku ndi. 9Baitu obu baraaba batarukosobora kwerinda, baswere rundi baswerwe. Kirungi kuswera rundi kuswerwa okukira kutuntuzibwa okwegomba kw'omubiri. 10Abaswire n'abaswirwe nimbaragira, tali nyowe baitu nimuragirwa MUKAMA: omukazi aleke kwahukana na iba 11(baitu obu araaba ayahukaine nawe, aikale ataswirwe; kitali eki agarukanganemu na iba) kandi omusaija atalibinga mukazi we. 12Abandi, ebi ndukubagambira byange, tibiri bya MUKAMA: Omukristo weena obu aba aina omukazi atarukwikiriza Ruhanga, omukazi ogu akacwamu kwikara nawe, aleke kumubinga. 13Kandi omukazi weena obu aba aina iba atarukwikiriza Ruhanga, iba akacwamu kwikara nawe, omukazi ogu atalyahukana na iba. 14Habwokuba omusaija atarukwikiriza Ruhanga ayezibwa habwa mukazi we, kandi omukazi atarukwikiriza Ruhanga ayezibwa habwa iba. Kakuba kitarabaire kiti, abaana banyu tibakweziibwe; baitu hati beezibwe. 15Omu ha babiri atarukwikiriza Ruhanga, obu araaba naagonza kwahukana, leka ayahukane. Omu kintu nk'eki, omusaija omukristo rundi omukazi omukristo baba batakyabohwa; habwokuba Ruhanga akatweta twikale omu businge. 16Mukazi iwe noomanya ota nkooku otalijuna baro? Na iwe musaija, noomanya ota nkooku otalijuna mukazi wawe? 17Leka buli muntu aikale omu mulingo MUKAMA ogu yamuteekaniriize, kandi Ruhanga ogu yamwetiiremu. Nukwo nyegesa nti ebitebe byona eby'abaikiriza Ruhanga. 18Haroho omuntu ayayesirwe amazire kusarwa? Aleke kwesisaniza nk'atarasazirwe. Haroho omuntu ayayesirwe atakasazirwe? Aleke kwegomba kusarwa. 19Okusarwa n'okutasarwa tikwina mugaso, baitu ekikuru nukwo kukwata ebiragiro bya Ruhanga. 20Buli muntu aikale omu mulingo ogu yayetiirwemu. 21Okaba oli mwiru obu wayesirwe? Tikiri kigambo. Baitu obu oraaba noosobora kutunga obugabe, haakire obutunge. Habwokuba MUKAMA ou yayesire ali mwiru, nuwe MUKAMA aha obugabe. 22Nikyo kimu, n'ogu ou yayesire ali w'obugabe, afooka mwiru wa Kristo. 23Mukagurwa omuhendo mukooto; muleke kuba bairu b'abantu. 24Nahabweki bagenzi bange, leka buli muntu aikale omumaiso ga Ruhanga omu mulingo ogu yayetiirwemu. 25Ebirukukwata ha bataswire n'abataswirwe, tinyina kiragiro kya MUKAMA. Baitu nimbahabura nk'omuntu ou musemeriire kwesiga habw'embabazi MUKAMA yangiriire. 26Obu ndukurora obulemeezi obuli omumaiso, ninteekereza: kirungi omuntu aikale nkooku ali. 27Okateeranizibwa n'omukazi? Leka kwahukana nawe. Tokaswire mukazi? Leka kuswera. 28Baitu kakuba oswera nooba otakozire kibi. Kandi omwisiki kakuba aswerwa, nawe aba atakozire kibi. Baitu abarukuswerangana balibona obulemeezi omunsi munu; eki naakugondeze kukibajuna. 29Bagenzi bange, eki ndukubagambira nkinu: akasumi akaatairweho kaagenda nikairra haihi. Okuruga hati abaina abakazi baikale nk'abatainabo; 30n'abo abarukuganya baikale nk'abatarukuganya; n'abarukusemererwa baikale nk'abatarukusemererwa; n'abarukusuubura baikale nk'abataina by'okusuubura; 31kandi abarukukozesa ebintu by'ensi, baleke kubimarraho omutima. Habwokuba omulingo gw'ensi nkooku eri nigwija kuhwaho. 32Tindukwenda mwikale nimutuntura. Ataina mukazi ata omutima ha bya MUKAMA, kukora ebi araasiima; 33baitu omusaija aina omukazi ata omutima ha by'ensi, kukora ebiraasiimwa mukazi we, 34nahabweki omutima gwe guli hanu na hali. Kandi omukazi ataswirwe rundi omwisiki empikirre atunturra ebya MUKAMA nkooku araikara asemiire omu mubiri n'omu mwoyo; baitu omukazi anyakuswirwe atunturra eby'ensi, kukora ebiraasiimwa iba. 35Kinu ninkibagambira habw'okubagasa, tindukugenderra kubaboha, baitu kubooleka ekirukukira oburungi, nukwo muheereze MUKAMA n'omutima gumu. 36Omusaija ataswire arukuhurra nkooku atarukusobora kwerinda omwisiki ou arukukora nawe kandi tarukusobora kulema omubiri gwe, akole ekihikire. Haakire baswerangane, eki tikiri kibi. 37Baitu weena anyakwina omutima ogugumire, ataina ekirukumuhambiriza kuswera, naalema omubiri gwe kandi acwiremu wenka kutamuswera, naaba akozire kurungi. 38Nahabweki obu aswera omwisiki ogu akora kurungi, kandi obu atamuswera aba akizireho kukora kurungi. 39Omukazi abohwa hali iba, omusaija atakafiire. Iba kakuba afa, omukazi aina obugabe kuswerwa omusaija weena ou agondeze, baitu omu MUKAMA. 40Nyowe nkooku ndukurora, kakuba aikara nkooku ali kyakukizire oburungi. Kandi ninteekereza nti: Na nyowe nyebembirwe Mwoyo wa Ruhanga.

will be added

X\