1 ABAKORINTO 6

1Omuntu omu omuli inywe obu araaba aina eki arukujunaana mugenzi we, tikimukwasa nsoni kumunyegerra omu maiso g'abacwi b'emisango ab'ensi, kukira kumunyegerra omumaiso g'abarukwikiriza? 2Timurukumanya abantu ba Ruhanga nkooku nubo balicwera ensi omusango? Kandi inywe obu muraaba muli b'okucwera ensi omusango, muraalemwa muta kucwa emisango enke nk'egi? 3Timurukumanya nkooku tulicwera bamalaika omusango? Kandi emisango ey'ensi enu timwakugicwire kukiraho? 4Obu muraaba mwina emisango nk'egi, habwaki mugitwarra abantu abakira kugaywa ekitebe ky'abaikiriza, nubo bagicwe? 5Kinu ninkigamba kubakwasa ensoni. Kisoboka kita omuli inywe kuburamu muntu ow'amagezi arukusobora kuramura bagenzi be? 6Baitu abaiseemu nibanyegerrangana, kandi nibanyegerrangana ha batali baikiriza. 7Kunyegerrangana omu nkurato ez'ensi nikyoleka nkooku mulemerwe. Habwaki mutagumiisiriza kukorwa kubi? Habwaki mutaikiriza kugobezibwa? 8Baitu inywe inywenka mukora kubi kandi mugobeza noobu baakuba bagenzi banyu. 9Timurukumanya abagobya nkooku bataligwetwa omu bukama bwa Ruhanga? Muleke kubiihwabiihwa. Abanjuki, abaramya embandwa, abasiihani, abakuuhya, 10abasuma, ab'omukoijo, abatamiizi, abajumi, rundi abanyagi tibaligwetwa omu bukama bwa Ruhanga. 11Abamu omuli inywe nukwo mukaba muli muti. Baitu mukoogebwa, mwayezibwa, mwaihwaho omusango omu ibara lya MUKAMA Yesu Kristo n'omu Mwoyo wa Ruhanga waitu. 12Kikahandiikwa kiti: “Ebintu byona ninyikirizibwa kubikora”, baitu tibiri byona ebirukugasa. “Ebintu byona ninyikirizibwa kubikora”, baitu tinyina na kimu eki ndukwemarraho. 13“Ebyokulya bikategekerwa enda, kandi enda yategekerwa ebyokulya” baitu byombi: enda n'ebyokulya, Ruhanga alibihwerekereza. Omubiri gutahangirwe obusiihani, baitu gukahangirwa MUKAMA, kandi MUKAMA waitu nuwe MUKAMA w'omubiri. 14Ruhanga ayahumbwire MUKAMA waitu, na itwe alituhumbuura n'obusobozi bwe. 15Timurukumanya emibiri yanyu nkooku eba bicweka by'omubiri gwa Kristo? Hati ebicweka by'omubiri gwa Kristo ndabifoora nta bicweka by'omubiri gwa malaaya? Nikikafuuhe! 16Timurukumanya ngu, omusaija anyakuteerana n'omukazi malaaya, bombi baba mubiri gumu? Nkooku kyahandiikirwe kiti: “Ababiri abo bafooke mubiri gumu.” 17Kandi anyakuteerana na MUKAMA aba mwoyo gumu nawe. 18Mwetantale obusiihani. Ebibi ebindi byona omuntu ebi akora tibisiisa mubiri gwe; baitu anyakusiihana asiisa omubiri gwe gwonyini. 19Timurukumanya omubiri gwanyu nkooku guli Nju ya Mwoyo Ahikiriire anyakuli omuli inywe, Ruhanga ou yabahaire? Timuroho habwanyu inywenka; 20mukagurwa omuhendo mukooto. Nahabweki muhe Ruhanga ekitiinisa omu mibiri yanyu.

will be added

X\