1 ABAKORINTO 3

1Bagenzi bange, nyowe nkaba ntarukusobora kubeegesa nk'abantu abarukulemwa omwoyo, baitu nk'abarukulemwa omubiri, kandi abaana abato omu Kristo. 2Nkabanywisa amata, bitali byokulya ebigumire; habwokuba mukaba mutakahikire kubirya: kandi na hati hoona timukahikire, ningira nimukyalemwa omubiri. 3Obu muraaba mukyaina ihali n'empaka, timukyalemwa omubiri, nimukora nk'abantu kwonka? 4Omu, obu agamba ati: “Nyowe ndi wa Paulo”, n'ondi ati: “Nyowe ndi w'Apolo”, muba mutakyali bantu kwonka? 5Hati Apolo nuw'oha? Na Paulo nuw'oha? Bbo baheereza abaabaleetiire okwikiriza, buli omu MUKAMA nkooku yamuhaire. 6Nyowe nkabyara, Apolo yaitirra amaizi, baitu Ruhanga nuwe akuza. 7Nahabweki arukubyara n'arukwitirira tibali b'omugaso, kwihaho Ruhanga wenka anyakukuza. 8Arukubyara n'arukwitirra nibainganaingana, kandi buli omu alisasurwa naalengerwa ha mulimo ogu yakozire. 9Habwokuba tuli bakozi abarukukorra hamu na Ruhanga; inywe muli musiri gwa Ruhanga. Muli kyombeko kya Ruhanga. 10Na nyowe nk'omwombeki ow'amagezi, habw'ekisembo Ruhanga yampaire, nkataho omusingi, ondi yagwombekaho. Leka buli muntu arukugwombekaho ayegendereze. 11Habwokuba busaho musingi ogundi omuntu ogu asobora kutaho, kwihaho gunu ogwatairweho, nuwe Yesu Kristo. 12Ha musingi ogu kakuba omuntu aimukizaho ekyombeko kya zaabbu, efeeza, amabaale g'omuhendo, emiti, obunyansi, rundi embuba 13omulimo gwa buli omu gulirorwa; habwokuba omurro gw'Ekiro kya ha mpero gulyoleka omulimo gwa buli omu nkooku guli. 14Ekyombeko omuntu eki yayombekere ha musingi obu kitaligwa, uwe alitunga empeera. 15Baitu mukama w'ekyombeko ekirihya, alifeerwa; noobu alijunwa, baitu aliba nk'anyakurabire omu murro. 16Timurukumanya nkooku muli Nju ya Ruhanga kandi Mwoyo wa Ruhanga nkooku aikara omuli inywe? 17Weena anyakuhwerekereza Enju ya Ruhanga, nawe Ruhanga alimuhwerekereza; habwokuba Enju ye neeyera, kandi Enju egi ninywe. 18Haleke kubabo weena arukwebiiha, obu haraaba haroho omuli inywe arukweyeta ow'amagezi omu businge bunu, leka afooke mudoma, nukwo hanyuma abe w'amagezi. 19Habwokuba amagezi g'ensi enu, Ruhanga ageeta budoma. Nkooku kyahandiikirwe kiti: 20“MUKAMA naamanya ebiteekerezo by'abanyamagezi nkooku bitarumu mugaso.” 21Nahabweki haleke kubaho omuntu arukwenyumiriza omu bikorwa by'abantu. Habwokuba ebintu byona byanyu, 22noobu araaba ali Paulo, rundi Apolo, rundi Keefa, rundi ensi yoona, rundi obwomeezi, rundi okufa, rundi ebiroho, rundi ebiriija, byona byanyu; 23na inywe muli ba Kristo: kandi Kristo wa Ruhanga.

will be added

X\