1 ABAKORINTO 16

1Ebirukukwata ha bisembo eby'okukoonyera abaikiriza, na inywe mukole nkooku naragiire ebitebe by'abaikiriza ab'omu Galatiya. 2Ha kiro ekibanza buli wiiki, omuntu weena omuli inywe aiheho eki arukusobora ha bintu ebi atungire, akyahule, nukwo ebisembo bisoroozibwe kara ntakaizireyo. 3Obu ndihika, ndituma abamu aba mulisiima, bagenda n'ebbaruha, batwale ebisembo byanyu Yerusaalemu. 4Obu mulirora nikihika nyowe kugenda, ndigenda nabo. 5Ndibabungira obu ndiba mmazire kuraba Makedoni, habwokuba oku nuho ndukwenda kuleetwa. 6Obundi ndisobora kumara na inywe ebiro bike, rundi kumarrayo ebiro by'obutiti, nukwo mumboherre ha ndiba ningenda hoona. 7MUKAMA obu aligonza, ninihira kumara na inywe ebiro bike, habwokuba tindukwenda kubarora nk'arukubahungukira kwonka. 8Baitu ninyija kwikara ndi Efeeso okuhika ha kiro eky'obugenyi bwa Pentikooti, 9habwokuba mbaire ntungire omugisa mukooto ogw'okukorra hanu eby'omugaso bingi, kyonka haroho baingi abarukumparana. 10Timoteho obu aliija oku, mumujwahukirre kandi mukorrane nawe kurungi, habwokuba naakora omulimo gwa MUKAMA nka nyowe. 11Nahabweki hatabaho arukumugaya; mumukoonyere, amale orugendo rwe n'obusinge, agaruke nambere ndi; habwokuba nyowe n'ab'oruganda boona tumutegeriize. 12Kandi mugenzi waitu Apolo, nkamwesengereza muno ababungire hamu n'ab'oruganda abandi baitu abaire atakagondeze. Aliija obu alitunga omwanya. 13Mwikale nimurora, mugumire omu kwikiriza kwanyu, mube bantu manzi kandi ab'amaani. 14Byona ebi murukukora, mubikolege nimugonzangana. 15Hati nu, bagenzi bange, mumanyire ngu, eka ya Sitefana niyo yabandize kuhinduka omu Akaaya kandi bakeehayo kuheereza abaikiriza; 16nimbateererra muhege ekitiinisa abantu nk'abo, hamu n'abakozi abandi bataahi baitu. 17Nkasemererwa habw'okwija kwa Sitefana na Fotunato n'Akaiko, habwokuba bakakora ebi mwakubaire mukozire muroho; 18ningira bakahumuuza omwoyo gwange n'ogwanyu. Abantu nk'abo mubahege ekitiinisa. 19Ebitebe by'abaikiriza Ruhanga ab'omu Asiya babaramukize. Akwila na Pirisika, hamu n'ekitebe ky'abaikiriza abeesorooleza omunju yabo babaramukize muno omu MUKAMA. 20Ab'oruganda boona babaramukize. Muramukyangane nimugwangana omu kifuba nk'abantu ba Ruhanga. 21Nyowe Paulo, okuramukya kunu nkwehandikiire nyenka n'omukono gwange. 22Obu haraaba haroho weena atarukugonza MUKAMA, ogu akyenwe. Ija, Ai MUKAMA! 23Embabazi za MUKAMA waitu Yesu Kristo ziikale na inywe. 24Inywena nimbagonza omu Kristo Yesu. Amiina.

will be added

X\