1 ABAKORINTO 15

1Bagenzi bange, hati ka mbaijukye Amakuru Amarungi aga nabarangiriire, aga mwaikiriize kandi na hati aga mugumiremu, 2nugo agabajuna kakuba mugaikiriza kurungi. Kitali eki, buli nimwikiririza busa. 3Ekikuru eki nabandize kubooleka, na nyowe eki nahairwe, nikyo kinu: Kristo akafa habw'ebibi byaitu nk'Ebyahandiikirwe oku bigamba, 4akaziikwa kandi yahumbuurwa haahingwireho ebiro bisatu, nk'Ebyahandiikirwe oku bigamba, 5akabonekera Keefa, hanyuma yabonekera ikumi n'omu. 6Yagaruka yabonekera bagenzi baitu abarukukira ha bikumi bitaano omurundi gumu; baingi omuli bo na hati bakyaroho, abandi noobu baliba baafire. 7Akongera yabonekera Yakobbo, hanyuma yabonekera abakwenda boona. 8Ha kumalirra akabonekera nyowe arukubakira obuto. 9Ningira ninyowe w'okumalirra omu bakwenda, atasemeriire n'okwetwa mukwenda, habwokuba nkahiiganiza ebitebe by'abaikiriza Ruhanga. 10Baitu embabazi za Ruhanga nizo zampikize nambere ndi, kandi embabazi ezi yangiriire itafe busa. Nangwa, nyowe nkakora muno okukira abakwenda boona, noobu araaba atali nyowe ayakozire, baitu embabazi za Ruhanga eziri omuli nyowe, nizo zaakozire. 11Noobu araaba ali nyowe ayakozire, rundi abakwenda abandi, baitu ebi nibyo turangirra kandi na inywe nibyo mwaikiriize. 12Hati Kristo obu araaba naarangirirwa nkooku yahumbuukire omu bafu, abamu omuli inywe basobora bata kugamba ngu, okuhumbuuka kw'abafu tikuroho? 13Baitu okuhumbuuka kw'abafu obu kuraaba kutaroho, buli Kristo nawe atahumbuuke; 14kandi obu araaba atarahumbuukire, okurangirra kwaitu kwa busa, kandi okwikiriza kwanyu nakwo kwa busa. 15Aho nituzooka tuli babiihi b'ebisuba, habwokuba tukagumya Ruhanga nkooku yahumbwire Kristo, kandi kunu atamuhumbuule obu kiraaba kiri ky'amazima kugamba ngu, abafu tibahumbuuka. 16Abafu obu baraaba batahumbuuka, buli Kristo nawe atahumbuuke. 17Kristo obu araaba atarahumbwirwe, okwikiriza kwanyu kwa busa, kandi mukyali omu bibi byanyu. 18N'abo abaafeeriire omu Kristo bakahwerekerra. 19Obu turaaba twayesigire Kristo omu bwomeezi bunu bwonka, buli tuli bantu b'okuganyirwa okukira abandi boona. 20Baitu mananukwo Kristo akahumburwa omu bafu, nuwe muzigaijo gw'abaafiire. 21Okufa nkooku kwaizire habw'omuntu omu, okuhumbuuka kw'abafu nakwo nukwo kwaizire habw'omuntu omu. 22Boona nkooku bafa habw'Adamu, boona nukwo balyomeera habwa Kristo. 23Baitu buli muntu omu rubu rwe; Kristo nuwe muzigaijo, nukwo hakurateho abe obu aligaruka. 24Obu alikamara kukwasa Ruhanga ise obukama, amazire n'okuhwerekereza obulemi bwona, obusobozi bwona n'amaani goona, obu nubwo empero erihika. 25Habwokuba Kristo asemeriire kuhangiriza okuhika obu alikarubatirra abanyanzigwa be boona. 26Kandi omunyanzigwa wa ha mpero ow'okuhwerekerezibwa, nuwe Rufu. 27“Ningira Ruhanga akamuha kulemera kimu byona.” Baitu nambere kyahandiikirwe kiti: “Nuwe alema ebintu byona”, nikimanywa kurungi Ogu ayamuhaire kulema byona nkooku atabalirwamu. 28Kandi obu alimara kuheebwa byona abireme, Omwana nawe nubwo aliremwa ogu ayamuhaire kulema byona, nukwo Ruhanga abe byona omu boona. 29Abafu obu baraaba batahumbuuka, abantu bagenderra ki kubatizibwa habw'abafu? Obu baraaba batahumbuuka, habwaki abantu babatizibwa habwabu? 30Na nyowe ningenderra ki kwenaga omu kabi buli kasumi? 31Bagenzi bange, nimbarahira habw'okwenyumiza oku mbainaho omu Kristo Yesu MUKAMA waitu: Nyowe nfa buli kiro! 32Kakuba nyebuga, nkooku abantu bakora: “Nkarwanisa enyamaiswa ndi Efeeso”, baitu nikingasira ki? Abafu obu baraaba batahumburwa, “Leka tulye, tunywe, habwokuba nyenkya tuli b'okufa.” 33Muleke kubiihwabiihwa: “Okuteerana n'ababi nikusiisa engeso enungi.” 34Mweteere, mulekere aho okusiisa. Habwokuba abamu omuli inywe tibarukumanya Ruhanga. Eki nkigambire kubakwasa ensoni. 35Baitu omuntu asobora kukaguza ati: “Abafu babuumbuurwa bata? Kandi baliija baina mubiri gwa mulingo ki?” 36Mudoma iwe! Embibo ei osiga temera, rundi buli ebandize kufa. 37Kandi ei osiga tikiri nikyo ekimera ekiribaho, baitu osiga orujuma kwonka; rundi rw'engano rundi embibo endi. 38Baitu Ruhanga aruha omubiri nkooku agonza, kandi buli rujuma aruha omulingo gwarwo. 39Habwokuba emibiri yoona tesisana, baitu haroho omubiri gumu ogw'abantu, ogundi gw'ebisoro, ogundi gw'enyonyi, n'ogundi gw'encu. 40Haroho emibiri ey'omwiguru kandi haroho n'ey'omunsi; baitu ekitiinisa eky'ey'omwiguru kindi, kandi n'ekitiinisa eky'emibiri ey'omunsi nakyo kindi. 41Okujwa kw'izooba kundi, kandi n'okujwa kw'okwezi kundi, n'okw'enyunyuuzi nakwo kundi. Kandi n'okujwa kw'enyunyuuzi ezi, nakwo tikwingana. 42N'okuhumbuuka kw'abafu nukwo kuli kuti. Omubiri oguziikwa guba gw'okujunda, kandi oguhumburwa tiguli gw'okujunda. 43Guziikwa guhoiremu amaani, guhumburwa gwina amaani. 44Omubiri guziikwa guli mubiri gw'obuntu, gulihumburwa guli mubiri gw'omwoyo. Obu haraaba haroho omubiri ogw'obuntu, buli haroho n'ogw'omwoyo. 45Nukwo kyahandiikirwe kiti: “Adamu ow'okubanza akahangwa yaba muntu mwomeezi”; Adamu ow'okumalirra yaba mwoyo ogwomeeza. 46Obwomeezi obw'omwoyo tinubwo bubanza, baitu habanza obw'omubiri; nukwo hakurataho obw'omwoyo. 47Omuntu ow'okubanza akaruga omwitaka, ali cuucu kwonka; omuntu owa kabiri akaruga omwiguru. 48Omuntu ow'omu cuucu nkooiku akaba ali, n'ab'omu nsi nukwo bali; kandi ow'omwiguru nkooku ali, n'ab'omwiguru nukwo bali bati. 49Itwe nkooku twasisaine Adamu ayarugire omu cuucu, nukwo tulisisana na Kristo ayarugire omu iguru. 50Bagenzi bange ka mbagambire kinu: omubiri n'esagama tibisobora kugweterwa obukama bwa Ruhanga, n'ekijunda tikisobora kugweterwa ekitajunda. 51Hati ka mbamanyise ensita enu: itwena titulifa, baitu itwena tulihindurwa, 52omu kanya kake nk'ak'eriiso likoimezaamu, engwara eya ha mpero obu erigamba. Habwokuba engwara erigamba, abafu balihumburwa batakyagaruka kufa, na itwe tulihindurwa. 53Aho omubiri ogurukujunda, gulijwara ogutajunda, kandi omubiri gunu ogufa, gulijwara ogutafa. 54Ogurukujunda ogu, obu guliba gujwaire ogutajunda, kandi ogurukufa gujwaire ogutafa, nubwo Ekyahandiikirwe kirihikirra ekirukugamba kiti: “Orufu rusingwirwe, rwahwerekerezibwa.” 55“Rufu iwe, obusinguzi bwawe buraha? Rufu iwe, obusaalizi bw'omubuli gwawe buraha?” 56Omubuli gw'Orufu nikyo ekibi, kandi amaani g'ekibi gasigikira ha Biragiro. 57Ruhanga asiimwe anyakutuha obusinguzi naaraba omu MUKAMA waitu Yesu Kristo. 58Nahabweki bagenzi bange abagonzibwa, mugume, mutatengatengeeta, kandi obutoosa mweyongere kukora omulimo gwa MUKAMA, mumanye ngu, obu murukumukorra, obwekambi bwanyu tibuli bwa busa.

will be added

X\