1 ABAKORINTO 13

1Noobu nkubaza endimi z'abantu n'ez'abamalaika, baitu ntaina kugonza ninsisana ekide ekirukugamba rundi enjogera ezirukujaara. 2Noobu nkuba nyina obusobozi bw'okuranga ebya Ruhanga, kandi ninyetegereza ensita ze zoona, nyina n'amagezi goona; noobu naakuba nyina okwikiriza kwona okw'okwihaho ensozi kunu ntaina kugonza, tindi kantu. 3Noobu naakugabira abanaku byona ebi nyinabyo, noobu naakuhayo omubiri gwange kwokebwa, kunu ntaina kugonza, tingasirwa kantu. 4Okugonza kugumiisiriza kandi kugira embabazi; okugonza tikugira ihali noobu kwakuba kwenyumiza; 5tikwehaisa kandi tikugira kiniga. Okugonza tikweserurra ebyakwo; tikubiihirwa, tikwikaza nzigu ha mutima; 6tikusiima ebitahikire, baitu kusiima ebihikire. 7Okugonza kugumira byona, kwikiriza byona, kunihira byona, kugumiisiriza byona. 8Okugonza tikuhwaho. Oburangi, bwo bulihwaho; okubaza endimi, nakwo kulihwaho; n'okumanya kulihwaho. 9Habwokuba okumanya kwaitu kuke, kandi n'oburangi bwaitu nabwo tibuhikire; 10ebihikire obu biriija, ebitahikire birihwaho. 11Obu nkaba ndi mwana naabazaaga nk'omwana, naateekerezaaga nk'omwana, naacwamuga nk'omwana; baitu obu nakuzire, naleka eby'obuto. 12Hati niturorra omu ndolerwamu, tutarukuhweza kurungi; baitu omu kasumi ako, tuliroranganira kimu. Hati nimmanyaho ekicweka; baitu omu kasumi ako, ebi ndibyetegerereza kimu, nyowe nkooku nyetegererezibwe kimu. 13Habweki nihaikaraho bisatu: okwikiriza, okunihira, n'okugonza; baitu ekirukukira byona nukwo kugonza.

will be added

X\