1 ABAKORINTO 1

1Nyowe Paulo, ayayesirwe kuba omukwenda wa Kristo Yesu, Ruhanga nkooku yagondeze, na mugenzi waitu Soositene, 2nituhandiikira inywe ab'ekitebe ky'abaikiriza ruhanga abali Korinto, inywena abaayezibwe Kristo Yesu, baayetwa kuba bahikiriire, hamu n'abo boona abikiriza MUKAMA Yesu Kristo abe MUKAMA waabo kandi waitu. 3Nitubagondeza embabazi n'obusinge ebiruga hali Ruhanga Isiitwe na hali MUKAMA waitu Yesu Kristo. 4Obutoosa ninsiima Ruhanga habwanyu, habw'embabazi ze ezi yabagiriire omu Kristo Yesu, 5habwokuba omuli uwe nuho mwaihire byona. Byona ebi mwegesa n'ebi mumanya. 6Byona ebi twabeegeseze hali Kristo bimazire kugumibwa omuli inywe. 7Nahabweki tiharoho kisembo kyona eky'omwoyo eki mutaina, mukyategeriize okugaruka kwa MUKAMA waitu Yesu Kristo. 8Nuwe alibagumya okuhika ha mpero, musangwe mutaina musango ha kiro MUKAMA waitu Yesu Kristo eki aliiziramu. 9Ruhanga ayabeesire kuteerana n'Omwana we Yesu Kristo MUKAMA waitu, aba mwesigwa. 10Bagenzi bange, nimbeesengereza omu ibara lya MUKAMA waitu Yesu Kristo, inywe mwikirranize, haleke kubaho okwebaganizaamu; baitu muteerane nimugamba kamu kandi nimwikirraniza. 11Habwokuba abantu ab'owa Kilowe bammanyisize nkooku mwina empaka, bagenzi bange. 12Eki ndukwoleka nikyo kinu: buli omu omuli inywe naagamba ati: “Nyowe ndi wa Paulo”, rundi: “Nyowe ndi w'Apolo”, ondi ati: “Nyowe ndi wa Keefa”, n'ondi ati: “Nyowe ndi wa Kristo.” 13Mara Kristo abaganizibwamu? Paulo nuwe yabambirwe ha musaraba habwanyu? Rundi mukabatizibwa omu ibara lya Paulo? 14Ninsiima Ruhanga habwokuba ntabatize n'omu omuli inywe, okwihaho Kirisipo na Gaayo, 15haleke kubaho arukagamba ngu, mukabatizibwa omu ibara lyange. 16(Egokwo, nkabatiza n'eka ya Sitefana. Okwihaho abo, tindukumanya obu haraaba haroho ondi weena ou nabatiize.) 17Habwokuba Kristo atantume kubatiza; baitu akantuma okurangirra Amakuru Amarungi, ntarukubaza ebigambo eby'amagezi g'ensi, omusaraba gwa Kristo guleke kwihwaho obusobozi. 18Isomo ly'omusaraba hali abarukuhwerekerra kiba ky'obudoma; baitu hali itwe abarukujunwa, nugo maani ga Ruhanga. 19Habwokuba kikahandiikwa kiti: “Ndihwerekereza amagezi g'ab'amagezi, kandi ndimaraho okwetegereza kw'abarukwetegereza.” 20Ow'amagezi araha? Omwegesa w'ebiragiro araha? Kalimpaka ow'obusinge bunu araha? Amagezi g'ensi Ruhanga atagafoole budoma? 21Okuruga kara, Ruhanga nkooku yategekere, ab'ensi bakalemwa kumumanya habw'amagezi gaabu amaingi; baitu Ruhanga akasiima abaikiriza kubajunisa enyegesa yaitu ey'obudoma. 22Habwokuba Abayudaaya bagonza ebihuniriza, kandi Abagiriiki baserra eby'amagezi, 23baitu itwe twegesa Kristo ayabambirwe ha musaraba, Abayudaaya eki beeta kyesiitazo kandi Abanyamahanga eki beeta obudoma. 24Baitu hali abo abarukwetwa Bayudaaya, noobu baraaba bali Bagiriiki, Kristo nuwe maani ga Ruhanga kandi magezi ge. 25Habwokuba obudoma bwa Ruhanga bukira amagezi g'abantu; kandi n'obuceke bwa Ruhanga bukira amaani g'abantu. 26Nahabweki bagenzi bange, mwijuke okwetwa kwanyu. Bake omuli inywe abakaba nibabarwa omu b'amagezi ab'ensi, noobwakubaire ab'obusobozi, rundi ab'enganda enkuru; 27baitu Ruhanga akakoma abadoma b'ensi nukwo aswaze ab'amagezi. Ruhanga akakoma enceke z'ensi nukwo aswaze ab'amaani. 28Akakoma abatali b'ekitiinisa, abarukugaywa omu nsi, n'abakaba batali b'omugaso, nukwo adibye abakaba bali b'omugaso; 29haleke kubaho omuntu arukwenyumiza omu maiso ga Ruhanga. 30Ruhanga nuwe ndugirro y'obwomeezi bwanyu omu Kristo Yesu ou yafoire magezi gaitu, buhikiriire bwaitu, kwera kwaitu n'okucungurwa kwaitu. 31Nukwo kyahandiikirwe kiti: “Ogu arukwenyumiza, leka ayenyumirize omu MUKAMA.”

will be added

X\