Titus 1

1- 4Nyowe Paulo, omuheereza wa Ruhanga, kandi entumwa ya Yesu Kristo, naakuramutsya iwe Tito, omwana wangye buzima omu kwikiriza kwaitu twena, ninkwendeza emigisha n'obusingye ebikomooka ahari Ruhanga Taata, na Kristo Yesu Omujuni waitu. Manya nkatumwa kwenegyeza okwikiriza kw'entoore za Ruhanga, n'okubamanyisa amazima agarikuhikaana n'okumutiina; obwo baine amatsiko g'okutunga amagara agatahwaho, agu Ruhanga otabeiha yaaraganiise iranaira. Haza omu bunaku buhikire Ruhanga ogwo, Omujuni waitu, akooreka ekigambo kye, yandagiira nankwatsa omurimo gw'okukirangirira. 5Eki naakutsigiire Kureete n'okwenda ngu ohikiirize ebyabaire bitakakozirwe, kandi n'okutaho abakuru omuri buri rurembo, nk'oku naakuragiire. 6Ou oraagume waatoorana, abe ari omuntu otaine ki arikuhaahuuzibwa, oshweire omukazi omwe, ou abaana be bari abaikiriza, kandi abatarikwetwa birare nari entahurira. 7Manya omureeberezi, nk'owaakwatsiibwe kureeberera eby'eka ya Ruhanga, ashemereire kuba otaine kirikumuhaahuuzibwa, otari munyamaryo, otarikurahuka kuguubwa kubi, nari omusinzi nari ow'omwaga, nainga orikururuuhira okutunga. 8Kureka abe orikukunira abagyenyi, enkunzi y'ebirungi, orikwebariirira, omwinganisa, orikwera kandi orikutegyeka omubiri gwe. 9Ashemereire kuhamira aha bigambo eby'amazima nk'oku yaabyegyesiibwe, haza abone kushoboororera abantu enyegyesa ehikire, n'okusinga abarikugihakanisa. 10Manya hariho abantu baingi entahurira, abagamba busha kandi engobya, munomuno ab'omu kigombe ky'abashazirwe. 11Abo bashemereire kuhunamibwa, ahabw'okuba nibasheenya amaka nibeegyesa ebi batakwegyeise, ngu babone kwetungira amagoba gakoire. 12Omwe omuribo, omurangi w'abaabo, akagira ati: Abanyakureete obutoosha baba embeihi, enyamaishwa mbi, abanyanda-endiirabusha. 13Kandi obwamushinja obwo n'obw'amazima. N'ahabw'ekyo obahane n'amaani, babone kuba abahikire omu kwikiriza, 14barereerere aho kuta omutima aha biteekyerezo ebigunjano eby'Ekiyudaaya, nari aha bi abanga amazima baragiira. 15Aha bashemeire, byona biba ebishemeire; kwonka aha basiisikaire n'abatarikwikiriza, tihariho kiba ekishemeire; ahabw'okuba obwengye bwabo n'emitima yaabo bisiisikaire. 16Beegamba ku barikumanya Ruhanga; kwonka omu bi barikukora bamwehakana; n'ab'okunugwa, entahurira kandi abatashemereire murimo gwona omurungi.

will be added

X\