Romans 9

1Ningamba amazima omuri Kristo ntarikubeiha. Omutima gwangye nigumpamiza omuri Mutima Orikwera, 2ku nyine obusaasi bwingi n'enaku ezitarikutuuza omu mutima. 3Manya nkaayenzire nkyeenwe kandi mbe encuubwa ahari Kristo ahabwa beene waitu, ab'oruganda rwangye omu buzaare. 4Nibo Baisiraeli abaahairwe omugisha gw'okuba abaana ba Ruhanga, bakaheebwa ekitiinwa n'endagaano n'eiteeka n'emigyenzo y'okuramya, kandi n'ebyaraganisiibwe. 5Nibo baijukuru ba baatatenkuriitwe, abu eihanga ryabo omu mubiri rikomookwamu Kristo. Ruhanga otegyeka byona, ahimbisibwe ebiro byona. Amiina. 6Kwonka tikwo kugira ngu eki Ruhanga yaaraganiise kikarema kuhikiirizibwa. Manya ti boona abakomooka omuri Isiraeli abari Abaisiraeli; 7kandi ti boona abari abaana ba Aburahamu, ngu ahabw'okuba n'abaijukuru. Kwonka ekyahandiikirwe nikigira kiti: Baijukuru baawe baryayetererwa Isaaka. 8Ekyo nikimanyisa ngu abazairwe omu mubiri tibo baana ba Ruhanga, kureka abazairwe nk'oku kyaraganisiibwe, nibo babarwa kuba abaijukuru. 9Ahabw'okuba ekyo ekyaraganisiibwe kikagira kiti: Omu bunaku nk'obu, ndyagaruka, kandi Saara aryazaara omutabani. 10Haza tikyo kyonka, kureka na Rebeka ku yaabaire abakire enda y'empasha, agitwekirwe omushaija omwe, Isaaka tatenkuriitwe. 11Nobu baabaire batakazairwe, kandi batakakozire kirungi nari kibi, kwonka Ruhanga ahabw'okwenda kugumizamu enaama ye y'okutoorana, kutari habw'emirimo, kureka ahabw'okwetwa, 12Rebeka ogwo akagambirwa ati: Kakuru aryaheereza Kato. 13Nk'oku kyahandiikirwe kiti: Yakobo nkamukunda, kwonka Esau naamwanga. 14Mbwenu shi tugambe ki? Ngu Ruhanga tainganisa? Rubuuza! 15Manya akagira Musa ati: Ndyagirira embabazi ou ndyenda kuzigirira, kandi ngirire esaasi ou ndyenda kugigirira. 16N'ahabw'ekyo ti ky'okweyendera kw'omuntu nari ahabw'okwehenenga kwe, kureka n'eky'embabazi za Ruhanga. 17Ahabw'okuba omu kyahandiikirwe, Ruhanga akagambira Faraaho ati: Eki naakutunguuriire, n'okwenda ngu nkworekyereho obushoboorozi bwangye, haza eiziina ryangye ribone kurangaanwa omu nsi yoona. 18N'ahabw'ekyo Ruhanga agirira embabazi ou ayenda kuzigirira, kandi agangaaza omutima gw'ou ayenda ngu gugangaare. 19Noija kungira oti: Ahabw'enki Ruhanga naakibarira abantu ebishobyo? Mbwenu n'oha owaakumwangira kukora eki arikwenda? 20Beitu shi, muntu 'we, niiwe oha orikugarurira Ruhanga? Omusinga nigubaasa kubuuza ogunogoire guti: Ahabw'enki ombumbire oti? 21Hari omunogoozi w'enyungu taine bushoboorozi aha ibumba, kunogoora omu mugoma gwaryo orwabya rw'ekitiinwa nari orurikugaywa? 22Manya Ruhanga akenda kworeka ekiniga kye n'obushoboorozi bwe. Atyo yaagumisiriza n'embabazi ze enyingi enyabya ezi ainiire ekiniga, ezirangariire kuhwerekyerezibwa. 23Kandi akenda kworeka ekitiinwa kye ekingi aha nyabya ezi ainiire embabazi, ezi yaateekateekyeire ekitiinwa okwiha ira. 24Mbwenu ezo nyabya niitwe, abu yaayetsire; ti mu Bayudaaya bonka, kureka n'omu Banyamahanga. 25Nk'oku arikugira omuri Hoseya ati: Abaabaire batari bangye, ndyabeeta eihanga ryangye. N'ou naabaire ntarikukunda, ndyamweta enkundwakazi. 26Nahi baagambiriirwe bati: Timuri ihanga ryangye, niho baryeterwa abaana ba Ruhanga ohuriire. 27Na Isaaya naatongyeza Isiraeli n'eiraka rihango ati: Omubaro gw'abaana ba Isiraeli nobu guringana omusheenyi gw'aha nyanja, kwonka abakye abaritsigaraho nibo barijunwa; 28ahabw'okuba Mukama taribura kuhikiiriza juba eki yaagambire aha b'omu nsi. 29Kandi nk'oku Isaaya yaarangire ati: Kuri Mukama ow'amahe ataratutsigiireho ruzaaro, tukaabaire nka Sodoma, tushushana na Gomora. 30Mbwenu shi tugambe ki? Manya Abanyamahanga abatarakuratiire kuhikiirira, bakahika aha kuhikiirira, nikwo kuhikiirira okuruga omu kwikiriza. 31Kwonka Abaisiraeli, abaasherwire eiteeka ry'okubahitsya aha kuhikiirira okwo, bakaremwa kurihitsya. 32Ahabw'enki? Ahabw'okuba tibarakukuratiire nibeema omu kwikiriza, kureka nibeema omu bi barikukora. Batyo baateerwa entsibo aha ibaare eriteeza entsibo, 33nk'oku kyahandiikirwe ngu: Reeba, ninta omuri Siyooni eibaare eririkuteeza entsibo, n'orukiri orurikugwisa; kandi weena orikumwikiriza, tariitwa nshoni.

will be added

X\