Romans 8

1Mbwenu hati abari omuri Kristo Yesu tibaakiine rubanja. 2Manya eiteeka rya Mutima, ohaisa amagara abari omuri Kristo Yesu, rikaanyiha omu buhuuku bw'okutegyekwa eiteeka ry'ekibi n'okufa. 3Eki eiteeka ritarabaasize ahabw'okuremesibwa omubiri, Ruhanga akakikora; yaayohereza Omwana we buzima, aine omubiri nk'ogwaitu ogukora ekibi, kuba ekihongwa ahabw'ekibi, kandi omu mubiri yaasingisa ekyo kibi orubanja. 4Ruhanga ekyo akakikora, ngu ebi eiteeka ririkuturagiira kukora bibone kuhikiiririzibwa omuriitwe, abatakuratira by'omubiri, kureka ebya Mutima. 5Manya abakuratira ebi omubiri gubenza, bategyekwa omubiri gwabo. Kwonka aboorobera ebi Mutima arikubagambira, bategyekwa ebya Mutima. 6Okutegyekwa ebi omubiri gutwenza kurugwamu okufa; kandi okutegyekwa ebi Mutima ayenda kureeta amagara n'obusingye. 7Manya okukuratira ebi omubiri gwenda, kureetera omuntu kuba omuzigu wa Ruhanga, ahabw'okuba tayorobera iteeka rya Ruhanga, kandi kwo buzima tikirikubaasika; 8na boona abategyekwa omubiri tibabaasa kugwisa gye Ruhanga. 9Kwonka imwe, buzimazima Mutima wa Ruhanga ku araabe atuura omuriimwe, timuri mu mubiri, kureka muri omuri Mutima. Manya weena otaine Mutima wa Kristo, biri t'owe. 10Mbwenu Kristo ku araabe ari omuriimwe, biri omubiri gufiire ahabw'ekibi, kwonka omutima guhuriire ahabw'okuhikiirira. 11Mutima wa Nyakuzoora Yesu omu bafiire ku araabe atuura omuriimwe, ogwo owaazoire Kristo Yesu omu bafiire, emibiri yaanyu ey'okufa aryagiha amagara ahabwa Mutima we otuura omuriimwe. 12N'ahabw'ekyo, banyaruganda, twine eibanja, ritari ry'omubiri ngu tukuratire ebyagwo 13ahabw'okuba ku murikukuratira eby'omubiri muryafa; kwonka Mutima ku arikubahwera, mwaita ebi omubiri gukora, muryaba abahuriire. 14Manya boona abahaburwa Mutima wa Ruhanga nibo baana ba Ruhanga. 15Timurahairwe mutima gw'obuhuuku kugaruka kutiina, kureka mukaheebwa Mutima owaabahindwire abaana, otwetesa ati: Abba! Taata! 16Mutima wenka niwe ahamya hamwe n'omutima gwaitu, ku turi abaana ba Ruhanga. 17Ku turaabe turi abaana, biri turi abahunguzi ba Ruhanga, kandi ab'okuhungura hamwe na Kristo, twaba nitubonabona hamwe nawe, ngu tubone kuheebwa ekitiinwa hamwe nawe. 18Ninteekateeka ngu okubonabona okw'omu biro ebi, tikurikwinganisibwa n'ekitiinwa ekiritushuuruurirwa. 19Ahabw'okuba ebihangwa byona bituura bitegyereize Ruhanga n'ekihika, kumurika abaana be. 20Manya ebyo bihangwa bikaragiirwa kutegyekwa ebitaine mugasho ti habw'okweyendera kwabyo, kureka ahabw'ogwo owaaragiire ku bitegyekwa bityo bituura biine amatsiko, 21ahabw'okuba ebyo bihangwa biryaihwa omu buhuuku bw'okujunda, bibagane aha busingye n'ekitiinwa eby'abaana ba Ruhanga. 22Nitumanya ngu n'okuhitsya hati ebihangwa byona bituura nibitsinda, kandi nibishaasha kumwe nk'ebirikurumwa kuzaara. 23Haza ti bihangwa byonka, kureka naitwe abatungire emiganuro ya Mutima, ekiconco ky'okubanza kya Ruhanga, nitutsinda tutegyereize Ruhanga kutuhindura abaana be, n'okutucungura. 24Okujunwa oku twajunirwe, tutuura twine amatsiko g'okukuhikaho. Manya okugirira amatsiko ekirikureebwa, ago gaba gatari matsiko. Mbwenu shi n'oha ogirira amatsiko eki arikureeba? 25Kwonka ku tugirira amatsiko eki tutarikureeba, tukitegyereza n'okugumisiriza. 26Kandi na Mutima nikwo atuhwera atyo omu bweremwa bwaitu, ahabw'okuba titumanya kushaba nk'oku kitushemereire. Mutima ogwo wenka niwe atutonganira ahari Ruhanga n'okutsinda okwine eigamba. 27Kandi Ruhanga ogwo ocaaka emitima y'abantu, amanya eki Mutima arikwenda; ahabw'okuba Mutima atonganirira abarikwera ahari Ruhanga, kandi nk'oku Ruhanga akunda. 28Nitumanya ngu abakunda Ruhanga, kandi abeetwa nk'oku enaama ye eri, byona ebibahikaho bikwatanisa kubarugiramu ebirungi. 29Ahabw'okuba abu yaamanyire ira batakabaireho, nibo yaatooraine kushushanisibwa n'Omwana we, ngu Omwana we ogwo abone kuba omujigaijo omu banyaruganda baingi. 30Boona abu yaatooraine batakabaireho, nibo yaayeetsire; kandi abu yaayeetsire, nibo yaahaire okuhikiirira. N'abu yaahaire okuhikiirira, nibo yaahaisize ekitiinwa. 31Mbwenu shi ebyo tubigambeho ki? Ruhanga ku araabe ari aha rubaju rwaitu, n'oha oriturwanisa akatubaasa: 32Ogwo otarasaasiire Mwana we buzima, kureka akamuhayo ahabwaitu twena, aryazibirwa ki kutuha ebintu byona hamwe nawe? 33N'oha oritabaariza entoore za Ruhanga? Ni Ruhanga obaihaho orubanja. 34N'oha oribacwera orubanja rukabasinga? Ni Kristo Yesu owaafiire akataho n'okuzooka omu bafiire, kandi ori aha rubaju rwa Ruhanga orwa buryo, ataireho n'okututonganira! 35Mbwenu nu, n'oha oritutaanisa na rukundo ya Kristo? N'omunyangararo, n'enaku, n'okuhiiganisibwa, n'enjara, n'okujwara busha, n'akabi, nainga shi rurara? 36Nk'oku kyahandiikirwe kiti: Tusiiba nitwitwa ahabwawe, nitubarwa nk'entaama embaagwa. 37Kwonka omuri ebyo byona tusingwire okutakareebwaga ahabw'Ogwo owaatukunzire. 38Manya nimpamiza kimwe ku hatariho kintu kyona: yaaba rufu, yaaba magara, yaaba baamaraika, yaaba bategyeki, yaaba ebiriho, yaaba ebiribaho, yaaba b'obushoboorozi, 39nobu byakuba eby'omu iguru nari eby'okuzimu, nainga ekintu kyona ekyahangirwe, ekiribaasa kututaanisa na rukundo ya Ruhanga, eri omuri Kristo Yesu Mukama waitu.

will be added

X\